الماتىدا جول توسەمىنىڭ قىزمەت ەتۋ مەرزىمىن ارتتىرۋ جانە جولداردى جوندەۋ كەزىندە قارجىلىق شىعىنداردى ازايتۋ ماقساتىندا زاماناۋي تەحنولوگيالاردى قولدانا وتىرىپ عىلىمي زەرتتەۋلەر جۇرگىزىلۋدە، - دەپ حابارلايدى alnews.
قالالىق موبيلدىلىك باسقارماسىنىڭ حابارلاۋىنشا، جول جابىندىلارىنىڭ تەمپەراتۋراسى مەن ىلعالدىلىعىن، جولداردىڭ توپىراق نەگىزىن باقىلاۋ ماقساتىندا اۆتوماتتاندىرىلعان جۇيە كەشەندەرى پايدالانىلادى.
بۇگىندە 3 مەترگە دەيىنگى تەرەڭدىكتە ەكى جەردە، اباي داڭعىلىنىڭ باتىس باعىتىندا بەرەكە كوشەسىنىڭ قيىلىسىندا جانە گاگارين داڭعىلىندا جامبىل كوشەسىنىڭ قيىلىسىندا سولتۇستىك باعىتتا داچيكتەر ورناتىلدى.
جوبانىڭ عىلىمي كۋراتورى بولىپ تابىلاتىن جول عىلىمي-وندىرىستىك ورتالىعىنىڭ باسشىسى باعدات تەلتايەۆ تەمپەراتۋرا جولدىڭ بەرىكتىگى مەن قۋاتتىلىعىن انىقتايتىن نەگىزگى سيپاتتامالاردىڭ ءبىرى بولىپ تابىلاتىنىن اتاپ ءوتتى. ياعني، فازالىق اۋىسۋلاردى ەسكەرە وتىرىپ، ۋاقىت بويىنشا تەمپەراتۋرانىڭ وزگەرۋ زاڭدىلىقتارىن ءبىلۋ ماڭىزدى.
«جۇيە ستاسيونارلىق باقىلاۋ نۇكتەلەرىندە جول قۇرىلىمىنىڭ سۋ-جىلۋ رەجيمىنىڭ پارامەترلەرىن اۆتوماتتاندىرىلعان جيناۋدى جۇزەگە اسىرادى. جاز مەزگىلىندە تەمپەراتۋرانىڭ وزگەرۋ زاڭدىلىقتارى مەن سيپاتتامالارىن بەلگىلەي وتىرىپ، ءبىز اسفالتبەتونعا ءتوزىمدى پوليمەردى تاڭدايمىز. قىستا تەمپەراتۋرانىڭ وزگەرۋ زاڭدىلىقتارى مەن سيپاتتامالارىن بەلگىلەي وتىرىپ، ءبىز جارىققا ءتوزىمدى اسفالتبەتونعا ارنالعان پوليمەردى تاڭدايمىز. ناتيجەسىندە گيبريدتى پوليمەرى بار اسفالتبەتون الامىز»، - دەپ اتاپ ءوتتى باعدات تەلتايەۆ.
اكىمدىك جوبا ۇزاق مەرزىمدى بولىپ تابىلاتىنىن جانە قالانىڭ ءارتۇرلى بولىكتەرىندە تاعى 5 وسىنداي كەشەن ورناتۋ قاراستىرىلعانىن حابارلادى. سونداي-اق، «ورتا سالماقتاعى» كولىك قۇرالدارىنىڭ ۇلەسىن انىقتاۋ ءۇشىن الماتى قالاسىنىڭ نەگىزگى جول ۋچاسكەلەرىندە كولىك اعىنىنىڭ قارقىندىلىعى مەن قۇرامىن ولشەۋ بويىنشا جۇمىستار ورىندالاتىن بولادى.
ەستەرىڭىزگە سالا كەتەيىك، اعىمداعى جىلى قالادا ۇزىندىعى 250 كم بولاتىن 274 كوشە ورتاشا جوندەلدى، وسىلايشا، جولداردىڭ ۇلەسىن جاقسى جانە قاناعاتتانارلىق جاعدايدا 92% - عا دەيىن جەتكىزۋ جوسپارلانۋدا.
