الماتى شانحايدا وتكەن ازياداعى ەڭ ءىرى تۋريستىك كورمەلەردىڭ ءبىرى — ITB China 2026-عا قاتىستى. كورمەگە الەمنىڭ تۇكپىر-تۇكپىرىنەن 80-نەن استام ەل مەن 700-دەن استام تۋريستىك كومپانيالار باس قوستى، - دەپ حابارلايدى alnews.
الماتى ستەندى كورمەگە قاتىسۋشىلار مەن قوناقتار ءۇشىن تارتىمدىلىق نۇكتەسىنە اينالدى. كەلۋشىلەردى ۇلتتىق كوستيۋمدەگى باتىرلار قارسى الدى، الاڭدا قازاق مۋزىكاسى شىرقالدى، بي قويىلىمدارى مەن فلەشموبتار ءوتتى، ال قوناقتار الماتىنىڭ مادەنيەتىمەن، گاسترونومياسىمەن جانە تۋريستىك مۇمكىندىكتەرىمەن تانىستى.
كورمە اياسىندا الماتى كومانداسى حالىقارالىق تۋروپەراتورلارمەن، اۆياكومپانيالارمەن جانە تۋريستىك پلاتفورمالارمەن ءبىرقاتار كەزدەسۋلەر وتكىزدى. نەگىزگى باعىت - الماتىنىڭ جۇڭگو نارىعىندا ىلگەرىلەۋى جانە حالىقارالىق تۋريستىك ىنتىماقتاستىقتى كەڭەيتۋ.
سونداي - اق، ITB China 2026 اياسىندا "الماتى قالاسىنىڭ تۋريزم كۇندەرى" ءوتتى، وندا شەتەلدىك سەرىكتەستەرگە تاۋ تۋريزمىنەن مادەني جانە گاسترونوميالىق باعىتتارعا دەيىنگى مەگاپوليستىڭ تۋريستىك باعىتتارى تانىستىرىلدى. ءىس-شارا قورىتىندىسى بويىنشا ىنتىماقتاستىق تۋرالى 5 مەموراندۋمعا قول قويىلدى.
ITB China 2026 - جىل باسىنان بەرى الماتى قاتىساتىن ءۇشىنشى حالىقارالىق تۋريستىك كورمە. بارلىعى 2026 جىلى قالا تۋريستىك الەۋەتتى توعىز حالىقارالىق الاڭدا جانە روۋد-شوۋدا كورسەتۋدى جوسپارلاپ وتىر.
قىتايدىڭ الماتىعا دەگەن قىزىعۋشىلىعى ارتىپ كەلەدى. 2025 جىلدىڭ قورىتىندىسى بويىنشا جۇڭگو رەسەيدەن كەيىن الماتىعا بارۋ ءتۋريزمى بويىنشا ەكىنشى ورىنعا يە بولدى-قالاعا قحر-دان 136،4 مىڭ تۋريست كەلدى.
ITB China 2026-عا قاتىسۋ الماتىنىڭ ورتالىق ازياداعى جەتەكشى تۋريستىك ورتالىقتاردىڭ ءبىرى رەتىندەگى حالىقارالىق بەدەلىن نىعايتۋداعى تاعى ءبىر قادام بولدى.
