Jutqa baılanysty aýdan ákimi Qanat Qojyqaev jaýap berdi.
Eń birinshiden, qys sońynda oryn alǵan qıynshylyqqa qatysty aýdandyq shtab qurylyp, tıisti mekemeler, kent, aýyldyq okrýg ákimderi men kásiporyndarmen, kásipkerlermen birlesken sharalar qolǵa alynýda.
Shyǵynǵa ushyraǵan mal sanyn anyqtaý, sharýa qojalyqtaryna jylqylardy tıisti oryndarǵa jetkizip alý úshin materıaldyq-tehnıkalyq kómek kórsetý, jem-shóp baǵasyn turaqty ustap turý jumystary júrgizilýde.
Qazirgi ýaqytta dalada tabylǵan jylqylardyń ıeleri anyqtalmady.
Keńestik kezeńde osyndaı jaǵdaıda memleket tarapynan úlken kúsh salynatyn. Degenmen, ol ýaqytta mal tolyǵymen memlekettik menshikte, ıaǵnı, ortanyń maly bolyp tabyldy. Soǵan sáıkes, tıisti sharalar qabyldandy. Qazirgi jaǵdaı múldem bólek. Jylqy maly tolyq jeke menshik ıelerinde. Sondyqtan, olardy bazaǵa tirkeý, jem-shóp qoryn daıarlaý, olardyń baǵylýyn uıymdastyrý memlekettik organ quzyretine kirmeıdi. Jem-shóp shyǵynyn qaıtarý úshin memleket tarapynan beriletin sýbsıdıaǵa da árkim arnaıy júıege (bazaǵa) kirip, elektrondy qol qoıý arqyly, jergilikti ákimdiktiń qatysýynsyz suranys bere alady.
Shóptiń tonnasynyń baǵasy 120 myń degen derek negizsiz. Qyzylorda men Shymkent jaqtan jońyshqa jetkizilip, satylýda. Aýdan ishinde shóp qory bar, sharýashylyqtar tonnasyn 35-60 myń aralyǵynda satýda. Kebek qory jetkilikti. Olar ár pýnktte qaby 1350 -1450 teńgeden satylýda. Aýdan ákimdigi jem-shóp baǵasyn kótermeý úshin kásipkerlermen kelisimge kelý jumystaryn júrgizip jatyr.
Jalpy, Jańaarqa aýdanynda agroónerkásiptik kesheninde 12-JSHS, 987 sharýa qojalyqtary jumys jasaıdy.
2023 jyly oblys ákimdiginiń qaýlysymen bekitken erejesine saıkes, talapqa saı keletin sharýa qojalyqtaryna oblystyq búdjet esebinen aýdanymyzdyń 584 sharýa qojalyǵyna jem-shóp shyǵynyn óteý úshin barlyǵy 749 mln. 294 myń teńge kóleminde sýbsıdıa berildi.
Jańaarqa aýdanynda qarasty sharýa qojalyqtaryna sýbsıdıa úlestirýdi Ulytaý oblysynyń aýyl sharýashylyq basqarmasy júzege asyrady. Ol úshin “EGov” elektrondy úkimet partaly arqyly ótinim berýge bolady.
