رەسەي پرەزيدەنتى ۆلاديمير پۋتين سولتۇستىك كورەياعا ساپارلاي باردى. بۇل ونىڭ شيرەك عاسىردان بەرگى العاشقى ساپارى دەۋگە بولادى. بۇگىن، 19 ماۋسىم كۇنى ەكى ەل اسكەري ىنتىماقتاستىقتى تەرەڭدەتۋ كەلىسىمىنە قول قويىستى. بۇل ەلىسىم ءبىر تاراپ شابۋىلعا ۇشىراعان جاعدايدا ەكىنشى تاراپتىڭ كومەك كورسەتۋ ۋادەسىن دە ءوز ىشىنە قامتيدى.
كەلىسىمنەن كەيىن ەكى ەل قارىم-قاتىناسىن كحدر باسشىسى "وداق" دەپ اتاسا، رەسەي پرەزيدەنتى قورعانىس ەلەمەنتتەرىن قامتيتىن «جان-جاقتى ستراتەگيالىق سەرىكتەستىك» دەپ مالىمدەدى.
جاھاندىق شيەلەنىس قىزىپ تۇرعان جاعدايدا ماسكەۋ مەن پيوڭياڭ (پحەنيان) قارىم-قاتىناسىنىڭ بۇلاي دامۋى باتىس ەلدەرىن الاڭداتارى انىق. سەبەبى، كەزدەسۋ بارىسىندا پيوڭياڭ ۋكرايناداعى سوعىستا رەسەيدى تاباندى قولدايتىنىن اشىق اڭعارتتى.
ال ۋكراينانى قولداۋشى باتىس ەلدەرى ءۇشىن بۇل الاڭداتارلىق جاعداي. باتىس ەلدەرى سولتۇستىك كورەيانىڭ يادرولىق نەمەسە بالليستيالىق زىمىراندارى ۋكرايناداعى سوعىسقا ارالاسىپ كەتە مە دەپ قاۋىپتەنەدى.
ماسكەۋ-پيوڭياڭ بايلانىسىنىڭ جەدەل دامۋى، اسىرەسە، سەۋل مەن ۆاشينگتوندى الاڭداتادى. قوس تاراپ تا ءپۋتيننىڭ كحدر ساپارىن قالت جىبەرمەي قاداعالاپ وتىر.
كورەي حالىقتىق دەموكراتيالىق رەسپۋبليكاسىنىڭ ەڭ جوعارى باسشىسى كيم جوڭ ۋن (كيم چەن ىن) ادەتتە شەتەلدىك ليدەرلەرمەن سيرەك كەزدەسەدى. بۇل رەت رەسەي باسشىسىن قارسى الۋ شاراسى اسا دابىرالى، ءارى سالتاناتتى ءوتتى. بۇل ەكى ەل ءوزارا مۇددەلەرىن توعىستىرىپ، تەرەڭ ىنتىماقتاستىققا بەت بۇرعانىن كورسەتەتىن ءبىر عانا بەلگى.
ديپلوماتيالىق ءىس-قيمىلدار مەن رەسمي مالىمدەمەگە قاراي وتىرىپ، رەسەي مەن سولتۇستىك كورەيا قورعانىس سالاسىن نەگىز ەتكەن بەرىك ىنتىماقتاستىق قۇرۋعا باسا نازار اۋداراتىنى تۇسىنىكتى بولدى. ال قوس ەلدىڭ بۇل قادامى قالاي دا ولاردىڭ ستراتەگيالىق باسەلەستەرىنە زور اسەرىن بەرەدى. ءارى بۇل جاھاندىق شيەلەنىستىڭ ءتىپتى دە كۇشەيە تۇسكەنىن تۇسىندىرەدى.
