وسى دەمالىس كۇندەرى الماتىنىڭ تۇركسىب اۋدانىندا رىسقۇلوۆ داڭعىلى مەن ايتىقوۆ كوشەسىنىڭ قيىلىسىندا جاڭا دەمالىس كۇنگى جارمەڭكە اشىلادى، - دەپ حابارلايدى alnews.
جارمەڭكەدە الماتى وبلىسى رايىمبەك اۋدانىنىڭ اۋىل شارۋاشىلىعى تاۋارىن وندىرۋشىلەرى ءوز ءونىمىن ۇسىنادى. فەرمەرلىك شارۋاشىلىقتاردىڭ تىكەلەي قاتىسۋى تۇرعىنداردى دەلدالسىز، قولجەتىمدى باعامەن ساپالى ازىق-تۇلىكپەن قامتاماسىز ەتۋگە مۇمكىندىك بەرەدى. كەلۋشىلەر سيىر، جىلقى جانە قوي ەتىن، سونداي-اق كارتوپ، ءسابىز، پياز، قىرىققابات، قيار، قىزاناق پەن المانى قوسا العاندا كوكونىس پەن جەمىس-جيدەكتى ساتىپ الا الادى. سونىمەن قاتار جارمەڭكەدە ءسۇت ونىمدەرى، باكالەيا تاۋارلارى، جۇمىرتقا، شۇجىق ونىمدەرى، بال، نان-توقاش جانە كونديتەرلىك ونىمدەر، كەپتىرىلگەن جەمىستەر مەن ءۇي جاعدايىندا دايىندالعان نان-توقاش ونىمدەرى ۇسىنىلادى.
جارمەڭكەنىڭ اشىلۋى الماتىنىڭ بارلىق اۋدانىندا دەمالىس كۇنگى جارمەڭكەلەر جەلىسىن كەزەڭ-كەزەڭىمەن كەڭەيتۋ اياسىندا جۇزەگە اسىرىلۋدا. قازىرگى ۋاقىتتا مۇنداي جارمەڭكەلەر اۋەزوۆ، المالى، مەدەۋ، بوستاندىق جانە جەتىسۋ اۋداندارىندا جۇمىس ىستەيدى. ۇيىمداستىرۋشى ءارى اكىمشىسى – «الماتى» اكك.
سونىمەن قاتار «الماتى» اكك دەمالىس كۇنگى جارمەڭكەلەردى كەزەڭ-كەزەڭىمەن جاڭعىرتۋ جۇمىستارىن جالعاستىرۋدا. قازىرگى ۋاقىتتا جۇمىس بوستاندىق اۋدانىنداعى قازاقفيلم شاعىناۋدانىندا جۇرگىزىلۋدە. جاڭارتىلعان جارمەڭكەنىڭ رەسمي اشىلۋى بيىلعى تامىز ايىنا جوسپارلانعان. سونداي-اق جاڭعىرتۋ جۇمىستارى اۋەزوۆ اۋدانىندا دا جالعاسۋدا. وسىعان بايلانىستى اۋەزوۆ اۋدانىنداعى جارمەڭكە ۋاقىتشا رىسقۇلبەكوۆ كوشەسى، 33/2 مەكەنجايىنا كوشىرىلدى.
جاڭعىرتۋ جۇمىستارى ساۋدا الاڭدارىن كەشەندى جاڭارتۋدى كوزدەيدى. ونىڭ اياسىندا ىرگەلەس اۋماق كوركەيتىلىپ، سانيتارلىق ينفراقۇرىلىم جاڭعىرتىلادى، ساۋدا كونسترۋكسيالارى اۋىستىرىلىپ، ينجەنەرلىك جەلىلەر تارتىلادى. كاسىپكەرلەر مەن كەلۋشىلەر ءۇشىن قولايلى جاعداي جاساۋعا، سونداي-اق نىسانداردى قولدانىستاعى زاڭناما تالابى مەن الماتى قالاسىنىڭ ديزاين-كودىنا سايكەستەندىرۋگە ەرەكشە نازار اۋدارىلادى.
دەمالىس كۇنگى جارمەڭكە ءار سەنبى جانە جەكسەنبى ساعات 09:00-دەن 18:00-گە دەيىن مىنا مەكەنجايلاردا وتەدى:
- بوستاندىق اۋدانى – قازاقفيلم شاعىناۋدانى؛
- اۋەزوۆ اۋدانى – رىسقۇلبەكوۆ كوشەسى، 33/2؛
- مەدەۋ اۋدانى – مەڭدىقۇلوۆ جانە بەكتۇروۆ كوشەلەرىنىڭ قيىلىسى؛
- المالى اۋدانى – ماسانچي كوشەسى، ايتەكە بي مەن گوگول كوشەلەرىنىڭ ارالىعى؛
- جەتىسۋ اۋدانى – قۇلاگەر شاعىناۋدانى؛
- تۇركسىب اۋدانى – رىسقۇلوۆ داڭعىلى مەن ايتىقوۆ كوشەسىنىڭ قيىلىسى.
