Almatyda 2025 jyly 14 naýryzdan bastap «Almaty jastary 2025» jeńildetilgen turǵyn úı nesıeleý baǵdarlamasyna ótinish qabyldaý bastaldy. Baǵdarlamaǵa 35 jasqa deıingi almatylyqtar qatysa alady, olar bastapqy jáne qaıtalama naryqtan baspana satyp alý múmkindigine ıe.
Ótinishti baǵdarlamanyń resmı saıtynda elektrondyq sıfrlyq qoltańba (ESQ) arqyly avtorızasıadan ótip berý qajet. Nesıe mólsheri – 20 mln teńgege deıin, jyldyq mólsherleme – 5 %, bastapqy jarna – 10 %.
«Óz úıim – óleń tósegim»
«Almaty jastary» baǵdarlamasyna qatysýshylarynyń biri Jaına Ábilǵazova Almatydaǵy «Alataý» dástúrli óner teatrynda jumys isteıdi.
– Kúıeýimiz ekeýimiz jeke páterimiz bolǵanyn kópten armandadyq, biraq múmkindigimiz bolmady. Qala ákimdiginiń qoldaýynyń arqasynda armanymyz oryndaldy, sol úshin alǵysym sheksiz. Alǵash ret 2019 jyly «Almaty jastary» baǵdarlamasynyń alǵashqy legine qatysyp, «Kókqaınar» shaǵyn aýdanynan jaldamaly páter aldyq. Bes jyl boıy aıyna 4 380 teńge tólep otyrdyq», – deıdi ol
Páter nebári 30 sharshy metr bolatyn. Biraq sonyń ózi jetkilikti edi. Keıin egiz balasy dúnıege kelgende turǵyn úıdi keńeıtý týraly oılaı bastaǵan.
– Biz jaldamaly páterde turǵan kezde bastapqy jarnaǵa aqsha jınap, «Almaty jastary» baǵdarlamasyna qatysýǵa múmkindik aldyq. Aqyry, qarapaıym árleýdegi páterdi 23 mln teńgege satyp aldyq, onyń 18 mıllıony – bank nesıesi, – deıdi Jaına Ábilǵazova. – Negizi óz úıimizdiń bolǵanyn armandadyq, sondyqtan qandaı da bir turǵyn úı baǵdarlamasyna qatysatynymyzdy oılap, jaqsy nesıe tarıhyn saqtaýǵa tyrystyq. Byltyr jalaqymyz da jetkilikti deńgeıde boldy, sondyqtan tólem qabiletimizdi ońaı rastap, baspana aldyq.
Almatylyq turǵynnyń aıtýynsha, bastapqyda jubaıymen birge «Naýryz» baǵdarlamasy boıynsha qujat tapsyrǵan. Alaıda ol kezde jumys isteıtin jastardyń «Almaty jastary» arqyly baspana alý múmkindigi bar ekenin bilmegen.
– «Naýryz» baǵdarlamasy boıynsha irikteýden ótken kezde «Almaty jastary» baǵdarlamasynda jumys isteıtin jastar sanaty qosylǵanyn bildik. Qujat tapsyrdyq, múmkindikti paıdalanyp, qatelespedik. Munda paıyzdyq mólsherleme 4%-ǵa tómen boldy, – deıdi Jaına.
Jańa 55 sharshy metrlik páterdiń ıeleri qazir jóndeý jumystaryn aıaqtap, kóshýge daıyndalyp jatyr. Olar jańa baspanany qalaı jaıly etip jasaǵanyn, tipti uldaryna oınaıtyn jer jasap bergenin aıtyp, qýanyshyn jasyra almady.
– Úıińniń ózińdiki bolǵany óte mańyzdy. Kópshilik bizdiń ornymyzda bolsa, jaldamaly páterdi jekeshelendirýdi durys sheshim deıtin edi. Biraq páterimiz óte tar bolatyn. Balalar dúnıege kelgen soń eń aldymen, olardyń jaǵdaıyn oılaısyń. Eń bastysy, endi uldarymyz bizben birge páterden páterge kóship júrmeı, óziniń jeke bólmesinde bilip aly, oınaı alady, – deıdi Jaına Ábilǵazova.
Jańa páter – jańa ómir
Taǵy bir almatylyq baqytty páter ıesi – qazaq tili pániniń muǵalimi Araılym Berdibek.
– Meniń eshqashan óz úıim bolǵan emes. Uzaq ýaqyt týystarymmen birge turdym. Al óz úıińniń bolǵany qandaı jaqsy. Buryn mundaı nárseni armandaýǵa da qorqatynmyn, biraq ózimniń shańyraǵym, otbasym, balalarym bolǵanyn qatty qalaıtynmyn, – deıdi ol.
Araılym árdaıym turǵyn úı baǵdarlamalaryna qujat jınaýǵa áriptesterine kómektesip júretin. Bir kúni onyń basshysy óziniń de ótinish berip kórýin aıtqan.
