7 قاراشا كۇنى الماتىداعى ش.ش. ءۋاليحانوۆ اتىنداعى تاريح جانە ەتنولوگيا ينستيتۋتىندا «1920-1930 جىلدارداعى پاناسىز بالالار تاريحىنىڭ زەرتتەلۋى مەن پروبلەمالارى» اتتى عىلىمي-ادىستەمەلىك سەمينار ءوتتى، - دەپ حابارلايدى alnews.
ءىس-شارادا 1920-1930 جىلدارداعى وتاندىق جانە شەتەلدىك تاريحنامادا قازاقستان مەن كورشىلەس ەلدەر اۋماعىنداعى بالالار پاناسىزدىعى پروبلەماسى جان-جاقتى تالقىلاندى. سونداي-اق زەرتتەۋ تاقىرىبى بويىنشا جاڭا دەرەكتەردى انىقتاۋ، جيناۋ جانە ولاردى عىلىمي اينالىمعا ەنگىزۋ ماسەلەلەرى قاراستىرىلدى.
اتالعان سەمينارعا ينستيتۋتتىڭ باس ديرەكتورى ق ر ۇعا اكادەميگى، ت.ع.د.، پروفەسسور ز.ە.قابىلدينوۆ، ديرەكتوردىڭ عىلىم جونىندەگى ورىنباسارى، ت.ع.ك.، ش. بايان ۇلى، ينستيتۋت ديرەكتورىنىڭ سىرتقى بايلانىستار جونىندەگى ورىنباسارى، ت.ع.ك.، ج.ج. جەڭىس جانە عالىم حاتشى ن. قۇرمانالينا مەن ت.ع.د.، پروفەسسور و.ح. مۇقاتوۆا قاتىستى.
سەمينار «1920-1930 جىلدارداعى قازاقستان اۋماعىنداعى جانە ىرگەلەس ەلدەردەگى بالالار پاناسىزدىعى ماسەلەسى» اتتى جوبانىڭ اياسىندا ءوتىپ وتىر. ونلاين جانە وففلاين فورماتتا وتكەن عىلىمي-ادىستەمەلىك سەمينارعا قىزىعۋشىلىق تانىتقان وتاندىق تاريحشىلار مەن بەلسەندى ازاماتتار قاتارى كوپ بولدى.
زۇلمات جىلدارداعى پاناسىز بالالاردىڭ ماسەلەسى تۋرالى سەميناردىڭ ءالعىسوزىن باستاعان ينستيتۋتتىڭ باس ديرەكتورى ز.ە. قابىلديوۆ، حح عع. 20-30 جىلدارىنداعى ءتۇرلى سەبەپتەرگە بايلانىستى اتا-اناسىنان ايرىلعان پاناسىز بالالاردىڭ جاعدايىن باياندادى. ساياسي زۇلمات جانە اشارشىلىق جىلدارى كورشى ەلدەرگە كوشۋگە ءماجبۇر بولعان ازاماتتاردىڭ بالالارىنىڭ كەيبىرى كەيىن سول ەلدىڭ ماقتانىشتى تۇلعاسىنا اينالعانىن دا دايەكتى مىسالدارمەن كەلتىرىپ ولاردىڭ قيلى تاعدىرىنا تالداۋ جاسادى.
سونىمەن بىرگە اتالعان تاقىرىپتى زەرتتەۋدىڭ تەوريالىق جانە مەتودولوگيالىق تاسىلدەرىن جەتىلدىرۋدىڭ ماڭىزدىلىعى مەن وزەكتىلىگى جانە تاقىرىپتى زەرتتەۋدە ساقتالعان كەيبىر تۇيىتكىلدەردىڭ سەبەپتەرىنە تالداۋ جاساعان ت.ع.د.، پروفەسسور و.ح. مۇقاتوۆا بايانداما بارىسىندا “پاناسىز بالالار” تەرمينىنە دە جەكە توقتالدى. سونىمەن بىرگە پاناسىز بالالار ماسەلەسى بويىنشا زەرتتەلگەن وتاندىق جانە شەتەلدىك تاريحناماعا شولۋ جاساپ، سول جىلدارداعى مەرزىمدى باسپاسوزدە جاريالانعان ماقالالاردى زەرتتەۋدىڭ ماعىزدىلىعى تۋرالى ايتتى.
باياندامادان سوڭعى تالقىلاۋ بارىسىندا تاريح عىلىمدارىنىڭ كانديداتى ج.ج. جەڭىس پەن گ.ءۇ. ورىنبايەۆا، PhD دوكتور م.م. قوزىبايەۆا، تاريح ماگيسترى ا.ا. بەكەنوۆا، دوكتورانت ە. ساۋىرقان ءوز پىكىرلەرىن ءبىلدىرىپ، بايانداما تاقىرىبىنا قاتىستى ساۋالدارىن قويدى. قاراعاندى ۋنيۆەرسيتەتىنىڭ وقىتۋشىسى ت.ساكاباي ءوزىنىڭ اتالعان تاقىرىپ تۋرالى زەرتتەۋ ناتيجەسىمەن ءبولىستى. PhD دوكتور م.م.قوزىبايەۆا اشارشىلىق كەزىندە قىرعىستان، باتىس ءسىبىر، وڭتۇستىك سىبىرگە ت.ب. شەكتەس جەرلەرگە كەتكەن قازاق بالالارىنىڭ تاعدىرىن زەرتتەي وتىرىپ، سول ەلدەردەگى بالالار قامقورسىزدىعىمەن كۇرەستىڭ قالاي جۇرگىزىلگەندىگىنە سالىستىرمالى تالداۋ جاساۋ قاجەتتىگىن اتاپ ءوتتى.
