«قازاقستان» شوكولادى
قازاقستاندا جاسالعان شوكولاد – ەلىمىزدىڭ كونديتەرلىك سالاسىنىڭ بەتكەۇستار ءونىمى. شەت ەلدىك قوناقتارىمىز ءوز جاقىندارىنا ارناپ بۇل ءتاتتىنى ءجيى ساتىپ الادى. دۇكەن سورەلەرىندە شوكولادتى پليتكا تۇرىندە نەمەسە سىيلىق قاپتامادا كەزدەستىرە الاسىز. قازاقستاندىق شوكولادتى ەلىمىزدەگى كەز كەلگەن سۋپەرماركەتتەن نەمەسە فيرمالىق دۇكەندەردىڭ بىرىنەن ساتىپ الاۋعا بولادى.
قۇرت
قۇرت – ورتالىق ازيانى مەكەن ەتكەن كوشپەلى حالىقتاردىڭ داستارحانىنان ورىن تاپقان ايتۋلى ونەرتابىسى، ءنارلى ءقىشقىلسۇتتى ءونىم. قايتالانباس دامگە يە بۇل تاعام قازاق جەرىندە كونە زامانداردان-اق جاقسى بەلگىلى. قۇرت - اپتاپ ىستىقتا تاپتىرماس ازىق، ونىڭ ۇستىنە ەش بۇلىنبەي، ۇزاق ۋاقىت بويى ساقتالادى. سايكەسىنشە الىس-جاقىن جەرلەرگە بازارلىق دەپ قۇرت اپارساڭىز، سىيلىعىڭىزدىڭ جارامدىلىعىنا ەش الاڭداماساڭىز بولادى.
قامشى
ەجەلدەن قامشى كوشپەندىلەر ءۇيىنىڭ مىندەتتى جابدىعى، بيلىك پەن داۋلەتتىڭ بەلگىسى بولىپ تابىلادى. قامشىنى مۇرا رەتىندە اكەدەن بالاعا تابىستاعان. سول سەبەپتى دە ونى كيىز ءۇيدىڭ ەرلەر جايعاسقان بولىگىندەگى كەرەگەگە ءىلىپ قويعان. نانىم-سەنىمگە سۇيەنسەك، قامشى زۇلىمدىق پەن جىن-شايتاننان قورعايدى. تەرىدەن توقىلعان قامشى وتە ادەمى بولادى، جانە ءوزىنىڭ باستاپقى قالپىن ۇزاق جىلدار بويىنا ساقتايدى.
كيىزدەن جاسالعان كيىم-كەشەك پەن كادەسىيلار
بۇگىندە كيىزدىڭ 100% تابيعي قوي جۇنىنەن دە، جاساندى سينتەتيكالىق جىپتەن دە جاسالعان تۇرلەرى بار. كيىزدەن تىگىلگەن كەۋدەشەلەر مەن ءۇي شاركەيلەرى سۋىقتان قورعاپ، دەنساۋلىققا وڭ اسەر ەتەدى. سونىمەن قاتار، زاماناۋي قازاقستاندىق قولونەر شەبەرلەرى كيىزدەن الۋان ءتۇرلى ساندىك زاتتار جاسايدى.
ساندىك كيىز ۇيلەر
ساندىك كيىز ءۇي - كوشپەندىلەر پانالاعان ءۇيدىڭ كىشىرەيتىلگەن كوشىرمەسى. ادەتتە تابيعي كيىزدەن جاسالادى.
كيىز ءۇي – وتباسىلىق بەرەكە جانە ادام مەن تابيعات ۇيلەسىمدىلىگىنىڭ بەلگىسى. مۇنداي كادەسىي ۇلتتىق ناقىشتاعى زاتتاردى ەرەكشە باعالايتىن جاقىندارىڭىزعا ۇنايتىنى ءسوزسىز.
ءداستۇرلى باس كيىمدەر مەن ۇلتتىق كيىمدەر
تاقيا – قازاق حالقىنىڭ قولدانىسىنداعى ەڭ امبەباپ باس كيىم. ونى جاسى دا، كارىسى دە، ەرلەر دە، ايەل ادامدار دە كيگەن. تاقيا ۇلتتىق ويۋ-ورنەكپەن كومكەرىلىپ، مونشاقتارمەن بەزەندىرىلەدى. ماتا رەتىندە جىبەك، بارقىت، شۇعا، ماقتا-ماتا كەزدەمەلەرى قولدانىلادى.
حالقىمىزدا قۇرمەتتى قوناققا شاپان جاۋىپ، قامزول كيگىزىپ، ەرەكشە باعالى كيىم-كەشەكتى سىيعا تارتۋ ءداستۇرى ساقتالعان. وسىنداي سالت-داستۇرلەر قازاقي قوناقجايلىلىقتىڭ شىنايى كورىنىسىن ايقىن بەينەلەيدى. ەگەر قالاۋىڭىز ۇلتتىق سانامىزدى ارقاۋ ەتكەن زاماناۋي كيىم ۇلگىلەرىنە تۇسسە، دارىندى وتاندىق ديزاينەرلەردىڭ تۋىندىلارىن تاڭداساڭىز بولادى. ءارى مۇنداي جوعارى تالعامدى كيىمدەر ءسىزدىڭ قۇرمەتىڭىزدى بىلدىرەتىن كەرەمەت سىيلىق بولماق.
دومبىرا مەن شاڭقوبىز
ۇلى دالادان قۋات العان قازاق ونەرىنىڭ ءبىر بولىگىن سىيعا تارتقىڭىز كەلسە، ۇلتتىق اسپاپتارىمىزعا نازار سالىڭىز.
شاڭقوبىز – كونە قازاق ۇلتتىق مۋزىكالىق اسپابى. ول كولەمى كىشكەنە، تىم نازىك.
ال ەلىمىزدەگى ەڭ كەڭ تارالعان ۇلتتىق اسپاپ – دومبىرا دەسەك، ەش جاڭىلىسپايمىز!
«ناعىز قازاق – قازاق ەمەس، ناعىز قازاق – دومبىرا! ەكى شەكتىڭ ءبىرىن قاتتى، ءبىرىن ءسال-پال كەم بۇرا»،- دەپ حالقىمىز ەرەكشە قاستەرلەيتىن دومبىرا اتام زاماننان قازاق ءۇيىنىڭ تورىنەن ورىن العان. بۇگىندە دومبىرانىڭ كۇمبىرلەگەن كۇيىن تىڭداپ قانا قويماي، سول ءبىر اۋەزدى ەستەلىكتى كىشىگىرىم كادەسىيلارعا سىيدىرىپ، جاقىندارىڭىزبەن بولىسسەڭىز بولادى.
