رەسمي مالىمەتتە م.نۇرتىلەۋ ءوزىنىڭ ازەربايجاندىق جانە ارمەنياندىق ارىپتەستەرىمەن ەكى جاقتى قارىم-قاتىناستى، ساۋدا-ەكونوميكالىق بايلانىستاردى دامىتۋ ماسەلەلەرىن كەڭەسكەن. وعان قوسا تاۋار اينالىمى مەن ترانزيتتىك-كولىكتىك الەۋەت كولەمىن ۇلعايتۋ ماسەلەلەرىن، وڭىرلىك ەكونوميكالىق جانە كولىكتىك ءوزارا بايلانىستى دامىتۋ تاقىرىپتارىن تالقىلاعان.
ازەربايجان ءسىم جەتەكشىسى دجەيحۋن بايراموۆ قازاقستاندىق تاراپقا ازەربايجان مەن ارمەنيا اراسىنداعى ەكىجاقتى بەيبىتشىلىك پروسەسىن ىلگەرىلەتۋ باعىتىنداعى قولداۋى مەن بەلسەندىلىگى ءۇشىن العىسىن ايتقان. ءارى بۇگىنگى كەلىسسوزدەر وسى پروسەسكە ءوز ۇلەسىن قوساتىنىنا سەنىمىن بىلدىرگەن.
ارمەنيا سىرتقى ىستەر ءمينيسترى ارارات ميرزويان 1991 جىلعى الماتى دەكلاراسياسىنىڭ ازەربايجان مەن ارمەنيا اراسىنداعى قاتىناستاردى رەتتەۋ، ونىڭ ىشىندە شەكارانى دەليميتاسيالاۋ پروسەسىندە ماڭىزدىلىعىن ەسكەرە وتىرىپ، ازەربايجان مەن ارمەنيا سىرتقى ىستەر مينيسترلەرىنىڭ قازاقستانداعى، اتاپ ايتقاندا الماتى قالاسىنداعى كەزدەسۋىنىڭ سيمۆولدىق سيپاتىن اتاپ وتكەن.
ايتا كەتەيىك، مينيستر م.نۇرتىلەۋ ازەربايجان مەن ارمەنيا تاراپتاعى ارىپتەستەرىمەن قوس تاراپتىڭ كەلىسسوزى اياسىندا كەزدەستى. بۇعان دەيىن قازاقستان تارابى الماتىدا ازەربايجان مەن ارمەنيانىڭ ءسىم باسشىلارىنا كەلىسسوز الاڭىن ۇسىنعان بولاتىن. كەلىسسوز كەزدەسۋى بۇگىن الماتىدا ءوتىپ جاتىر. وڭتۇستىك كاۆكاز وڭىرىندەگى بەيبىتشىلىك پەن تۇراقتىلىققا قاتىستى بۇل كەلىسسوز پروسەسىنە كوپتەگەن ەلدەر نازار اۋدارۋدا.
