ءبىر قاراعانعا سايلاۋدان كەيىنگى كادرلىق ءاۋىس-تۇيىس قالىپتى ساياسي ۇدەرىس سياقتى. ءبىراق سەرگەي شويگۋدىڭ قىزمەتتەن كەتۋى قالىپتى وقيعا دەي المايمىز.
شويگۋدىڭ قورعانىس مينيسترلىگىنەن كەتۋىنە مىناداي فاكتورلار اسەر ەتتى:
بىرىنشىدەن، سەرگەي شويگۋ مەن جەكە اسكەري كومپانيا "ۆاگنەردىڭ" نەگىزىن سالۋشى ەۆگەنيي پريگوجين اراسىنداعى داۋ. بىلتىر 23 مامىردا ەۆگەنيي پريگوجين رەسەيلىك اسكەرلەردى ۆاگنەرلىك جاۋىنگەرلەرگە شابۋىل جاسادى دەپ ايىپتاپ، جاقتاستارىن بۇلىك شىعارۋعا شاقىرعان. ۆاگنەرلىكتەر 24 كۇنى تاڭەرتەڭ روستوۆ-نا-دونۋداعى اسكەري نىساندى الىپ، ماسكەۋگە اتتانۋدى جوسپارلاعان. ءبىراق كەشكە بەلورۋس پرەزيدەنتى الەكساندر لۋكاشەنكومەن بولعان كەلىسسوزدەن كەيىن بۇل رايىنان قايتى. ءسويتىپ وعان قارسى قوزعالعان قىلمىستىق ءىس 27 مامىردا توقتاتىلدى. داۋدىڭ نەگىزگى سەبەبى ەكى اسكەري باسشى اراسىنداعى كەلىسپەۋشىلىك بولعانى ءسوزسىز.
ەكىنشىدەن، سەرگەي شويگۋ ۇزاق ۋاقىت قورعانىس سالاسىن باسقاردى. سوندىقتان ادامي فاكتوردى دا ەسكەرگەن ءجون. ول 2012 جىلدان بەرى كۇشتىڭ قۇرىلىمنىڭ باسىندا بولدى. اسكەري-ساياسي مەنەدجەر رەتىندە سالاعا بەرەرى تاۋسىلدى. دامىعان ەلدەردە سول ءۇشىن دە ساياساتكەرلەر ءبىر ورىندا ۇزاق وتىرمايدى.
باتىستىق ساراپشىلار مەن ب ا ق شويگۋدىڭ كەتۋىن كۇتپەگەن وقيعا دەپ جازدى. ءبىزدىڭ ويىمىزشا، كۇتىلگەن، ءبىراق كەيىنگە شەگەرىلگەن ساياسي شەشىم بولدى. ۋكراينامەن اراداعى داعدارىس پەن پرەزيدەنت سايلاۋى الدىندا تۇبەگەيلى وزگەرىس جاساۋعا كرەمل بارماس ەدى.
شويگۋدىڭ الداعى تاعدىرى نە بولماق؟
رەسەيدىڭ پرەزيدەنتى ۆلاديمير پۋتين 12 مامىردا بۇرىنعى قورعانىس ءمينيسترىن قاۋىپسىزدىك كەڭەسىنىڭ حاتشىسى قىزمەتىنە تاعايىندادى. ءبىراق مۇنىمەن وعان دەگەن سۇراق ازايمايتىن سياقتى.
كەشە، سەيسەنبىدە مينيسترلىكتىڭ كادر ءبولىمىن باسقارۋشى گەنەرال-لەيتەنانت يۋريي كۋزنەسوۆتى ارنايى قىزمەت ۇستادى. وعان ۇلكەن كولەمدەگى سىبايلاس جەمقورلىق جاسادى دەگەن ايىپ تاعىلىپ وتىر. بۇل سوڭعى ايداعى ەكىنشى وقيعا. ساۋىردە شويگۋدىڭ ورىنباسارى تيمۋر يۆانوۆ تا تۋرا وسى ايىپپەن ۇستالعان بولاتىن.
بۇلار اسكەري قىلمىس بولعاندىقتان جابىق رەجيمدە ءىس قارالاتىنى ءسوزسىز. دەسە دە الداعى كۇندەرى سەرگەي شويگۋدىڭ دا مينيستر بولعان كەزدەگى جۇمىسىنا سۇراقتار تۋىنداۋى مۇمكىن. سەبەبى ەۆگەنيي پريگوجيننىڭ بۇلىكتەن كەيىن اراعا 2 اي سالىپ اۋە اپاتىنان قايتىس بولعانىن ەسكەرگەن ءجون.
