بالالار كولياسكاسىمەن اۆتوبۋستارعا كىرۋگە تىيىم سالىنعانى تۋرالى تارالىپ جاتقان مالىمدەمەلەر شىندىققا سايكەس كەلمەيدى، - دەپ حابارلايدى alnews.
ق ر كولىك مينيسترلىگىنىڭ مالىمەتىنشە، قولدانىستاعى قاعيدالار اتا-انالاردىڭ بالالار كولياسكاسىمەن قوعامدىق كولىكتە جۇرۋىنە تىيىم سالمايدى.
اۆتوموبيل كولىگىمەن جولاۋشىلار مەن باگاجدى تاسىمالداۋ قاعيدالارىنا ەنگىزىلگەن وزگەرىستەرگە سايكەس، اۆتوبۋس سالونى شامادان تىس تولعان جاعدايدا، اتا-اناعا ارنالعان بوس ورىن بولعان كەزدە بالالار كولياسكاسىن جينالعان كۇيدە الىپ ءجۇرۋ كوزدەلگەن. بۇل رەتتە كولياسكا جولاۋشىلاردىڭ ەركىن قوزعالۋىنا كەدەرگى كەلتىرمەۋى ءتيىس.
اتالعان تالاپ جولاۋشىلاردىڭ، ونىڭ ىشىندە بالالار مەن ولاردى الىپ جۇرەتىن اتا-انالاردىڭ قاۋىپسىزدىگىن قامتاماسىز ەتۋگە، سونداي-اق اۆتوبۋس سالونىنداعى ەركىن ءوتۋ جولىن ساقتاۋعا باعىتتالعان.
ەگەر اتا-اناعا بالالار كولياسكاسىن جيناۋ قولايسىز بولسا، ول ساپارىن كولياسكانى جايىلعان كۇيىندە جالعاستىرا الادى.
بۇل رەتتە ايىپپۇل سالۋ، جولاۋشىنى اۆتوبۋستان ءتۇسىرۋ نەمەسە وزگە دە سانكسيالار قولدانۋ كوزدەلمەگەن.
