«Kók tóbe» telemunarasy Kezekti almatylyq sáýlet keremeti – «Kók tóbe». Naqty tehnıkalyq qyzmet atqarý maqsatynda boı kótergen munara, kórnekti dızaıny men bıiktiginiń arqasynda kútpegen jerden Almatynyń asa tanymal rámizderiniń qataryna qosyldy.Telemunaranyń qurylysyna óz zamanynyń bar ınovasıalary jumyldyryldy.
Sazdy jerge ornatylǵan 372 metrlik munaranyń turaqtylyǵyn qamtamasyz etý úshin salmaǵy 45 myń tonnany quraıtyn betondy negiz quıyldy. Jalpy qurylys salmaǵy 50 myń tonna ekendigin eskersek, shynymen tańqalarlyq jaıt ekenin ańǵaramyz!Maıatnıktik terbelisterdi báseńdetkish júıe qoldanylatyndyqtan, telemunara kúshti jelderge ońaı tótep berip, 10 baldyq jer silkinisin eńsere alatyn turaqtylyqqa ıe.
«Kók tóbe» elimizdegi eń bıik qurylystar qatarynda ekinshi orynǵa jaıǵasqan.
Kólsaı kólderi teńiz deńgeıinen 1818, 2252 jáne 2850 metr bıiktikte "Kólsaı kólderi" ulttyq saıabaǵynyń aýmaǵynda ornalasqan. Qaıyńdy kóli Kólsaı kólderiniń shyǵysyna qaraı 12 shaqyrym qashyqta ornalasqan, uzyndyǵy 400 metrge sozylyp jatyr. Bir jeksenbilik saparda Tómengi Kólsaı jáne Qaıyńdy kólderine baryp úlgerýge bolady. Joǵarǵy Kólsaı (úshinshi kól) ekinshisinen 4 shaqyrym shalǵaı jáne 600 metrge joǵary ornalasqan, oǵan kóterilý úshin kóp ýaqyt pen jaqsy fızıkalyq daıyndyq qajet. Kólsaı – jaıaý jáne atty joryqtar, taý velosıpedterimen saıahattaý úshin tamasha oryn.
Qaıyńdy kóli júz jyl buryn shatqaldy qorshap turǵan tabıǵı bóget retinde qalyptasyp qalǵan taý jynystarynyń aýqymdy qoparylysy nátıjesinde paıda boldy. Sý betinen shyǵyp turǵan shyrshalardyń qurǵaq dińgekteri kóldi qorǵaýshy qaraýyl syńaıly. Kól jan-jaǵynan tasty taý betkeıleri men bıik jartastarmen qorshalǵan. Odan joǵaryraqta jartasty tyǵyryqqa ushyrasýǵa bolady, sol sebepti kólge kólikpen jetýdiń jalǵyz ǵana joly bar.
Kók TóbeTelemunaranyń túbinde serýendeý men kóńil kóterýge arnalǵan ásem saıabaq ornalasqan. Onda shaǵyn zooparkty tamashalaýǵa, Bıttlz tobymen sýretke túsýge, atraksıon tebýge, áınekti labırıntke kirýge, arqandy parkpen sekirýge bolady. Ekstremaldy súıetinder Fast Coaster shanalarymen 45 km/saǵat jyldamdyqpen tómen quldılaý múmkindigine ıe. Árıne, Kóktóbege shyqqan soń, teńiz deńgeıinen 1130 metr bıiktiktegi sholý dońǵalaǵyna minip, qalany alaqanǵa salǵandaı tamashalamaı qaıtýǵa bolmaıdy!
Sharyn shatqaly – Almaty oblysyndaǵy eń qyzyqty tabıǵı nysandardyń biri. Shatqal shógindi jynystardan turady, olardyń jasy shamamen 12 mıllıon jyl! Kún uıasyna batar sátte shatqal qabyrǵalary tańqalarlyq reńkterge boıalady. Týrıserdiń eń kóp baratyn jeri - "Qorǵandar ańǵary". Sharyn shatqaly Soltústik Amerıkadaǵy Koloradonyń úlken shatqalyna (Grand Canyon) uqsas keledi. Sharyn amerıkandyq egizinen kishirek, desek te «Qorǵandar ańǵary» ózine ǵana tán qaıtalanbas sulýlyǵymen erekshelenedi. Sondaı-aq, relıkti shaǵan toǵaıy saqtalǵan «Temirlik», «Aıly alqap» jáne «Qurtoǵaı» shatqaldarynyń keremet kórinisterinen qur qalmaýǵa keńes beremiz.
Úlken Almaty kóline Almatyǵa jol tartsańyz mindetti túrde İle-Alataýy ulttyq parkiniń bir bóligi bolyp tabylatyn Úlken Almaty kóline barýǵa keńes beremiz. Kóldiń jaǵasyna qaraı salynǵan tasjol bul tabıǵat keremetin kóremin deýshiler sanynyń eselep ósýine sebep boldy. Sodan da bolar, keıde izdep kelgen tynyshtyqty tabý qıynǵa soǵady. Degenmen, bul jaǵdaı Úlken Almaty kóliniń sulýlyǵy syılaıtyn lázzattyń janynda tym mardymsyz kórinedi! Taý bókterinde tamyry ańyzdarmen astasyp jatqan ásem eńlikgúlder ósedi. Al jan-jaǵyńyzǵa nazar salyp qarasańyz, óte sırek kezdesetin ımektumsyq qustardy baıqaısyz.
Shymbulaq Taý bıigindegi kýrort almatylyqtar men ońtústik astana qonaqtarynyń súıikti belsendi demalys orny bolyp tabylady. 20 shaqyrymǵa sozylyp jatqan trassa shańǵy men snoýbord tepkisi keletinderdi kútedi. Qysta Fanparkte 14 trassa jáne oqytý bókteri jumys isteıdi. Keshende syrǵanaq tebý qıyndyǵyna qaraı 5 «qara» trassa (saraptama deńgeıi), 6 «qyzyl» trassa (ozattardyń deńgeıi), 3 «kók» trassa (orta deńgeı) bar. Al syrǵanaýdy endi ǵana úırenip jatqandar úshin oqytý bókteri («jasyl» trassa) qyzmet kórsetedi.
Medeý— teńiz deńgeıinen 1691 metr bıiktikte, Qazaqstannyń «ońtústik astanasy» – Almaty qalasynyń mańynda, «Shymbulaq» taý kýrortynan sál tómenirek, Medeý shatqalynda ornalasqan bıik taýdaǵy sport kesheni.Medeý taýynyń 842 baspaldaǵymen kóterilgennen keıin taýdyń basynan Almatynyń panoramalyq kórinisin tamashalaýǵa bolady.
