الماتىدا «جاسىل ەل» جاستار ەڭبەك جاساقتارىنىڭ جاڭا ماۋسىمى باستالدى. 2026 جىلى جوبا اياسىندا 2100 ءجاسوسپىرىم مەن جاستى جۇمىسپەن قامتۋ جوسپارلانىپ وتىر. بۇل تۋرالى وڭىرلىك كوممۋنيكاسيالار قىزمەتىندە الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك مالىمدەدى.
سپيكەردىڭ ايتۋىنشا، بۇگىندە الماتى ەلدەگى جاستار ەڭ كوپ شوعىرلانعان قالا. قالاداعى جاستار سانى 769 مىڭنان اسادى. ونىڭ ىشىندە 472،8 مىڭى — جۇمىس ىستەيتىن جاستار، 307،8 مىڭنان استامى — جوعارى وقۋ ورىندارى مەن كوللەدج ستۋدەنتتەرى، ال 80 مىڭعا جۋىعى — جوعارى سىنىپ وقۋشىلارى.
«جاسىل ەل» جوباسى 2005 جىلدان بەرى جۇزەگە اسىرىلىپ كەلەدى. ونىڭ ماقساتى — ەكولوگيالىق مادەنيەتتى قالىپتاستىرۋ، ەڭبەك داعدىسىن دامىتۋ جانە جاستاردى قوعامدىق پايدالى جۇمىستارعا تارتۋ.
«مەملەكەت باسشىسى قاسىم-جومارت توقايەۆ جاستاردى قولداۋعا جانە ەكولوگيالىق جاۋاپكەرشىلىكتى قالىپتاستىرۋعا ەرەكشە كوڭىل بولەدى. «جاسىل ەل» جوباسى «تازا قازاقستان» جالپىۇلتتىق باستاماسىنىڭ مىندەتتەرىنە تولىق سايكەس كەلەدى جانە جاستاردى قالانى دامىتۋعا تارتۋعا كومەكتەسەدى»، — دەدى ازيز كاجدەنبەك.
ونىڭ ايتۋىنشا، 2025 جىلى الماتى «جاسىل ەل» جوباسىن جۇزەگە اسىرۋ بويىنشا ەلىمىزدەگى ۇزدىك ءوڭىر دەپ تانىلدى. وتكەن ماۋسىمدا ماۋسىمدىق جۇمىسپەن قامتۋ باعدارلاماسى اياسىندا 2،1 مىڭ جاس جۇمىسقا تارتىلعان. بيىل العاش رەت جوباعا جوعارى وقۋ ورىندارىنىڭ ستۋدەنتتەرىمەن قاتار كوللەدج ستۋدەنتتەرى مەن NEET ساناتىنداعى جاستار دا قاتىستى.
الماتى قالاسى بويىنشا «جاسىل ەل» جوباسىنىڭ جەتەكشىسى ەرداۋلەت جۇنىسبەك جاستار ەڭبەك جاساقتارى جىل سايىن قالانى كوگالداندىرۋعا، اۋماقتاردى سانيتارلىق تازالاۋعا، قوعامدىق كەڭىستىكتەردى كورىكتەندىرۋگە جانە ەكولوگيالىق اكسيالارعا قاتىساتىنىن ايتتى.
«كوپتەگەن قاتىسۋشى ءۇشىن جوبا العاشقى ەڭبەك تاجىريبەسىن الۋعا، قوعامدىق قىزمەتتە ءوزىن كورسەتۋگە جانە الماتىنىڭ دامۋىنا ۇلەس قوسۋعا مۇمكىندىك بەرەدى»، — دەدى ەرداۋلەت جۇنىسبەك.
جوباعا 14 پەن 35 جاس ارالىعىنداعى وقۋشىلار، ستۋدەنتتەر جانە جۇمىسسىز جاستار قاتىسا الادى. بارلىق قاتىسۋشى ارنايى «جاسىل ەل» فورماسىمەن قامتاماسىز ەتىلەدى.
«ءبىزدىڭ ماقساتىمىز — جاستاردى ۋاقىتشا جۇمىسپەن قامتىپ قانا قويماي، بەلسەندى ازاماتتىق ۇستانىمدى، ەكولوگيالىق مادەنيەتتى جانە قالالىق ورتاعا دەگەن جاۋاپكەرشىلىك سەزىمىن قالىپتاستىرۋ»، — دەدى ازيز كاجدەنبەك.
ەرداۋلەت جۇنىسبەكتىڭ ايتۋىنشا، ەڭبەك ماۋسىمى 30 قىركۇيەككە دەيىن جالعاسادى، ال «جاسىل ەل» جاڭا ماۋسىمى 2 ماۋسىمدا سالتاناتتى تۇردە اشىلادى.
جوباعا ءوتىنىمدى وفلاين فورماتتا سەرىكوۆ كوشەسى، 6ا/1 مەكەنجايى بويىنشا تاپسىرۋعا بولادى. وقۋشىلارعا قاتىسۋ ءۇشىن وقۋ ورنىنداعى الەۋمەتتىك پەداگوگكە جۇگىنۋ قاجەت.
جاستار ساياساتى باسقارماسى وكىلدەرىنىڭ مالىمەتىنشە، بيىل جاستاردى قامتۋ اياسىن كەڭەيتىپ، «جاسىل ەل» جاساقتارىنىڭ قاتىسۋىمەن وتەتىن ەكولوگيالىق جانە قوعامدىق باستامالار سانىن ارتتىرۋ جوسپارلانىپ وتىر.
