شولس ساپارى: قازاقستان مەن گەرمانيا قانداي جاڭا كەلىسىمدەر جاساستى؟

استانادا وتكەن "قازاقستان-گەرمانيا" بيزنەس فورۋمىنا قاتىسقان مەملەكەت باسشىسى قاسىم-جومارت توقايەۆ قازاق-گەرمان قاتىناسىنىڭ جاڭا كەزەڭى باستالعانىن مالىمدەدى. ول گەرمانيا كانسلەرى ولاف شولستىڭ كەزەكتى ساپارى وسى جاڭا كەزەڭنىڭ شىمىلدىعىن اشقانىن اتاپ ءوتتى.

فورۋمنان بۇرىن مەملەكەت باسشىلارى ەنەرگەتيكا، ماشينا جاساۋ، لوگيستيكا، تاۋ-كەن مەتاللۋرگياسى جانە اۋىل شارۋاشىلىعى سالالارىنداعى قازاق-گەرمان بىرلەسكەن جوبالارىنا ارنالعان كوردە بولعان. فورۋم بارىسىندا ەكى ەل باسشىسى ستراتەگيالىق ىنتىماقتاستىقتىڭ دامۋىنا وڭ باعا بەردى.

بيزنەس فورۋمىندا پرەزيدەنت توقايەۆ قازاق-گەرمان ستراتەگيالىق ىنتىماقتاستىعىن دامىتۋ بويىنشا «اسا ماڭىزدى شيكىزاتتى ينۆەستيسيا مەن تەحنولوگياعا ايىرباستاۋ» پراگماتيكالىق فورمۋلاسىن نەگىز ەتەتىنىن، وعان ساي تابيعي رەسۋرستاردى ءوندىرۋ جانە وڭدەۋ ءىسىن بىرلەسىپ دامىتۋدى ۇسىندى.

«ءبىزدىڭ مينەرالدى-شيكىزات قورىمىزدا ءالى بارلانباعان بەس مىڭنان استام كەن ورنى بار. بۇل كەنىشتەردىڭ قۇنى تريلليونداعان دوللارعا باعالانادى. بۇگىندە ءبىز ەۋروپا وداعىنىڭ ەكونوميكاسى ءۇشىن اسا ماڭىزدى 34 سيرەك كەزدەسەتىن ماتەريالدىڭ 19 ءتۇرىن وندىرەمىز. وسىعان وراي مينەرالدىق رەسۋرستار جونىندەگى نەمىس اگەنتتىگى (DERA) مەن قازاق سەرىكتەستەرى ماڭىزدى شيكىزات ساۋداسى بويىنشا كونسورسيۋم قۇرىپ جاتىر. ءبىز بۇل باستامانىڭ تاياۋ ارادا ناقتى ىسكە اسۋىن اسىعا كۇتىپ وتىرمىز. بۇدان بولەك، HMS Bergbau كومپانياسىنىڭ شىعىس قازاقستاندا ليتيي ەلەمەنتىن قايتا وڭدەيتىن زاۋىت سالۋ ءۇشىن بارلاۋ جۇمىستارىن جۇرگىزۋ تۋرالى جوسپارىن قۇپتايمىز. بۇل جوباعا سالىناتىن ينۆەستيسيا كولەمى – 500 ميلليون دوللار. ەلىمىزدىڭ باي رەسۋرس قورى ونەركاسىپ سالاسىنداعى ىنتىماقتاستىعىمىزدى كەڭەيتە تۇسۋگە مول مۇمكىندىك بەرەدى"، – دەگەن پرەزيدەنت.

"قازاقستان-گەرمنايا" بيزنەس فورۋمىندا تاراپتار 12 قول قويىلعان قۇجاتتارمەن الماستى. ولار:

1.قازاقستان رەسپۋبليكاسى ونەركاسىپ جانە قۇرىلىس مينيسترلىگى مەن گەرمانيا ەكونوميكاسى شىعىس كوميتەتى اراسىنداعى تەحنيكالىق رەتتەۋ سالاسىنداعى ىنتىماقتاستىق بويىنشا قازاقستان-گەرمانيا باستامالارىنىڭ جول كارتاسى؛

2. قازاقستان رەسپۋبليكاسى عىلىم جانە جوعارى ءبىلىم مينيسترلىگى مەن Svevind Energy كومپانياسى اراسىنداعى «جاسىل سۋتەگى» جوباسىنا بايلانىستى زەرتتەۋ جۇرگىزۋ بويىنشا ىنتىماقتاستىق تۋرالى مەموراندۋم؛

3. ق ر ەكولوگيا جانە تابيعي رەسۋرستار مينيسترلىگى، ق ر سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى مەن «Siemens» جاۋاپكەرشىلىگى شەكتەۋلى سەرىكتەستىگى اراسىنداعى ءوزارا تۇسىنىستىك تۋرالى ستراتەگيالىق مەموراندۋم؛

4. «سامۇرىق-قازىنا» اكسيونەرلىك قوعامى مەن «Siemens Central Asia» جاۋاپكەرشىلىگى شەكتەۋلى سەرىكتەستىگى اراسىنداعى ستراتەگيالىق سەرىكتەستىك تۋرالى كەلىسىم؛

5. قازاقستان رەسپۋبليكاسى كولىك مينيسترلىگى مەن «SKYHANSA» جاۋاپكەرشىلىگى شەكتەۋلى سەرىكتەستىگى اراسىنداعى حالىقارالىق جۇك جانە جولاۋشىلار اۋەجايىنىڭ قۇرىلىسى بويىنشا جوبانى بىرلەسىپ ىسكە اسىرۋ جونىندەگى نەگىزگى كەلىسىم؛

6. «بايتەرەك» ۇبح» اق مەن «HORSCH Maschinen GmbH» اراسىنداعى ىنتىماقتاستىق تۋرالى كەلىسىم؛

7. «بايتەرەك» ۇبح» اق مەن «KfW Bankengruppe» اراسىنداعى ءوزارا تۇسىنىستىك تۋرالى مەموراندۋم؛

8. «بايتەرەك» ۇبح» اق مەن «CLAAS Global Sales GmbH» اراسىنداعى ىنتىماقتاستىق تۋرالى كەلىسىم؛

9. «ۇلتتىق تەحنولوگيالىق بولجاۋ ورتالىعى» رمك جانە گفر گەوعىلىمدار مەن تابيعي رەسۋرستاردىڭ فەدەرالدىق ينستيتۋتى (BGR) اراسىنداعى نيەت تۋرالى مەموراندۋم؛

10.«قازاقستان دامۋ بانكى» اق مەن Deutsche Bank اراسىنداعى مانداتتىق حات؛

11. «Qazaq Kalium Ltd.» اق جانە KfW Bankengruppe، Euler Hermes Group اراسىنداعى «باتىس قازاقستان وبلىسىنداعى «ءساتىمولا» كەن ورنى بازاسىنداعى كاليي تۇزدارى مەن بور قىشقىلىن وندىرەتىن بايىتۋ-وندىرىستىك كەشەنىن سالۋ» جوباسى بويىنشا ءوزارا ىنتىماقتاستىق تۋرالى مەموراندۋم؛

12. «اگروماشحولدينگ» اق جانە Amazonen-werke h. Dreyer Se & Co.Kg. اراسىنداعى قوستاناي وبلىسىندا «Condor» سەپكىشتەرىن بىرلەسىپ ءوندىرۋ بويىنشا جوبانى ىسكە اسىرۋ جونىندەگى كەلىسىم.