الەمدەگى ەڭ ۇزدىك ەكونوميكاعا يە الدىنعى 7 مەملەكەت اراسىنداعى ءداستۇرلى سامميت بيىل يتاليادا باس قوستى. بۇگىن، 14 ماۋسىم "ۇلكەن جەتىلىك" ءسامميتىنىڭ سوڭعى كۇنى. ولار الەمدەگى ەڭ ەلەۋلى ماسەلەلەر تۋراسىندا پىكىر الماستى. ەڭ نەگىزگى تاقىرىپتاردىڭ قاتارىندا ۋكرايناداعى سوعىس تۇردى.
ءسامميتتىڭ ءبىرىنشى كۇنىندە «ۇلكەن جەتىلىك» ەلدەرى رەسەيدىڭ تىيىم سالىنعان اكتيۆتەرىنەن الىنعان پايىزدار ەسەبىنەن ۋكرايناعا 50 ميلليارد دوللار نەسيە بەرۋ تۋرالى تالقىلادى. ناتيجەسىندە بارلىق تاراپ بۇعان كەلىسىمىن بەردى. وزدەرى بۇل كەلىسىمدى باتىستىڭ پارمەندىلىگى دەپ باعالادى.
ال، G7 مۇشەلەرىنىڭ بۇگىنشى باستى تاقىرىبى – جۇڭگو. جۇماداعى كەلىسسوزدەردە قىتايدىڭ شامادان تىس ونەركاسىپتىك الەۋەتىنەن كەلىپ شىعاتىن قيىندىقتار، جەرگىلىكتى نارىققا ارالاسۋ ارەكەتتەرى (باتىس ۇكىمەتتەرى بەيجىڭدى ءوز ىشىندەگى نارىققا ماقساتتى ارالاسىپ، وتاندىق كومپانيالارىمەن شەتەلدىك كومپانيالارعا بىردەي قارامايدى دەپ سانايدى) جانە رەسەيدىڭ سوعىس ارەكەتتەرىن قولداۋىنا قاتىستى تاقىرىپتار ءسوز بولدى. سامميتكە قاتىسۋشىلار بەيجىڭنىڭ بۇل ارەكەتتەرىنە الاڭدايتىندارىن ءبىلدىردى.
وسىلايشا ەڭ دامىعان 7 ەل باس قوسقان ءسامميتتىڭ نەگىزگى تاقىرىبى رەسەي مەن جۇڭگو بولدى. ارينە ودان وزگە ەۋروپاعا اعىلعان بوسقىندار ماسەلەسى، كليمات وزگەرىسى سەكىلدى تاقىرىپتار دا بولدى. جيىننىڭ نەگىزگى سۇراعى الداعى دامۋ باعىتىن باعدارلاۋ بولاتىن. ايتپاقشى، جيىنعا جەتەكشى دامۋشى ەلدەردىڭ ۇيىمى سانالاتىن برەكسيت مۇشەلەرى برازيليا، وڭتۇستىك افركا جانە ءۇندىستان وكىلدەرى دە قاتىسىپ جاتىر.
"ۇلكەن جەتىلىك" سامميتىنەن كەيىن قالىپتاسقان جانە جاڭا دەرجاۆالار اراسىنداعى قايشىلىقتىڭ اسقىنا تۇسكەنى انىق كورىندى. وعان قوسا امەريكا قۇراما شتاتتارىنىڭ ءتۇرلى حالىقارالىق ۇيىمداعى ىقپالىنىڭ جان-جاقتى جۇمىس ىستەپ جاتقانى دا اڭعارىلدى.
سامميتتەن ەكى كۇن بۇرىن ەو تارابى شىلدە ايىنان باستاپ يمپورتتالعان قىتايلىق ەلەكتروموبيلدەرگە 38،1%-عا دەيىن قوسىمشا باج سالىعىن ەنگىزەتىنىن جاريالاعان بولاتىن. بەيجىڭ ەو-نى اقش-تىڭ ايتقانىنان شىعا المادى دەگەن سىڭايدا ايىپتاپ، ءوز مۇددەسىن قورعاۋ ءۇشىن جاۋاپ شارالارىن قابىلدايتىنىن ەسكەرتكەن. سول ەسكەرتۋدىڭ ناتيجەسى مە، الدە ەسەپتەلگەن قادام با ەو مۇشەلەرى "ۇلكەن جەتىلىك" سامميتىندە قىتايعا قارسى جاپپاي ساۋدا سوعىسىن بولدىرماۋدى قالايتىنىن اڭعارتتى. G7 ىشىندە قىتايدىڭ مەملەكەتتىك سۋبسيديالارىنا قالاي قارسى تۇرۋ كەرەك دەگەن ماسەلەدە پىكىر الۋاندىلىعى پايدا بولدى.
قوسىمشا ايتا كەتەيىك، اۋلىنا جاقىن كەلگەن G7 باسشىلارىمەن، وزگە ەلدەردىڭ ليدەرلەرىمەن ريم پاپاسى فرانسيسك دە جولىقتى. ءدىن كوسەمى كەزدەسۋدىڭ تاقىرىبىن جاساندى ينتەللەكتكە ارناعان.
