Qarasaı aýdanyna qarasty Abaı aýylyndaǵy №2 orta mektepte Memleket jáne qoǵam qaıratkeri, Qazaqstan Respýblıkasy Parlamenti Májilisiniń V shaqyrylymynyń depýtaty, «Qurmet», «Parasat» ordenderiniń ıesi Orazgúl Asanǵazynyń qatysýymen «Ata-ana - balanyń aınasy» taqyrybynda ata-analarǵa arnalǵan erekshe forým ótti.
Taǵylymdy forýmda ulttyq qundylyqtarymyz jaıly, til máselesi, otbasy ınstıtýty men qoǵamda ózekti máselege aınalǵan shańyraqtardyń shaıqalýy sekildi ózekti máseleler qozǵaldy. Forým barysynda Orazkúl Asanǵazy qatysýshylarmen erkin formatta pikir almasyp, otbasylyq bereke men tatýlyqtyń mańyzy týraly oılarymen bólisti. Sonymen qatar, jastarǵa ómirlik tájirıbesinen mysaldar keltirip, ulttyq tárbıe men rýhanı birliktiń otbasyndaǵy róline toqtaldy. Mektep dırektory Samat Súıimbekulynyń uıytqy bolýymen uıymdastyrylǵan sharaǵa mektep ujymynan bólek 200-den astam ata-ana qatysty.
Forým mektep oqýshylarynyń týǵan jer, Otanǵa arnalǵan horymen bastalyp, odan ári Sábetaı Sypataevtyń «Kók bórim kókke ulyǵan» poemasynan kompozısıasymen jalǵasty. Bul kóriniske erekshe tolqyǵan Orazgúl apaı: «Men kezdesýge shaqyrǵandaryńyzǵa qatty qýanyp turmyn. Ásirese myna kompozısıa erekshe tolqytty. «Men – qazaqpyn» dep bastap, Tilegim tynyshtyǵynda Elimniń.
Dúnıem túgelde «qońyrmyn».
Júregim tabıǵatpen tamyrlas,
Iesimin Jerimniń!» dep bitirdi ǵoı. Osy sertimizden aınymaýymyz kerek. Osy jerdiń ıesi retinde tilimizdi, dilimizdi saqtaýǵa, ulttyq bolmysymyzdan aınymaýǵa tyrysýymyz kerek. Bolashaqta ulttyń joǵyn joqtar Orazgúl Asanǵazylar osylar dep bilemin» dep rızashylyǵyn bildirdi.
Sondaı-aq «2020–2024 jj. derek boıynsha Qazaqstan, ókinishke qaraı, álem elderi ishinde ajyrasý deńgeıi boıynsha ekinshi orynda. Bul – árqaısymyzǵa oı salatyn aýyr shyndyq. Búgingi sharanyń taqyryby «Ata-ana balanyń aınasy» dep jaqsy qoıylǵan. Dál qazir osy balalar úlgi etip qaraıtyn aına, ata-analarymyz ajyrasyp, aınalar shytynap jatyr. Mundaı jaǵdaıda balalarymyz kimdi úlgi tutady, qaıdan tárbıe alady? Memleket shaǵyn otbasylardan turady. Osy máseleni aldyn alý boıynsha kishkene bolsyn paıdam tısin degen maqsatta “Otbasy berekesi” atty kitabym shyqty. 52 jyl otbasylyq ómirimde áıel, kelin, ene, áje retinde túıgenim az emes. Sol oılarymdy kitapqa jınaqtadym» deı kelip, ár shańyraqtyń egesi er adamdarǵa, uıytqysy bolar áıel adamdarǵa oı salar pikirlerimen bólisti.
İs sharaǵa arnaıy kelip qatysqan aýdandyq bilim bóliminiń basshysy Erkımbaeva Asel Ableevna da «Mundaı shara aýdanymyzdyń basqa da mektepterine kerek» deı kelip, Orazgúl Asanǵazyqyzyna aýdan boıynsha osyndaı «taǵylymdy týr» uıymdastyryp berýge qolqa saldy. Al mektep dırektory Samat Súıimbekuly «Mektep, qoǵam, otbasy - úsh taǵandy baılanys ornaǵanda ǵana rýhty urpaq tárbıeleımiz! Bul kezdesý árqaısyńyzǵa oı salsa, maqsatymyzdyń oryndalǵany. Bilim berip qana qoımaı, otbasy qundylyqtaryn dáriptep, syılastyq pen ózara túsinistik mádenıetin nyǵaıtý, otbasy ınstıtýtynyń qoǵamdaǵy orny, ata-ananyń bala tárbıesindegi jaýapkershiligi jáne ulttyq dástúr men qazirgi zaman qundylyqtarynyń úılesimin taba bilsek, siz ben biz birge keremet urpaq tárbıelep shyǵamyz degen oıdamyz. Orazgúl Asanǵazyqyzynyń ár sózinen rýhtanyp, kóńilge kóp oı túıdik» dedi.
Ata-analardyń da rıza bolyp, rýhtandyryp sóılegen qoǵam qaıratkeriniń sózderine dem berip, kesh sońynda rızashylyqtaryn bildirgenin baıqadyq, solardyń biri ata-ana Saılybaev Baǵashar «Bizdiń qatty qarnymyz ashyp qalypty. Búgin kádimgideı rýhanı azyq alǵandaı boldyq. Maqsatymyzdyń aıqyndalyp, ómirge qulshynysymyz artqandaı boldy. Ata-ana men mektep birikkende ǵana myqty urpaq tárbıelep shyǵatynymyzdyń dáleli búgingi kesh. Sondyqtan aldaǵy ýaqytty yntymaqtastyǵymyz arta bersin!» dedi.
Forým sońynda mektep dırektory bastap, mektep ujymy qoldap hormen rýhty ánmen keshti túıindedi.
Kesh sońynda Orazgúl Asanǵazynyń sózimen rýhtanǵan ata-analar qımaı qoshtasyp, memleket qaıratkeriniń ár sózin qoldap, estelik sýretke de tústi.
