Almaty onkologıalyq ortalyǵynda robottandyrylǵan dárihana kesheni men dárilik preparattardy jabyq, germetıkalyq jaǵdaıda daıyndaý júıesi engizildi, - dep habarlaıdy alnews.
Bul týraly qalalyq Qoǵamdyq densaýlyq saqtaý basqarmasynyń ókilderi habarlady.
Jańa tehnologıa dári-dármekpen qamtamasyz etýdiń negizgi kezeńderin – preparattardy qabyldap, saqtaýdan bastap, olardy daıyndaý jáne naýqasqa berýge deıingi úderisti avtomattandyrady.
Júıeniń basty ereksheligi – árbir preparattyń sıfrlyq baqylaýda bolýy. Arnaıy kod arqyly dárige jeke sáıkestendirý nómiri beriledi, al onymen jasalǵan barlyq áreket júıede tirkeledi. Osylaısha mamandar preparattyń dárihana keshenine túsken sátinen bastap naýqasqa berilgenge deıingi búkil jolyn baqylap otyra alady.
Bul onkologıalyq qyzmet úshin asa mańyzdy. Sebebi dári-dármekpen qamtamasyz etýdiń dáldigi men qaýipsizdigi emdeý sapasyna tikeleı áser etedi.
Qazir Almaty onkologıalyq ortalyǵynda 38 myńnan astam naýqas esepte tur. Jyl saıyn 27 myńnan astam adam medısınalyq kómek alady. Sońǵy segiz jylda onkologıalyq aýrýlardy emdeý boıynsha kórsetiletin qyzmet kólemi 2,5 esege artqan.
Sonymen qatar bes jyldyq ómir súrý kórsetkishi 46%-dan 75%-ǵa deıin ósken.
«Endi bul nátıjelerge tehnologıalyq turǵydan taǵy bir mańyzdy qadam qosylyp otyr. Robottandyrylǵan júıe adam faktorynan bolatyn qatelikterdi barynsha azaıtyp, dári-dármektiń qozǵalysyn tolyq baqylaýǵa múmkindik beredi. İs júzinde ortalyqta dáriniń sıfrlyq joly qalyptasyp otyr. Bul júıede onyń birde-bir kezeńi baqylaýsyz qalmaıdy», – dedi Almaty qalasy Qoǵamdyq densaýlyq saqtaý basqarmasynyń basshysy Marat Pashımov.
Buǵan deıin Almaty onkologıalyq ortalyǵynda onkologıalyq aýrýlardy emdeý kezinde qoldanylatyn preparattardy avtomatty ári dál daıyndaýǵa arnalǵan robottandyrylǵan jabdyq ornatylǵan bolatyn.
Júıe qajetti dozany dál saqtaýǵa, qatelesý qaýpin azaıtýǵa jáne dári-dármekti daıyndaý úderisin baqylaýǵa múmkindik beredi.
Ortalyqtyń málimetinshe, robottandyrylǵan keshenderdi engizýdegi negizgi maqsat – naýqastardyń qaýipsizdigin arttyryp, emdeý sapasyn odan ári jaqsartý.
