2026 jyly 2 sáýirde Qazaqstan Respýblıkasynyń Bas Prokýrory B. Asylovtyń tóraǵalyǵymen qylmystyq-atqarý júıesinde (QAJ) zańdylyqty qamtamasyz etý máseleleri boıynsha alqa otyrysy ótkizildi, - dep habarlaıdy alnews.
Otyrysqa Prezıdent Ákimshiliginiń ókilderi, Parlament Májilisiniń depýtattary, ishki ister, eńbek jáne halyqty áleýmettik qorǵaý, qarjy, densaýlyq saqtaý, ulttyq ekonomıka, ónerkásip jáne qurylys mınıstrlikteriniń basshylary qatysty.
2025 jylǵy 23 maýsymda quqyq qorǵaý organdarynyń keńeıtilgen alqa otyrysynda Memleket basshysy bergen tapsyrmalardyń oryndalý barysy qaraldy, onyń ishinde QAJ-dy reformalaý, ınfraqurylymdy jańartý, sottalǵandardy qaıta tárbıeleý men olardyń qoǵamǵa beıimdelý máseleleri talqylandy.
QAJ-da zańdylyqty qamtamasyz etý, penıtensıarlyq mekemelerdi jańǵyrtý, medısınalyq qamtamasyz etý, sottalǵandardy eńbekpen qamtý jáne olardy qaıta áleýmettendirý máselelerine erekshe nazar aýdaryldy.
Penıtensıarlyq júıede azaptaý faktileriniń tirkelýi aıtarlyqtaı tómendegeni atap ótildi (2023 jyly 26 faktiden 2025 jyly 3 faktige deıin).
Shartty túrde merziminen buryn bosatý jáne jazanyń ótelmegen bóligin neǵurlym jeńil jaza túrine aýystyrý tájirıbesi jaqsardy.
Sottalǵandardy eńbekpen qamtý kórsetkishi artty (50%-dan 70%-ǵa deıin).
Probasıa esebinde turǵandar arasynda qaıtalama qylmys deńgeıi 20%-ǵa tómendedi.
Almaty qalasynda QAJ komıteti jeke ınvestordyń qatysýymen halyqaralyq standarttarǵa sáıkes keletin kámeletke tolmaǵan quqyq buzýshylarǵa arnalǵan mekeme saldy.
Óńirlerdiń ákimdikterimen ózara is-qımyl aıasynda túzeý mekemelerindegi birqatar turǵyn úı-jaılarǵa jóndeý jumystary júrgizildi. Sondaı-aq olardyń aýmaǵynda 12 óndiristik angar salý jobasy iske asyrylýda.
Otyrys qorytyndysy boıynsha aldaǵy kezeńge arnalǵan basym mindetter aıqyndaldy.
Halyqaralyq tájirıbeni eskere otyryp, jeke ınvestorlardy tartý arqyly QAJ-dyń jańa mekemelerin salý josparlanýda. Bul rette jobalar qunynyń 30%-dan aspaıtyn bóligi memleket esebinen qarjylandyrylyp, qalǵan bóligi jeke kapıtal esebinen jabylyp, keıin olardyń shyǵyndary óteletin bolady.
Qurylys qunyn tómendetý maqsatynda zamanaýı qurylys materıaldary men qaýipsizdikti qamtamasyz etýdiń jańa tehnologıalaryn eskerip, qoldanystaǵy normatıvterdi qaıta qaraý josparlanýda.
Bul búdjet júktemesin azaıtyp, sottalǵandardy ustaý jaǵdaılaryn jaqsartýǵa múmkindik beredi.
Bas Prokýror zań buzǵan tulǵalar qoǵamnan shettetilmeýi tıis ekenin atap ótti. Memlekettiń mindeti – olardy zańǵa baǵynatyn ári qoǵamǵa paıdaly azamattar retinde qaıta qalyptastyrý.
Búginde 30 myń sottalǵannyń árbir úshinshisi buryn bas bostandyǵynan aıyrý jazasyn ótegen. Óz kezeginde bir sottalǵandy ustaýǵa memleketten jylyna 3 mıllıon teńgege deıin qarjy bólinedi.
Halyqaralyq tájirıbeni eskersek,olardy eńbekpen qamtý jáne tabysty áleýmettik beıimdeý neǵurlym tıimdi bolyp tabylady.
Osyǵan baılanysty Bas prokýratýra zańnamaǵa ózgerister engizýdi usyndy, oǵan sáıkes qaıta áleýmettendirý fýnksıalary ákimdikterge berilip, al bul jumysty úılestirý Eńbek jáne halyqty áleýmettik qorǵaý mınıstrligine júkteledi. Atalǵan bastamany mınıstrlik qoldady.
Usynylǵan tásilderdi iske asyrý áleýmettik beıimdeýdiń biryńǵaı tetigin qalyptastyryp, qoǵamdyq qaýipsizdik deńgeıine oń áser etedi.
Prokýratýra organdary qyzmetiniń negizgi baǵyty árdaıym azamattardyń konstıtýsıalyq quqyqtaryn qorǵaýǵa, quqyq qorǵaý organdarynyń kúsh-jigerin qylmystylyqtyń júıeli táýekelderin tómendetý maqsatynda úılestirýge jáne quqyq buzýshylyqtardy aldyn alýǵa baǵyttalǵan.
