قازاقستاندا كىتاپ وقۋ مادەنيەتىن دامىتۋداعى جەتىستىكتەرى ءۇشىن بەرىلەتىن ۇلتتىق سىيلىق پايدا بولادى

مەملەكەت باسشىسى "كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى شارالار تۋرالى" جارلىققا قول قويدى، – دەپ حابارلايدى alnews.

ادامي كاپيتالدى دامىتۋ، قوعامنىڭ زياتكەرلىك جانە مادەني الەۋەتىن نىعايتۋ، ءبىلىم بەرۋ، تاربيەلەۋ جانە وقۋ-اعارتۋ ءىسىنىڭ نەگىزگى ەلەمەنتى رەتىندە كىتاپ وقۋ مادەنيەتىن ناسيحاتتاۋ، زەردەلى ۇلت قالىپتاستىرۋ، سونداي-اق شىعارماشىل، جاسامپاز جانە باسەكەگە قابىلەتتى تۇلعانى دامىتۋ ءۇشىن جاعداي جاساۋ ماقساتىندا پرەزيدەنت مادەنيەت، ءبىلىم جانە يننوۆاسيا سالالارىنداعى مەملەكەتتىك ساياساتتىڭ باسىم باعىتتارىن ايقىنداۋدى قاۋلى ەتتى:

• كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ؛

• وقىرماندارعا ارنالعان زاماناۋي ينفراقۇرىلىمدى دامىتۋ: سيفرلىق قۇرالداردى كەڭىنەن قولدانا وتىرىپ، جاڭا فورماتتاعى كىتاپحانالار، قوعامدىق كەڭىستىكتەر قۇرۋ؛

• تۋىندىلارى جاس ۇرپاقتى قازاقستان رەسپۋبليكاسى كونستيتۋسياسىنىڭ نەگىزگى قاعيداتتارى مەن ەرەجەلەرىن قۇرمەتتەۋ رۋحىندا تاربيەلەۋگە ىقپال ەتىپ جۇرگەن وتاندىق جازۋشىلار مەن اقىنداردى قولداۋ؛

• باسپاگەرلەر مەن كىتاپ ءونىمىن تاراتۋشىلاردىڭ مەملەكەت ءۇشىن پايدالى قىزمەتتەرىن ىنتالاندىرۋ؛

• ۇلتتىق ادەبي مۇرانى ەل ىشىندە جانە شەتەلدە ناسيحاتتاۋ.

جارلىقتى ىسكە اسىرۋ ءۇشىن قازاقستان ۇكىمەتىنە ءبىرقاتار تاپسىرما بەرىلدى. ولاردىڭ قاتارىندا — جاڭا فورماتتاعى كىتاپحانالار، كوپفۋنكسيونالدى قوعامدىق كەڭىستىكتەر قۇرۋدى، زاماناۋي اقپاراتتىق جۇيەلەر مەن سەرۆيستەر ەندىرۋدى قوسا العاندا، وقىرمان ينفراقۇرىلىمىن جاڭعىرتۋدى قامتاماسىز ەتۋ بار. سونىمەن قاتار، 2027 جىلعى 1 قاڭتارعا دەيىنمينيسترلەر كابينەتى مىنالاردى ورىنداۋى ءتيىس:

• "كىتاپحانا جانە كىتاپ شىعارۋ ءىسى تۋرالى" جاڭا زاڭ جوباسىن ازىرلەۋ؛

• كىتاپ وقۋ مادەنيەتىن دامىتۋداعى جەتىستىكتەرى ءۇشىن ۇلتتىق سىيلىق تاعايىنداۋ؛

• ءبىرىڭعاي قولجەتىمدى ۇلتتىق سيفرلىق كىتاپحانا پلاتفورماسىن قۇرۋ.

جارلىق قول قويىلعان كۇنىنەن باستاپ قولدانىسقا ەنگىزىلەدى.