الماتىلىق بوكسشى مارال تولەپبەرگەن داكاردا (سەنەگال) ءوتىپ جاتقان IV جازعى جاسوسپىرىمدەر وليمپياداسىنىڭ قولا جۇلدەگەرى اتاندى، - دەپ حابارلايدى alnews.
قازاقستان قۇراماسى ساپىندا 54 كەلىگە دەيىنگى سالماق دارەجەسىندە ونەر كورسەتكەن سپورتشى ەكى كەزدەسۋدە جەڭىسكە جەتىپ، وليمپيادا تۇعىرىنا كوتەرىلدى. بۇل تۋرالى الماتى قالاسى سپورت باسقارماسىنىڭ وكىلدەرى ايتتى.
مارال جارىستاعى العاشقى جەڭىسىنە 8 قاراشادا قول جەتكىزدى. ول ۇلىبريتانيا وكىلى دجايا كالسيدەن ءۇش راۋند قورىتىندىسى بويىنشا 3:1 ەسەبىمەن باسىم ءتۇستى.
10 قاراشادا وتكەن شيرەك فينالدا الماتىلىق بوكسشى مىسىرلىق حادجەر ەلشەربيني ۆاحبامەن قولعاپ ءتۇيىستىردى. بەس تورەشىنىڭ دە شەشىمى قازاقستاندىق سپورتشىنىڭ پايداسىنا شەشىلدى. مارال 5:0 ەسەبىمەن جەڭىسكە جەتىپ، جارتىلاي فينالعا جولداما الدى. وسىلايشا، ونىڭ كەم دەگەندە قولا مەدال يەلەنەتىنى بەلگىلى بولدى.
11 قاراشادا فينالعا شىعۋ ءۇشىن وتكەن كەزدەسۋدە مارال وزبەكستان وكىلى سابرينا چاكومونوۆامەن كەزدەستى. بۇل جولى قارسىلاسى 5:0 ەسەبىمەن جەڭىسكە جەتتى. الماتىلىق بوكسشى جاسوسپىرىمدەر وليمپياداسىن قولا مەدالمەن اياقتادى.
IV جازعى جاسوسپىرىمدەر وليمپياداسى 31 قازان مەن 13 قاراشا ارالىعىندا سەنەگالدا ءوتىپ جاتىر. بۇل افريكا قۇرلىعىندا العاش رەت ۇيىمداستىرىلعان وليمپيادا ويىندارى. جارىستا قازاقستان اتىنان سپورتتىڭ 11 تۇرىنەن 18 سپورتشى ب ا ق سىناپ جاتىر.
