Shymkent qalasynda erekshe bilim berý qajettiligi bar balalarǵa arnalǵan zamanaýı jataqhana paıdalanýǵa berildi. Nysan zańsyz shyǵarylǵan aktıvterdi qaıtarýdan túsken qarjy esebinen salynǵan, dep habarlaıdy alnews.
Shymkentte medısınalyq kórsetkishteri boıynsha erekshe bilim berý qajettiligi bar balalar oqıtyn mektep-ınternat tárbıelenýshilerine arnalǵan jańa jataqhana ashyldy. Bul týraly Bas prokýror Berik Asylov málimdedi.
Onyń aıtýynsha, buǵan deıin tárbıelenýshilerdiń jaǵdaıy kúrdeli bolǵan. 1975 jyly salynǵan eski ǵımaratta oryn tapshylyǵy qatty sezilgen. Normatıv boıynsha 125 orynǵa eseptelgen nysanda 290 bala turǵan. Sonymen qatar ınfraqurylym da ábden tozǵan.
Jańa jataqhana 300 orynǵa arnalǵan. Jalpy aýdany 8288,70 sharshy metrdi quraıtyn ǵımarat tolyqtaı zamanaýı talaptarǵa saı salynǵan. 3,5 gektar aýmaqta ornalasqan nysan aýmaǵynda 800 sharshy metrlik fýtbol alańy, vorkaýt aımaǵy, 450 sharshy metrlik oıyn alańdary jáne 200 sharshy metrlik demalys oryndary qarastyrylǵan.
Ǵımarat ishinde uldar men qyzdarǵa arnalǵan bólek turǵyn bloktar, jabdyqtalǵan medısınalyq bólim, keń oıyn bólmeleri jáne balalarǵa qolaıly, qaýipsiz ári damytýshy orta qalyptastyrýǵa arnalǵan ózge de bólmeler bar.
Berik Asylovtyń málimetinshe, bul jobaǵa Memleket basshysynyń tapsyrmasy boıynsha Arnaýly memlekettik qordan 2,6 mlrd teńge bólingen. Atalǵan qorǵa zańsyz shyǵarylǵan aktıvterdi qaıtarý jáne qaıtarylǵan múlikti satýdan túsken qarajat jınaqtalady.
Sondaı-aq Bas prokýratýra qaıtarylǵan qarajat esebinen eldi mekenderdiń ınfraqurylymyn damytý jumystary búkil el boıynsha jalǵasyp jatqanyn atap ótti. Búginde shamamen 500 mlrd teńgege 440 áleýmettik jáne komýnaldyq nysannyń qurylysy qarjylandyrylǵan. Onyń 319-y paıdalanýǵa berilgen. Olardyń qatarynda mektepter, aýrýhanalar jáne sýmen jabdyqtaý júıeleri bar.
Berik Asylov qaıtarylǵan árbir teńge Qazaqstan azamattarynyń ıgiligine qyzmet etýi tıis ekenin atap ótti.
