الماتى قالاسى اكىمىنىڭ ورىنباسارى ابزال نۇكەنوۆتىڭ توراعالىعىمەن مەملەكەتتىك رامىزدەر جونىندەگى كوميسسيانىڭ كەزەكتى وتىرىسى ءوتتى، - دەپ حابارلايدى alnews.
جيىندا قازاقستان رەسپۋبليكاسىنىڭ مەملەكەتتىك رامىزدەرى كۇنىن مەرەكەلەۋگە دايىندىق بارىسى، مەملەكەتتىك رامىزدەردىڭ قولدانىلۋىنا جۇرگىزىلگەن مونيتورينگ ناتيجەلەرى جانە ولاردى كەڭىنەن ناسيحاتتاۋ ماسەلەلەرى قارالدى.
وتىرىس بارىسىندا مەملەكەتتىك رامىزدەردىڭ ەل تاۋەلسىزدىگى مەن مەملەكەتتىلىگىنىڭ ماڭىزدى نىشاندارى ەكەنى اتاپ ءوتىلدى. مەملەكەتتىك تۋ، ەلتاڭبا جانە ءانۇراننىڭ مارتەبەسىنە ساي قولدانىلۋىن قامتاماسىز ەتۋ، زاڭ تالاپتارىنىڭ ساقتالۋىن تۇراقتى باقىلاۋدا ۇستاۋ – بارلىق مەملەكەتتىك ورگاندار مەن مەكەمەلەردىڭ ورتاق مىندەتى ەكەنى ايتىلدى.
جيىن قورىتىندىسى بويىنشا اۋدان اكىمدەرىنىڭ اپپاراتتارىنا، ءبىلىم جانە دەنساۋلىق ساقتاۋ باسقارمالارىنا مەملەكەتتىك رامىزدەردى پايدالانۋ بارىسىندا انىقتالعان زاڭ بۇزۋشىلىقتاردى جويۋ بويىنشا قاجەتتى شارالاردى قابىلداۋ تاپسىرىلدى. سونىمەن قاتار، ىشكى ساياسات باسقارماسىنا مەملەكەتتىك ورگاندارمەن بىرلەسىپ قوعامدىق مونيتورينگ جۇمىستارىن جالعاستىرۋ مىندەتتەلدى.
كوميسسيا مۇشەلەرى جاستار اراسىندا پاتريوتتىق تاربيەنى كۇشەيتۋ، مەملەكەتتىك رامىزدەردىڭ ءمانى مەن ماڭىزىن تۇسىندىرۋگە باعىتتالعان ءىس-شارالاردى جۇيەلى تۇردە وتكىزۋدىڭ ماڭىزدىلىعىن اتاپ ءوتتى.
وتىرىس قورىتىندىسىندا مەملەكەتتىك رامىزدەردى قۇرمەتتەۋ مادەنيەتىن قالىپتاستىرۋ، ولاردى پايدالانۋ تالاپتارىنىڭ ساقتالۋىن قامتاماسىز ەتۋ جانە تۇرعىندار اراسىندا كەڭىنەن ناسيحاتتاۋ جۇمىستارىن جالعاستىرۋ جونىندە ناقتى تاپسىرمالار بەرىلدى.
