كوپتەگەن ساراپشىلاردىڭ بولجاعانىنداي، ءقازىر الەم قىرعيقاباق سوعىسىنان كەيىن يادرولىق سوعىس قاۋپىنە ەڭ جاقىن تۇر. سەبەبى، يادرولىق قارۋدى قىسقارتۋ بويىنشا ءىرى يادرولىق دەرجاۆالار اراسىنداعى كەلىسىم بۇزىلدى. ءارى يادرولىق قارۋعا يە دەرجاۆالار الەمدەگى قاقتىعىس نۇكتەلەرىنە ارالاسىپ جاتىر. اسىرەسە ۋكرايناداعى سوعىستان كەيىن الەم ەلدەرى يادرولىق سوعىس ءقاۋپى تۋرالى قايتا ويلانا باستاعانداي.
جاقىندا امەريكا قۇراما شتاتتارى ءوزىنىڭ يادرولىق ارسەنالىن كەڭەيتۋى مۇمكىن ەكەنىن مالىمدەدى. بايدەن ۇكىمەتىنىڭ بۇل قادامىنا رەسەي مەن قىتايدىڭ يادرولىق ستراتەگياسى سەبەپ بولعانى ايتىلۋدا. ۆاشينگتون تارابى بەيجىڭ مەن ماسكەۋ وزدەرىنىڭ يادرولىق ستراتەگيالارىن وزگەرتپەگەن جاعدايدا، ولارعا قارسى جاۋاپ رەتىندە ءوز يادرولىق مۇمكىندىكتەرىن ارتتىرۋعا ءماجبۇر بولاتىنىن العا تارتادى.
قىسقاسىن ايتقاندا اقش يادرولىق ارسەنالىن مودەرنيزاسيالاۋدان كەڭەيتۋگە قاراي دايىندالىپ جاتىر. بۇل تۋرالى ماۋسىم ايىنىڭ باس شەنىندە اقش ۇلتتىق قاۋىپسىزدىك كەڭەسىنىڭ اعا ديرەكتورى پراني ۆاردي مالىمدەگەن بولاتىن.
ءقازىر رەسەي مەن اقش الەمدەگى ەڭ ءىرى يادرولىق ارسەنالعا يە ەلدەر سانالادى. 2026 جىلى ەكى ەل اراسىندا ۋاقىتشا ۇزارتىلىپ كەلە جاتقان "يادرولىق قارۋدى باقىلاۋ تۋرالى" كەلىسىمنىڭ ۋاقىتى تولادى. تاراپتاردا قازىرگى شيەلەنىس جاعدايىندا بۇل كەلىسىمدى ۇزارتا الا ما، جوق پا دەگەن سالماقتى ساۋال تۇر.
پراني ءۆارديدىڭ مالىمدەمەسىنەن كەيىن امەريكالىق جوعارى لاۋازىمدىلار ەلدىڭ يادرولىق قۋاتىن ارتتىرۋدى شىن مانىندە تالقىلاي باستاعانى ءمالىم بولدى. وسىعان دەيىن ۆاشينگتون قىتايدىڭ يادرولىق ارسەنالىن جىلدام كەڭەيتۋ ارەكەتتەرىنە الاڭداۋشىلىق بىلدىرگەن ەدى.
15 جىل بۇرىن، باراك وباما تۇسىندا اقش يادرولىق قارۋسىز الەم بويىنشا ءوز باستامالارىن كوتەرىپ شىققان. وندا قۇراما شتاتتار ءوزىنىڭ يادرولىق ارسەنالدارىن تەك جاڭارتىپ، كولەمىن كەڭەيتپەي ساقتاپ تۇراتىن بولعان. ءبىراق، ول كەزدە اقش-تىڭ ستراتەگيالىق باسەكەلەستەرى رەسەي مەن قىتايدىڭ جاعدايى مۇلدە باسقا بولاتىن. ماسكەۋ قىمباتقا تۇسەتىن يادرولىق جارىسقا قۇلىقسىزدىق تانىتقان، ال جۇڭگو بولسا 1964 جىلعى العاشقى يادرولىق سىناقتان بەرگى "ەڭ تومەنگى يادرولىق تەجەۋ" ساياساتىن ۇستانىپ تۇرعان.
باقساق، جاعداي ءقازىر مۇلدە باسقا كۇيدە. ەگەر پەنتاگوننىڭ الاڭداۋشىلىعى راسقا اينالسا، وندا ەندى 10 جىل شاماسىندا جۇڭگو ءوزىنىڭ يادرولىق قارۋلارىن تەرريتورياسىنان تىس اۋماقتارعا ورنالاستىرا باستاۋى مۇمكىن. بۇل دەگەنىمىز ءۇندى جانە تىنىق مۇحيت ايماعى يادرولىق سوعىس قاۋپىندەگى ايماققا اينالۋى مۇمكىن دەگەندى كورسەتەدى. ال رەسەي سوڭعى جىلدارى يادرولىق قارۋلاردى جەر وربيتاسىنىڭ سىرتىنا ورنالاستىرۋعا تىرىسىپ جاتىر دەگەن بولجامدار بار.
يادرولىق سوعىس ءقاۋپى، يادرولىق باسەكەدەن باستالارى انىق. ءوزىنىڭ ستراتەگيالىق قارسىلاستارىنان ۇتىلىپ قالماس ءۇشىن دەرجاۆالار يادرولىق قارۋلاردىڭ قىزۋ باسەكەسىنە كىرىپ كەتسە، وندا قىرعيقاباق سوعىس جىلدارىنداعىداي الەم يادرولىق ءسوعىستىڭ قاتەرىندە ءومىر ءسۇرۋى ابدەن مۇمكىن.
