الماتى ىسكەرلىك ءتۋريزمنىڭ حالىقارالىق نارىعىنداعى ورنىن نىعايتىپ، ءىرى كونگرەس، فورۋم مەن كونفەرەنسيا وتكىزۋ مۇمكىندىگىن كەڭەيتىپ كەلەدى، - دەپ حابارلايدى alnews.
8-11 قاراشا ارالىعىندا پاناما-سيتيدە وتكەن حالىقارالىق كونگرەستەر مەن كونۆەنسيالار قاۋىمداستىعىنىڭ (ICCA) 65ء-شى جىل سايىنعى كونگرەسىندە Almaty Tourism Bureau وكىلدەرى مەگاپوليستىڭ تۋريستىك جانە ىسكەرلىك ينفراقۇرىلىمىن تانىستىردى. بۇل تۋرالى الماتىنىڭ تۋريزم باسقارماسىنىڭ وكىلدەرى ايتتى.
بيىلعى كونگرەسكە 80-نەن استام ەلدەن 1 مىڭنان استام مامان جانە 100-دەن استام حالىقارالىق قاۋىمداستىقتىڭ وكىلدەرى قاتىستى. مۇنداي باسقوسۋلار حالىقارالىق ءىس-شارالاردى قاي قالادا وتكىزۋ جونىندە شەشىم قابىلدايتىن ۇيىمدارمەن تىكەلەي بايلانىس ورناتۋعا مۇمكىندىك بەرەدى.
Almaty Tourism Bureau ماماندارى Visit Almaty برەندىمەن شەتەلدىك سەرىكتەستەرمەن كەزدەسىپ، حالىقارالىق كونفەرەنسيالار مەن فورۋمداردى الماتىدا وتكىزۋ مۇمكىندىكتەرىن تانىستىرۋدا. اسىرەسە، مەديسينا، عىلىم، تەحنولوگيا، بيزنەس جانە يننوۆاسيا سالالارىنداعى ءىس-شارالاردى قالاعا تارتۋعا باسىمدىق بەرىلگەن.
2025 جىلدىڭ قورىتىندىسى بويىنشا الماتى ICCA الەمدىك رەيتينگىندە بىردەن 10 ساتىعا جوعارىلادى. قالادا وتكەن حالىقارالىق ءىس-شارالاردىڭ جالپى ەكونوميكالىق اسەرى شامامەن 2،94 ملن اقش دوللارى بولدى. ءار ءىس-شارا قالا ەكونوميكاسىنا ورتا ەسەپپەن 327 مىڭ دوللار كىرىس اكەلگەن. ال حالىقارالىق قاتىسۋشىلاردىڭ ءارقايسىسى ورتا ەسەپپەن 1 210 دوللار جۇمساعان.
2027 جىلى حالىقارالىق كاسىبي قاۋىمداستىقتارمەن بايلانىستى نىعايتىپ، الماتىدا وتكىزۋگە بولاتىن ءىرى ءىس-شارالاردى انىقتاۋ جانە ولاردى قالادا ۇيىمداستىرۋعا ءوتىنىم بەرۋ جوسپارلانىپ وتىر.
جاڭا ىسكەرلىك ءىس-شارالاردى تارتۋ شەتەلدىك قوناقتار سانىن ارتتىرىپ، قوناق ۇيلەر مەن مەيرامحانالاردىڭ قىزمەتىنە سۇرانىستى كوبەيتۋگە، سونداي-اق قازاقستاندىق جانە شەتەلدىك ماماندار اراسىنداعى كاسىبي بايلانىستى كەڭەيتۋگە جول اشادى.
