حالىقارالىق بالالاردى قورعاۋ كۇنىنە وراي الماتىدا «الماتى بالاFEST – 2026» قالالىق فەستيۆالىنىڭ فينالدىق كەزەڭى ءوتتى. مەرەكەلىك ءىس-شاراعا قالا اكىمى دارحان ساتىبالدى قاتىستى، - دەپ حابارلايدى alnews.
بيىلعى فەستيۆال مەكتەپ وقۋشىلارىنىڭ سيفرلىق داعدىسىن دامىتۋعا، شىعارماشىلىق قابىلەتىن شىڭداۋعا جانە ەرتە كاسىبي باعدار بەرۋگە ارنالدى. ءىس-شارانىڭ نەگىزگى الاڭى ءاليا مولداعۇلوۆا مەن مانشۇك مامەتوۆا اتىنداعى مەموريالدىق ساياباقتا ۇيىمداستىرىلىپ، وعان شامامەن 5 مىڭعا جۋىق بالا قاتىستى.
قاتىسۋشىلار ءۇشىن جەتى تاقىرىپتىق ايماقتان تۇراتىن ءبىلىم بەرۋ جانە ويىن-ساۋىق كۆەستى ۇيىمداستىرىلدى. وقۋشىلار روبوتوتەحنيكا، عىلىمي زەرتتەۋلەر، مەدياكونتەنت جاساۋ، ساندىك-قولدانبالى ونەر، كيبەرسپورت جانە ەكولوگيالىق جوبالار باعىتتارىمەن تانىستى.
فەستيۆال قوناقتارىنا حالىقارالىق جانە رەسپۋبليكالىق وليمپيادالار مەن بايقاۋلاردىڭ جەڭىمپازدارى جەتەكشىلىك ەتتى. سونىمەن قاتار توتەنشە جاعداي قىزمەتتەرىنىڭ تەحنيكاسى تانىستىرىلىپ، العاشقى مەديسينالىق كومەك كورسەتۋ بويىنشا شەبەردىڭ ساباقتارى مەن كينولوگتاردىڭ ارنايى كورسەتىلىمدەرى ءوتتى.
فەستيۆال الدىندا مەكتەپىشىلىك، اۋداندىق جانە قالالىق كەزەڭدەر ۇيىمداستىرىلىپ، ولار شىعارماشىلىق، سپورتتىق جانە عىلىمي-ينتەللەكتۋالدىق جەتى باعىت بويىنشا وتكىزىلدى. جالپى بايقاۋ باعدارلاماسىنا 240،7 مىڭنان استام وقۋشى قاتىسىپ، ونىڭ 2 571ء-ى قالالىق كەزەڭگە جولداما الدى.
فەستيۆال قورىتىندىسى بويىنشا 1 335 جەڭىمپاز بەن جۇلدەگەر انىقتالىپ، ديپلومدار جانە ەستەلىك سىيلىقتارمەن ماراپاتتالدى. ولاردىڭ قاتارىندا ەرەكشە ءبىلىم بەرۋ قاجەتتىلىگى بار بالالار دا بار.
ايتا كەتەيىك، «بالاFEST» فەستيۆالى الماتىدا 2022 جىلدان بەرى وتكىزىلىپ كەلەدى. جوبا دارىندى بالالاردى قولداۋعا، جاس ۇرپاقتىڭ شىعارماشىلىق جانە زياتكەرلىك الەۋەتىن دامىتۋعا باعىتتالعان.
