7 ماۋسىم كۇنى الماتىداعى اباي الاڭىندا الماتى قالاسى اكىمدىگىنىڭ قولداۋىمەن حالىقارالىق The Spirit of Tengri زاماناۋي ەتنيكالىق مۋزىكا فەستيۆالى وتەدى، - دەپ حابارلايدى alnews.
ءىس-شاراعا قاتىساتىن ارنايى قوناقتاردىڭ ءبىرى Andru Donalds. ول كومپوزيسيالارى دۇنيە جۇزىنە كەڭىنەن تانىلىپ، بىرنەشە بۋىننىڭ مۋزىكالىق مادەنيەتىنە اينالعان Enigma جوباسىنىڭ ۆوكاليسى.
The Spirit of Tengri - ورتالىق ازياداعى جىل سايىن مىڭداعان كورەرمەن جينالاتىن ەڭ ءىرى مۋزىكالىق open-air فەستيۆالدەردىڭ ءبىرى. فەستيۆال زاماناۋي ەتنيكالىق مۋزىكا، world music، ethno fusion جانە ۇلتتىق اۋەن مەن قازىرگى مۋزىكالىق باعىتتار ۇندەسكەن ءتۇرلى جانرلاردى ۇسىناتىن، الەمنىڭ ءار تۇكپىرىنەن كەلگەن ورىنداۋشىلاردىڭ باسىن قوسادى.
ءار جىلدارى فەستيۆال ساحناسىندا ەۋروپا مەن ازيانىڭ تانىمال ارتيستەرى مەن مۋزىكالىق ۇجىمدارى ونەر كورسەتتى. جوبا مادەني بايلانىستى نىعايتىپ، ەتنيكالىق مۋزىكانى ناسيحاتتايتىن ءارى زاماناۋي مۋزىكالىق باستامالاردى قولدايتىن ماڭىزدى الاڭعا اينالدى.
بيىل فەستيۆال اۋماعىندا دەمالىس ايماقتارى، Ethno Market، foodcourt، ينتەراكتيۆتى جانە سەرىكتەستەردىڭ الاڭدارى جۇمىس ىستەيدى. فەستيۆال ساعات 12:00-دە اشىلىپ، ال كەشكى مۋزىكالىق باعدارلاما 18:00-دە باستالادى.
ۇيىمداستىرۋشىلار قازاقستاندىق ورىنداۋشىلاردى قولداۋعا جانە زاماناۋي ەتنو-ساحنانى دامىتۋعا ەرەكشە ءمان بەرەدى. بيىل فەستيۆال اياسىندا العاش رەت ەتنو، فولك جانە contemporary world music جانرلارىندا ونەر كورسەتەتىن وتاندىق مۋزىكانتتار مەن توپتارعا ارنالعان open call ۇيىمداستىرىلادى. ءوتىنىم فەستيۆالدىڭ رەسمي سايتىندا 26 مامىر مەن 1 ماۋسىم ارالىعىندا قابىلدانادى.
The Spirit of Tengri فەستيۆالى الماتىدا العاش رەت 2013 جىلى ءوتتى، سودان بەرى ول ورتالىق ازياداعى ماڭىزدى مادەني وقيعالاردىڭ بىرىنە اينالدى. 2026 جىلى فەستيۆال حالىقارالىق دەڭگەيدە مويىندالىپ، bema! سىيلىعىنىڭ «حالىقارالىق فەستيۆال» نوميناسياسىندا جەڭىسكە جەتتى.
bema! Best Experience Marketing Awards – وقيعالىق ماركەتينگ پەن كوممۋنيكاسيا (event marketing جانە experience marketing) سالاسىنداعى حالىقارالىق سىيلىق ءارى فەستيۆال.
وتەتىن كۇنى: 7 ماۋسىم 2026 جىل
وتەتىن جەرى: الماتى، اباي الاڭى
كىرۋ تەگىن
