Qaterli isik qazirgi zamannyń eń aýyr aýrýlarynyń biri jáne onyń belgilerin erte satysynda anyqtap, ýaqytyly em-dom qabyldaý mańyzdy ról atqarady.
Mamandar sózine súıensek, medısınalyq tekserýler men taldaýlar qaterli isik aýrýyn anyqtaýdyń negizgi ádisi bolǵanymen, syrtqy túrdegi keıbir ózgerister de onyń damý yqtımaldyǵyn kórsetýi múmkin. Sondyqtan, máselen, teridegi keıbir ózgerister qaterli isiktiń birinshi belgisi bolýy múmkin.
«Teride jańa meńniń paıda bolýy, burynnan bar meń mólsheriniń ne pishininiń ózgerýi, assımetrıa, jıegi ne túsiniń ózgerýi teri qaterli isiginiń damýynyń kórsetkishi bolýy múmkin. Sonymen qatar, uzaq ýaqyt boıy jazylmaıtyn kez kelgen jara men oıyq jaraǵa nazar aýdaryńyz. Ásirese, odan qan ketse ne qońyr tústi bolsa. Sút beziniń pishini nemese kóleminiń ózgerýi sút bezi qaterli isiginiń kórsetkishi bolýy múmkin. Túzilimdi anyqtaý, emizik pishininiń ózgerýi, onyń tartylýy ne bólinistiń shyǵýy qaýipti belgi bolýy yqtımal», – deıdi Almaty onkologıalyq ortalyǵynyń onkolog-dárigeri Naılá Aqjolova.
Naqty sebepsiz, kenetten salmaq joǵaltý, sondaı-aq basqa sebeppen túsindirýge bolmaıtyn uzaq sharshaý nemese álsizdik qaterli isiktiń damý yqtımaldyǵynyń sıgnaly bolýy múmkin. Zárdegi, qandaǵy nemese nájistegi ózgerister de mán beretin jaǵdaı. Máselen, zárdegi nemese nájistegi qan ne zárdiń ıisi ne túsiniń erekshe ózgerisi baıypty túrde qabyldanyp, dárigermen talqylanýy kerek.
«Árıne, qaterli isiktiń damý yqtımaldyǵyn kórsetetin syrtqy belgiler týraly oılaǵan kezde, olar medısınalyq tekserýlermen jáne synaqtarmen birge aýrýdy erte kezeńde anyqtaýǵa kómektesetinin este ustaǵan jón. Bul sátti emdeý múmkindigin aıtarlyqtaı arttyrady. Ózin-ózi kútý, únemi medısınalyq tekserýden ótý jáne dárigerge ýaqytyly kóriný densaýlyqty saqtaýdyń jáne qaterli isikpen kúresýdiń mańyzdy quramdas bóligi bolyp tabylady», – deıdi Naılá Burhandınqyzy.
