الماتىنىڭ مەدەۋ اۋدانىنداعى سامال-3 شاعىناۋدانى، 21ء-ۇيدىڭ قاسبەتىنە كسرو حالىق ءارتيسى، اتى اڭىزعا اينالعان ءانشى روزا باعلانوۆانىڭ بەينەسى سالىنعان مۋرال سالىندى، - دەپ حابارلايدى alnews.
مۋرال تۇرعىنداردىڭ اكىمدىككە جاساعان ءوتىنىشى نەگىزىندە جۇزەگە اسىرىلدى. وسىدان كەيىن كوركەم نىساندى جاساۋ جۇمىستارى ۇيىمداستىرىلعان. جوبانىڭ ەرەكشە ماڭىزدىلىعى — روزا باعلانوۆانىڭ كەزىندە ءدال وسى ۇيدە تۇرعانىندا. ەندى عيمارات قاسبەتى ۇلى ونەر يەسىنە دەگەن قۇرمەت پەن تاعزىمنىڭ سيمۆولىنا اينالدى.
جوبانى دايىنداۋ جانە جۇزەگە اسىرۋ جۇمىستارىنا روزا باعلانوۆانىڭ كەلىنى مارال باعلانوۆا دا قاتىسقان. ول اتقارىلعان جۇمىسقا جوعارى باعا بەرىپ، جوبانى جۇزەگە اسىرعان ازاماتتارعا العىس ءبىلدىردى.
وسىلايشا، حالىق ءارتيسىنىڭ جارقىن بەينەسى ەندى حالىق جادىندا ءارى ۇلتتىق ونەر تاريحىندا عانا ەمەس، الماتى قالاسىنىڭ ساۋلەتتىك كەلبەتىندە دە ماڭگىلىككە ساقتالماق.
