الماتىدا ساندىك گۇلدەرمەن بەزەندىرىلگەن اۋماقتاردىڭ جالپى كولەمى 410 مىڭ شارشى مەتردەن استى. بۇل وتكەن جىلمەن سالىستىرعاندا 77%-عا كوپ. ءبىرجىلدىق گۇلدەردىڭ سانى 2،7 ميلليوننان 4،3 ميلليونعا دەيىن، ال راۋشان گۇلدەرى 125 مىڭنان 580 مىڭعا دەيىن ارتتى. بۇل تۋرالى Eco Almaty ماماندارى ايتتى.
ەڭ ءىرى گۇل القاپتارى ەسەنتاي وزەنىنىڭ جاعالاۋىندا – 20 مىڭ شارشى مەتر، سايران سۋ قويماسى بويىندا – 15 مىڭ شارشى مەتر جانە Halyk Arena ماڭىندا 7 مىڭ شارشى مەتردەن استام اۋماقتا جاسالدى.
قالالىق اۋماقتاردى بەزەندىرۋ كەزىندە ماماندار الماتىنىڭ كليماتتىق ەرەكشەلىگىن، وسىمدىكتەردىڭ گۇلدەۋ مەرزىمىن، اپتاپ ىستىققا توزىمدىلىگىن، كۇتىم جاساۋ تالاپتارىن جانە ءوزارا ۇيلەسىمىن ەسكەردى. كوشەلەرگە، ساياباقتارعا، سكۆەرلەرگە، جولايرىقتارعا جانە سۋبۇرقاقتار ماڭىنا شىرايگۇل، بارقىتگۇل، بەگونيا، سالۆيا، سينەراريا، اقساۋلە، گازانيا، كاننا، كاتارانتۋس جانە باسقا دا ساندىك وسىمدىكتەر ەگىلدى.
جۇمىستىڭ ەرەكشە باعىتتارىنىڭ ءبىرى – كولەمدى گۇل كومپوزيسيالارىن جاساۋ بولدى. «تاۋلى قىرات» شاعىناۋدانىنداعى ەسەنتاي وزەنىنىڭ جاعالاۋىندا بيىكتىگى 2،5 مەتر بولاتىن تاۋىس بەينەسىندەگى توپياريي ورناتىلدى. كومپوزيسيا سەرۋەن ايماعى بويىمەن 30 مەترگە سوزىلىپ جاتىر. ونىڭ گۇلدەن جاسالعان «قاۋىرسىندارى» سەلوزيا، شىرايگۇل، سينەراريا جانە التەرنانتەرا وسىمدىكتەرىنەن قۇرالعان.
سونداي-اق مۇندا تاعى ەكى كولەمدى كومپوزيسيا – «قار بارىسى» مەن «الما» ورنالاستىرىلادى. بيىكتىگى 1،8 مەتر، ۇزىندىعى 4،3 مەتر بولاتىن قار بارىسىنىڭ ءمۇسىنىن بەزەندىرۋگە 3،5 مىڭ سينەراريا مەن التەرنانتەرا وسىمدىگى پايدالانىلدى. ال بيىكتىگى 2،4 مەتر، ەنى 2،5 مەتر بولاتىن گۇلدەن جاسالعان «الما» كومپوزيسياسى 1،5 مىڭ شىرايگۇلدەن قۇراستىرىلدى.
ەسەنتاي وزەنىنىڭ جاعالاۋىندا جالپى اۋماعى 20 مىڭ شارشى مەتردى قامتيتىن كەشەندى كوگالداندىرۋ جۇمىستارى جۇرگىزىلدى. مۇندا جاپونگۇل، قىزىلكۇرەڭ، سارانا، فلوكس، كوكجالبىز، ۆەيگەلا، التىنشار، لاۆاندا، قويانتاماق، تالقۋراي، راۋشان، كوپىرشىكتى بۇتا، سونداي-اق قىزعالداق، ءسۇمبىل جانە لالاگۇل ەگىلدى.
سونىمەن قاتار جاعالاۋعا 241 ۇساق جاپىراقتى جوكە، 198 فريمان ۇيەڭكىسى، 50 گينكگو بيلوبا جانە 25 ساندىك المۇرت اعاشى ەگىلدى. سەرۋەندەۋگە ارنالعان جالپى اۋماعى 3 650 شارشى مەتر ەكوسوقپاق سالىندى.
گۇلدەن جاسالعان وزگە ارت-كومپوزيسيالار شۇعىلا شاعىناۋدانىندا، «الاتاۋ» شيپاجايى ماڭىندا، سابدەنوۆ كوشەسىندە جانە اباي داڭعىلىندا دا ورنالاستىرىلدى.
اپتاپ ىستىق كۇندەرى جاسىل جەلەك كەشكى جانە تۇنگى ۋاقىتتا سۋارىلادى. قالانىڭ جاسىل ايماقتارىن كۇتىپ ۇستاۋعا كۇن سايىن 140-تان استام ارنايى تەحنيكا مەن 400-دەن استام قىزمەتكەر جۇمىلدىرىلادى.
