ايماقتاعى جاڭا گەوساياسي جاعدايدا ءىرى ەلدەردىڭ ەلىمىزگە جانە ءبىزدى قامتىعان ايماقتاعى سىرتقى قاتىسۋى بەلسەندى بولا ءتۇستى. بۇل جاعدايدى ەلىمىز ساۋدا-ەكونوميكالىق قارىم-قاتىناستار نەگىزىندە ءتيىمدى پايدالانۋعا تىرىسىپ كەلەدى. ايتالىق، ءبىر اپتا بۇرىن قازاقستان مەن گەرمانيا اراسىندا جاساسقان كەلىسىمدەر دە ەلدىڭ ينوۆاسيالىق دامۋىنا وڭ اسەرىن بەرمەك.
ەلىمىزدىڭ گەوگرافيالىق ورنالاسۋى ەۋرازيا تورىندەگى اسا ماڭىزدى ستراتەگيالىق ارتىقشىلىققا يە. بۇل ارتىقشىلىق قازاقستاندى ورتا ازياداعى ەڭ ءىرى ساۋدا جانە لوگيتسيكا ورتالىعىنا اينالدىرۋعا ەڭ باستى مۇمكىندىكتى ءتۇزىپ بەرىپ وتىر. سوندىقتاندا شىعىس پەن باتىس اراسىندا ءقازىر ەڭ قىسقا ساۋدا جولى رەتىندە ۇسىنىلىپ كەلە جاتقان "ورتا ءدالىز" جوباسىنا دا كوپتەگەن تاراپتار قىزىعۋشىلىق تانىتادى. ەۋروپاعا جەتەتىن ەڭ قىسقا ءدالىز تولىق جۇزەگە اسقان جاعدايدا قازاقستان ارقىلى بۇل دالىزدەن وتەتىن تاۋار مولشەرى 10 ملن تونناعا دەيىن جەتەدى دەگەن بولجامدار بار. سوندىقتان دا ەلىمىز ءوزىنىڭ بولاشاق ەكونوميكالىق يندۋستريالدى جانە ينوۆاسيالىق دامۋىن ماڭىزدى ساۋدا-ەكونوميكالىق قارىم-قاتىناستارمەن، سونداي-اق، ماڭىزدى ساۋدا دالىزدەرىمەن بايلانىستىرادى.
بۇل باعىتتا رەسمي استانا ەۋروپالىق وداق ەلدەرىمەن قارىم-قاتىناستاردى دامىتا وتىرىپ شىعىس پەن باتىس اراسىنداعى ساۋدا-ساتتىقتى ءتىپتى دە دامىتا ءتۇسۋ ءۇشىن «ورتا ءدالىزدى» ءقازىر قولدانىستاعى ترانسەۋروپا كولىك جەلىسىمەن جانە ەۋروپا وداعىنىڭ «جاھان قاقپاسى» باستاماسىمەن ۇشتاستىرۋدى ۇسىنىپ كەلەدى. ورتالىق ازيا مەن ەۋروپانى تۇتاستىراتىن ماڭىزدى ساۋدا جولىنىڭ ءوزارا جالعاسۋى ءۇشىن ەڭ اۋەلى ەكى ايماق ەلدەرى اراسىنداعى ەكونوميكالىق بايلانىستاردىڭ قارقىندى دامۋى العى شارت بولماق.
ال قازاقستان مەن گەرمانيا اراسىنداعى، سوعان ىلەسە گەرمانيانىڭ ايماق ەلدەرىمەن ساۋدا قاتىناستارىنىڭ قارقىندى دامۋى وسى باعىتتاعى يندۋستريالىق ماقساتتاردىڭ ورىندالۋىنا جول اشىپ كەلەدى. ايتالىق، جاقىندا وتكەن "قازاقستان-گەرمانيا" بيزنەس فورۋىمىندا ەكى ەل باسشىلارى ءوزارا تاۋار اينالىمىن جوعارىلاتۋ، ءونىم وڭدەۋ، اۋىل شارۋاشىلىعى سىندى ناقتىى سەكتورلاردا ىنتىماقتاستىقتى ارتتىرۋ تۋراسىندا ورتاق باستامالاردى كوتەردى. ءارى ەكىجاقتى ماڭىزدى كەلىسىمدەرگە قول قويىستى.
وسى جيىندا مەملەكەت باسشىسى قاسىم-جومارت توقايەۆ: " قازاقستان ەۋرازياداعى جەتەكشى اقپاراتتىق تەحنولوگيالار ورتالىعىنا اينالۋدى كوزدەيدى. بىرىككەن ۇلتتار ۇيىمى قازاقستاندى سيفرلىق تەحنولوگيالاردى ەنگىزۋ جاعىنان ۇزدىك 30 ەلدىڭ قاتارىنا قوستى. ءبىز عىلىمي-زەرتتەۋ جوبالارى، ستارتاپتار، تەحنيكالىق ءبىلىم بەرۋ جانە ترەنينگتەر ۇيىمداستىرۋ، سونداي-اق جاساندى ينتەللەكت سالاسىنداعى جاڭا IT-جوبالاردى جۇزەگە اسىرۋ ارقىلى ىنتىماقتاستىقتى بارىنشا كەڭەيتۋگە ۇمتىلامىز، – دەگەن بولاتىن.
ەلىمىزدىڭ گەرمانيامەن ىنتىماقتاستىق نەگىزىندە ءبىرقاتار ناقتى سەكتوردى دامىتۋدى كوزدەيدى. سونىڭ ءبىرى اۋىلشارۋاشىلىعى سالاسى. قازاقستان – الەمدەگى ەڭ ءىرى بيداي ەكسپورتتاۋشىلاردىڭ ءبىرى. دەگەنمەن، مول تابىس اكەلەتىن جانە جىلدان جىلعا سۇرانىس ارىتىپ كەلە جاتقان سالانى دامىتۋدا ەلىمىز اگروونەركاسىپ كەشەنىن جاڭعىرتۋعا مۇددەلى بولىپ وتىر. اسىرەسە اۋىلشارۋاشىلىعى سالاسىندا جوعارى تەحنولوگيالاردى، اگروتەحنولوگيالىق يننوۆاسيالاردى ەنگىزۋدى كوزدەيدى. قازاقستان گەرمانيامەن «اسا ماڭىزدى شيكىزاتتى ينۆەستيسيا مەن تەحنولوگياعا ايىرباستاۋ» پراگماتيكالىق فورمۋلاسىنا ساي سەرىكتەستىك ورناتىپ، ەلدىڭ ينوۆاسيالىق دامۋىنا جاڭا كەڭىستىك اشۋدى كوزدەيدى.
The Alnews
