كونستيتۋسيالىق رەفورما جونىندەگى كوميسسيانىڭ كەزەكتى وتىرىسىندا قازاقستان رەسپۋبليكاسىنداعى بالا قۇقىقتارى جونىندەگى ۋاكىل دينارا زاكييەۆا تۇرعىن ءۇي قۇقىعى مەن بالالاردىڭ مۇددەسىن قورعاۋ بولىگىندە كونستيتۋسيالىق كەپىلدىكتەردى كۇشەيتۋگە باعىتتالعان باستاما كوتەردى.
«بۇگىن تاڭەرتەڭ ۇكىمەتتىڭ كەڭەيتىلگەن وتىرىسىندا قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆ ازاماتتاردى نەگىزسىز تۇرعىن ۇيدەن شىعارۋدان جانە باسپاناسىنان ايىرىلۋدان قورعاۋ كەپىلدىكتەرىن كۇشەيتۋ قاجەتتىگىنە ەرەكشە نازار اۋداردى. تۇرعىن ۇيگە قۇقىق – بۇل الەۋمەتتىك كەپىلدىك قانا ەمەس، اسىرەسە بالالار تۋرالى ءسوز بولعاندا، ادامنىڭ قاۋىپسىزدىگىنىڭ نەگىزگى شارتى»، – دەدى سپيكەر.
ءوز سوزىندە دينارا زاكييەۆا حالىقارالىق ستاندارتتارعا سايكەس، بالالار ءومىر ءسۇرۋ، دامۋ جانە ءوز قۇقىقتارىن قورعاۋ ءۇشىن ەڭ قولايلى جاعدايلارعا قۇقىلى ەكەنىن جەتكىزدى.
«بۇۇ بالا قۇقىقتارى تۋرالى كونۆەنسياسىندا ءاربىر بالانىڭ فيزيكالىق، زياتكەرلىك، رۋحاني، ادامگەرشىلىك جانە الەۋمەتتىك دامۋىنا جەتكىلىكتى ءومىر ءسۇرۋ دەڭگەيىنە قۇقىعى بەكىتىلگەن. بۇل – ءقاۋىپسىز ءارى تۇراقتى باسپانانىڭ بولۋىن كوزدەيدى. بالا ءۇشىن تۇرعىن ءۇي – ونىڭ ءال-اۋقاتى مەن مۇددەلەرىن قورعاۋدىڭ نەگىزگى فاكتورلارىنىڭ ءبىرى»، – دەدى ول.
سونىمەن قاتار تۇرعىن ءۇي قاتىناستارى سالاسىندا ازاماتتاردىڭ قۇقىقتارى بۇزىلۋ ءقاۋپى ەرەكشە ايقىن كورىنىپ وتىرعانى دا ايتىلدى. سپيكەردىڭ مالىمدەۋىنشە، قۇقىق قولدانۋ تاجىريبەسى بۇعان دالەل ەكەن. ويتكەنى ازاماتتاردىڭ قۇقىقتارىن شەكتەۋگە بايلانىستى الەۋمەتتىك تاۋەكەلدەر ءدال وسى تۇرعىن ءۇي قاتىناستارىنىڭ ۇيدەن شىعارۋ ماسەلەلەرى تۋىنداعان كەزدە ايقىن بايقالادى.
دينارا زاكييەۆا ءوز قىزمەتى بارىسىندا ءتۇرلى قايعىلى تۇرمىستىق احۋالدار سالدارىنان بالالاردىڭ جالعىز باسپاناسىنان ايىرىلۋ قاۋپىنە تاپ بولاتىن جاعدايلارعا بىرنەشە رەت كەزىككەنىن ايتتى.
«بالالاردىڭ ءوزىنىڭ جالعىز اسىراۋشىسى – اناسىنان ايىرىلاتىن جاعدايدى مىسالعا كەلتىرەيىن. اناسى كوزى تىرىسىندە باسپاناعا الىنعان يپوتەكالىق نەسيەنىڭ ەداۋىر بولىگىن وتەگەن بولاتىن. سوعان قاراماستان، بۇرىن تولەنىپ قويعان قاراجات قايتارىلمايتىن جاعدايدا بالالاردىڭ جالعىز باسپاناسىنان ايىرىلۋ ءقاۋپى تۋىندادى. ءبىزدىڭ ءوتىنىشىمىزدىڭ ناتيجەسىندە بانك قالعان قارىزدى كەشىرۋ تۋرالى شەشىم قابىلدادى. الايدا، مۇنداي وقيعالار وكىنىشكە قاراي، سيرەك ەمەس»، – دەدى بالا قۇقىقتارى جونىندەگى ۋاكىل.
وسىعان بايلانىستى ادام ومىرىندەگى ماڭىزدى جانە بالانىڭ ەڭ قاجەتتى مۇددەلەرىن سوت تاراپىنان ەسكەرۋسىز قالدىرىپ، تۇرعىن ۇيدەن ايىراتىن جاعدايلارعا جول بەرمەيتىن كەپىلدىكتەردى بەكىتۋ قاجەت.
بۇل تۇرعىدا ول ناقتى كونستيتۋسيالىق نورما ۇسىنىلىپ وتىرعانىن اتاپ ءوتتى.
«وسىعان وراي، ازاماتتاردى تۇرعىن ۇيمەن قامتاماسىز ەتۋ ءۇشىن جاعداي جاساۋ جونىندەگى مەملەكەتتىڭ مىندەتىمەن قاتار، قازاقستان رەسپۋبليكاسىنىڭ كونستيتۋسياسىندا تۇرعىن ۇيدەن سوت شەشىمىنسىز شىعارۋعا جول بەرىلمەيتىنى تۋرالى نورمانى بەكىتۋدى ۇسىنامىز»، – دەدى سپيكەر.
ءسوز سوڭىندا ول ۇسىنىلىپ وتىرعان نورما الەۋمەتتىك مەملەكەتتىڭ قۇندىلىق باعدارلارىن ايقىندايتىنىنا نازار اۋداردى.
«تۇرعىن ۇيدەن سوت شەشىمىنسىز شىعارۋعا جول بەرىلمەيتىنى تۋرالى نورمانىڭ كونستيتۋسيادا كورىنىس تابۋى – الەۋمەتتىك مەملەكەتتىڭ كەمەلدىگىن جانە ادامنىڭ قادىر-قاسيەتىنە دەگەن قۇرمەتتى كورسەتەدى»، – دەپ تۇيىندەدى دينارا زاكييەۆا.
