بۇدان ەكى اپتا تۇرىن اقش مەملەكەتتىك حاتشىسى ەنتوني بلينكەن بەيجىڭگە ساپارلاي بارعان. ول جۇڭگو بيلىگىن رەسەيدىڭ ۋكرايناداعى سوعىسىن قولداماۋعا، اسكەري جانە ازاماتتىق ماقساتتا پايدالانۋعا بولاتىن تاۋارلاردى ەكسپورتتاماۋعا شاقىرعان بولاتىن. پۋتين مەن سي كەزدەسۋىنەن كەيىن ماسكەۋ مەن بەيجىڭ ءوزىنىڭ قارىم-قاتىناستارىن تۇراقتى دامىتا بەرەتىنىن بايقاتتى. ءتىپتى قۇراما شتاتتاردى جاھاندىق تۇراقتىلىققا ءقاۋىپ ءتوندىرىپ وتىرعانىن دا مەڭزەدى.
بىرلەسكەن مالىمدەمەدە: "اقش ءوزىنىڭ ءابسوليۋتتى اسكەري ارتىقشىلىعىن ساقتاۋ ءۇشىن ستراتەگيالىق تۇراقتىلىققا نۇقسان كەلتىرۋ ارەكەتىنە تاعى دا ەلەۋلى الاڭداۋشىلىق بىلدىرەمىز" دەگەن سوزدەر كەزدەسەدى.
بۇعان قوسا اقش توندىرگەن قاۋىپسىزدىك قاتەرلەرى قاتارىندا مىنالاردى اتاعان:
امەريكا قۇراما شتاتتارى «جاھاندىق زىمىرانعا قارسى جۇيەنى قۇرىپ، زىمىرانعا قارسى جۇيەلەردى بۇكىل الەمدە جانە عارىشتا ورنالاستىرادى؛ جوعارى دالدىكتەگى يادرولىق ەمەس قارۋلاردىڭ قابىلەتىن كۇشەيتەدى؛ باسقا تاراپتاردىڭ اسكەري وپەراسيالارىن، سوققى جاساۋ مۇمكىندىكتەرىن جويۋعا تىرىسۋدا؛ ناتو-نى كۇشەيتىپ، ەۋروپالىق كەيبىر وداقتاستارىمەن «يادرولىق ءبولىسۋ» كەلىسىمىن جۇزەگە اسىرۋدا؛ ۇلىبريتانيا جانە اۆستراليامەن يادرولىق سۇڭگۋىر قايىقتاردى دامىتۋ مەن پايدالانۋ بويىنشا ىنتىماقتاستىقتى جۇزەگە اسىرۋدا؛ ازيا-تىنىق مۇحيتى مەن ەۋروپاداعى وداقتاستارىنا قۇرلىقتاعى قىسقا جانە ورتا قاشىقتىقتاعى زىمىرانداردى ورنالاستىرۋ، قامتاماسىز ەتۋ جوسپارلارىن جۇزەگە اسىرىپ كەلەدى" دەلىنگەن.
ماسكەۋ مەن بەيجىڭ ءوزارا قارىم-قاتىناستارىن دامىتۋ ارەكەتتەرى ءۇشىنشى جاققا باعىتتالماعانىن ايتتى. دەگەنمەن، ەكى ەل اراسىندا ىنتىماقتاستىق تاعى دا جاڭا دەڭگەيگە قاراي كوتەرىلە تۇسكەنىن كورۋگە بولادى. بۇل ولارمەن باسەكەلەس وزگە دە دەرجاۆالارمەن بولعان شيەلەنىستىڭ ءتىپتى دە كۇشەيە تۇسەتىنىنەن دەرەك بەرەدى.
