ۇلىتاۋ وبلىسى ەلىمىزدە جاڭا فورماتتاعى Smart Point سيفرلىق حقكو ىسكە قوسىلعان العاشقى ءوڭىر بولدى. بۇل – مەملەكەتتىك قىزمەتتەردى الۋدىڭ ساپاسىن جاڭا دەڭگەيگە كوتەرۋگە باعىتتالعان زاماناۋي ءارى يننوۆاسيالىق كەڭىستىك، - دەپ حابارلايدى alnews.
جوبا حالىقتىڭ سيفرلىق ساۋاتتىلىعىن ارتتىرۋعا، ەلەكتروندىق قىزمەتتەردى وزدىگىنەن پايدالانۋ مادەنيەتىن قالىپتاستىرۋعا جانە ازاماتتار مەن مەملەكەت اراسىنداعى ءوزارا ءىس-قيمىلدىڭ ىڭعايلى، زاماناۋي ءارى تەحنولوگيالىق ورتاسىن دامىتۋعا باعىتتالعان.
اتالعان وقيعانىڭ ماڭىزدىلىعىن ارتتىرا تۇسەتىن جايت – ۇلىتاۋ وبلىسى حالىققا قىزمەت كورسەتۋدىڭ وسى وزىق فورماتىن ەنگىزگەن قازاقستانداعى العاشقى ءوڭىر بولدى. ورتالىقتىڭ اشىلۋى ەلدەگى سيفرلىق ترانسفورماسيا ۇدەرىستەرىنىڭ الدىڭعى قاتارىندا بولۋعا دەگەن ءوڭىردىڭ تالپىنىسىن ايقىنداي ءتۇستى.
جاڭا ورتالىقتىڭ جۇمىسىمەن تانىسۋ ماقساتىندا «ازاماتتارعا ارنالعان ۇكىمەت» مەملەكەتتىك كورپوراسياسى باسقارما ءتوراعاسى ارمان شوقان ۇلى كەنجەعالييەۆ، ۇلىتاۋ وبلىسىنىڭ اكىمى داستان اداي ۇلى رىسپەكوۆ جانە ۇلىتاۋ وبلىسىنىڭ سيفرلىق تەحنولوگيالار باسقارماسىنىڭ باسشىسى ەرمەك جازىلحان ۇلى ارنايى باردى.
«ءبىز تەك جاڭا بۋىنداعى حالىققا قىزمەت كورسەتۋ ورتالىقتارىن اشىپ جاتقان جوقپىز. ءبىز مەملەكەت پەن ازامات اراسىنداعى بايلانىستىڭ جاڭا مادەنيەتىن قالىپتاستىرىپ جاتىرمىز. بۇل اشىقتىققا، زاماناۋيلىققا جانە ادامعا باعدارلانعان جاڭا فورمات. سونىمەن قاتار جۇمىسىمىزدىڭ باستى قاعيداتى وزگەرمەيدى. ول مەملەكەتتىك قىزمەتتەردىڭ ءار ازامات ءۇشىن قولجەتىمدى بولۋى. الداعى ۋاقىتتا Apple Store ۇلگىسىندەگى مۇنداي ورتالىقتار ەلىمىز بويىنشا كەزەڭ-كەزەڭىمەن ەنگىزىلەدى. ينفراقۇرىلىمنىڭ دايىندىعىنا قاراي استانا مەن پاۆلودار قالالارىندا دا ىسكە قوسۋدى جوسپارلاپ وتىرمىز»، – دەدى مەملەكەتتىك كورپوراسيانىڭ باسقارما ءتوراعاسى ارمان كەنجەعالييەۆ.
Smart Point – ازاماتتارعا وپەراتورلاردىڭ كومەگىنسىز مەملەكەتتىك قىزمەتتەردى ءوز بەتىنشە الۋعا مۇمكىندىك بەرەتىن زاماناۋي جوعارى تەحنولوگيالىق كەڭىستىك. مۇنداي ءتاسىل كۇتۋ ۋاقىتىن ەداۋىر قىسقارتىپ قانا قويماي، مەملەكەتتىك سيفرلىق سەرۆيستەردى قولايلى ءارى ءتيىمدى پايدالانۋعا جاڭا مۇمكىندىكتەر اشادى.
ورتالىق بىرنەشە فۋنكسيونالدىق ايماقتان تۇرادى. ولاردىڭ ءارقايسىسى زاماناۋي پايدالانۋشىلاردىڭ قاجەتتىلىكتەرىن ەسكەرە وتىرىپ جاساقتالعان.
ەكسپرەسس-ايماقتا مەملەكەتتىك قىزمەتتەردى وزدىگىنەن الۋعا ارنالعان تەرمينالدار ورناتىلعان. سونىمەن قاتار قۇجاتتاردى مەسسەندجەرلەر مەن باسقا دا سيفرلىق بايلانىس ارنالارى ارقىلى جەدەل جولداۋعا مۇمكىندىك قاراستىرىلعان.
سيفرلىق ايماق سىمسىز قۋاتتاۋ قۇرىلعىلارىمەن جانە جوعارى جىلدامدىقتى سكانەرلەرمەن جابدىقتالعان. بۇل كەلۋشىلەرگە قاجەتتى قۇجاتتاردى جەدەل سيفرلاندىرىپ، مەملەكەتتىك اقپاراتتىق جۇيەلەرگە جۇكتەۋگە مۇمكىندىك بەرەدى.
ساراپتامالىق ايماق كۇردەلى مەملەكەتتىك قىزمەتتەردى مامانداردىڭ سۇيەمەلدەۋىمەن الۋعا ارنالعان.
ەرەكشە نازار سيفرلىق ساۋاتتىلىقتى ارتتىرۋ ايماعىنا اۋدارىلعان. مۇندا ينتەراكتيۆتى ەكران جانە وقىپ-ۇيرەنۋگە ءارى دەمالۋعا قولايلى كەڭىستىك قاراستىرىلعان. تۇرعىندار بۇل جەردە سيفرلىق داعدىلارىن تەگىن جەتىلدىرىپ، جاڭا ەلەكتروندىق سەرۆيستەردى مەڭگەرىپ، سيفرلىق مەملەكەتتىڭ مۇمكىندىكتەرىن سەنىمدى پايدالانا الادى.
بۇگىندە Smart Point – بۇل تەك قىزمەت كورسەتۋدىڭ جاڭا فورماتى عانا ەمەس، تەحنولوگيالار مەن ادامداردىڭ اراسىن جاقىنداتاتىن، ال مەملەكەتتىك قىزمەتتەردى بارىنشا ىڭعايلى، قولجەتىمدى ءارى ءتيىمدى ەتەتىن كەڭىستىك. وسىنداي جوبالاردى ىسكە اسىرۋ ازاماتتاردىڭ ءومىر ءسۇرۋ ساپاسىن ارتتىرۋعا، قوعامداعى سيفرلىق مادەنيەتتى نىعايتۋعا جانە سيفرلىق قازاقستاندى ودان ءارى دامىتۋعا بەرىك نەگىز قالىپتاستىرۋعا ىقپال ەتەدى.
