26-27 مامىردا رەسەي پرەزيدەنتى ۆلاديمير پۋتين وزبەكستانعا رەسمي ساپارمەن باردى. بۇل ۆ. ءپۋتيننىڭ ۇلىقتاۋ راسىمىنەن كەيىنگى ءۇشىنشى شەت ەلدىك رەسمي ساپارى. 16-17 مامىردا جۇڭگو، ال 23-24 مامىردا بەلارۋسكە بارعان ەدى.
ۆ. پۋتين وزبەكستانعا رەسمي ساپارى بارىسىندا ەلدىڭ تاۋەلسىزدىك مونۋمەنتىنە گۇل شوقتارىن قويدى. سونىمەن قاتار، وزبەكستان پرەزيدەنتى شاۆكات ميرزيەيەۆ پەن رەسەي پرەزيدەنتى ۆلاديمير پۋتين شاعىن جانە كەڭەيتىلگەن قۇرامدا كەزدەستى.
ەكى كۇنگە سوزىلعان رەسمي كەزدەسۋ ناتيجەسىندە 17 قۇجاتقا قول قويىلدى. ولاردىڭ ىشىندە ءبىز ءمان بەرەتىن قۇجات وزبەكستاندا اەس سالۋ تۋرالى كەلىسىم. جوبانى رەسەيلىك "روستاتوم" كومپانياسى جۇزەگە اسىرماق. قۇرىلىس بيىل جازدا باستالىپ، 2033 جىلعا قاراي ىسكە قوسۋ جوسپارلانعان.
ايتا كەتەيىك، رەسەي قازاقستاندا دا اەس سالۋعا مۇددەلى. حالقىمىز ءۇشىن كۇردەلى ماسەلە بولعاندىقتان قاسىم-جومارت توقايەۆ اەس سالۋ نە سالماۋ ماسەلەسىن رەفەرەندۋمدا شەشۋ كەرەك دەگەن بولاتىن.
بۇدان بولەك، 2023 جىلى 7 قازاندا ماسكەۋدە ۆ. پۋتين، قاسىم-جومارت توقايەۆ پەن شاۆكات ميرزيەيەۆتىڭ قاتىسۋىمەن "ورتا ازيا-ورتالىق" اتتى گاز قۇبىرىن رەسمي تۇردە اشقان ەدى. بۇل قۇبىر ارقىلى رەسەيدىك گازى قازاقستان ارقىلى وزبەكستانعا تاسىمالدانادى.
وسىلايشا، رەسەي ايماقتىڭ ساياسي سالماقتى ەلدەرىمەن ەنەرگەتيكا سالاسىندا سەرىكتەستىكتى نىعايتۋدا.
