كەمەرون ساپارىنىڭ ەكى ەل ءۇشىن دە وزىندىك ماڭىزى بار. ءارى بۇل ديپلوماتيالىق ءىس-قيمىل ايماقتاعى ساياسي جاعداي ءۇشىن دە ءوز سالماعى بار وقيعا. 

بريتانيا ەلىمىزدەگى ءىرى ينۆەستور رەتىندە: 

سوڭعى 20 جىلدا بريتاندىق تىكەلەي ينۆەستيسيا كولەمى 17 ميلليارد دوللارعا جەتكەن. بۇنىمەن بريتانيا ەلىمىزدەگى ەڭ ءىرى 10 ينۆەستوردىڭ ءبىرى بولىپ سانالادى. بىلتىر ۇلىبريتانيانىڭ ەلىمىز ەكونوميكاسىنا سالعان ينۆەستيسياسى 20 پايىزعا ءوسىپ، 795 ميلليون دوللاردى قۇراعان. ەلىمىزدە ءقازىر 600-گە جۋىق بريتاندىق بيزنەستىڭ كاپيتالىمەن قۇرىلعان كاسىپورىن جۇمىس ىستەپ تۇر. ولاردىڭ قاتارىندا Shell، RioTinto، Ernst and Young، AstraZeneca سياقتى الەمگە بەلگىلى ءىرى كومپانيالار دا بار.

قازاقستانداعى جانە ايماقتاعى اعىلشىن مۇددەسى 

بىرىككەن كورولدىكتىڭ باس ديپلوماتى بىرلەسكەن باسپا ءسوز جىيىنىندا ەلىمىزدە بولاشاقتا ينۆەستيسيا سالۋعا بولاتىن كوپتەگەن مۇمكىندىكتەر بار ەكەنىن ايتىپ. «ءبىز ماڭىزدى پايدالى قازبالار بويىنشا سەرىكتەستىككە قول قويدىق. ءارى بريتاندىق تاۋ-كەن كومپانيالارىنا وسى سالاعا قاتىسۋى بويىنشا قىزىقتى ۇسىنىستارىمىز دا بار»، - دەدى كەمەرون. دەمەك، بريتان تارابى ەلىمىزدەگى تابيعي رەسۋرستاردى يگەرۋ بويىنشا دا قىزىعۋشىلىققا يە. 

كەمەروننىڭ كىندىك ازياداعى كەزەكتى ساپارى قازاقستانمەن اقىرلاسپايدى. سوڭعى نۇكتەدە موڭعوليا تۇر. ماسەلە، وسى الىپ ايماقتاعى كۇن سايىن ماڭىزدى بولا تۇسكەن گەوستراتەگيالىق سالماق لوندون نازارىن اۋدارماي قويمايدى. ونىڭ ۇستىنە ايماقتا بولاشاق ەنەرگيا كوزىنە قاجەتتى مول تابيعي بايلىقتىڭ بار ەكەنىن دە ەسكەرۋ كەرەك. بۇنى قازىرشە جالپىلاما تۇردە سيرەك جەر ەلەمەنتتەرى دەپ اتاپ ءجۇرمىز. كليمات وزگەرىسىنە بايلانىستى الەم ەلدەرى قورشاعان ورتاعا بارىنشا از زيان كەلتىرەتىن ەنەرگيا ءوندىرۋ جولىن قاراستىرۋدا. اەس ءۇشىن دە ايماقتا مول ۋران قورىنىڭ بار ەكەنى بەلگىلى. بۇنىڭ بارىندە دامىعان ەلدەر اراسىندا ۇلكەن باسەكە بار. جانە وسى باسەكەلىك قارىم-قاتىناس ايماقتاعى كۇشتەر تەڭگەرىمىنە دە ءوز وزگەرىستەرىن اكەلۋدە. بريتانيادان كەلگەن ديپلومات بۇل جولى بولاشاققا قاتىستى وسى ماڭىزدى باعىتتار بويىنشا ءوز ەلىنىڭ جانە ايماقتىڭ مۇددەسىن توعىستىرۋدى كوزدەگەنى انىق.