يران تۇرعىسىنان:
- باتىل قادام رەتىندە قاراۋعا بولادى. سەبەبى، شابۋىل العاش رەت ءوز تەرريتورياسىنان تىكەلەي جاسالدى.
- داماسك قالاسىنداعى شابۋىلدان كەيىن ەل ىشىندە بيلىككە دەگەن نارازىلىق كۇشەيدى (يراندا حومەنەي رەجيمىنە دەگەن نارازىلىق تۇراقتى تۇردە بار).
- تەھران (تەگەران) ەڭ الدىمەن ىشكى نارازىلىقتارعا جاۋاپ رەتىندە اۋە سوققىلارىن جاسادى دەگەن كوزقاراس ساراپشىلار اراسىندا باسىم.
- شابۋىل ناتيجەسىنە قاراپ يران تارابى اۋە سوققىلارى «تابىستى» بولماعانىن كورەمىز. يزرايلگە ايتارلىقتاي شىعىن كەلگەن جوق. ءبىر عانا اسكەري نىسانداعى ينفراقۇرىلىم ءبۇلىندى.
- شابۋىلدا تاكتيكالىق ۇشقىشسىز ۇشاقتار قولدانىلدى. بۇل اۋە قورعانىس جۇيەسى وڭاي ۇستاپ الاتىن ءتۇرى. وسىعان قاراپ يران تۇبەگەيلى قاقتىعىس بولۋىن قالامايدى دەگەن پىكىرلەر شىقتى.
- يران ءيزرايلدىڭ قاتاڭ جاۋابىن قالامايتىنىن اڭعارتتى. انىعىندا قوس تاراپتا جاڭا سوعىس الاڭىن اشۋعا قۇلىقسىز.
يزرايل تۇرعىسىنان:
- رەسمي مالىمدەمەلەردە قاتاڭ جاۋاپ قايتاراتىنىن ەسكەرتكەن، ءبىراق قازىرگە دەيىن تەڭ جاۋاپ بەرىلگەن جوق.
- اۋە شابۋىلى تەل-اۆيۆتىڭ ايماقتاعى يميدجىنە كەرى اسەرى بولعانى انىق. بۇل وزىنە قارسى كۇشكە قاتاڭ ۇستانىمداعى ءيزرايلدىڭ ءداستۇرلى مەتوتىنا وزگەرىس اكەلدى.
- حاماسپەن سوعىس كەزىندە جاڭا شەپتە سوعىسۋ يزرايل ءۇشىن دە تۇبەگەيلى ءتيىمسىز.
ورتا شىعىس كارتيناسىنان:
يران مەن يزرايل ايماقتاعى نەگىزگى ويىنشىلاردىڭ قاتارىندا. ءارى باستى قارسىلاستار. اسىرەسە امەريكا قۇراما شتاتتارىنىڭ ايماقتاعى ساياساتىنا باستى كەدەرگى رەتىندە قاراستىرىلادى. ءيزرايلدىڭ قاتاڭ جاۋاپ بەرمەۋىنە ۆاشينگتون ىقپال ەتتى دەگەندى كوپتەگەن ساراپشىلار قۇپتايدى. اقش ۇدايى يراندى ايماقتاعى ءقاۋىپتى كۇش ورتالىعى رەتىندە كورسەتەدى. بۇل ارقىلى اراب ەلدەرىمەن ىنتىماقتاستىقتى ۇستاي الادى جانە يزرايل، تۇركيا سىندى وداقتاستارىن دا وزىنە تارتۋعا قولدانادى. يراننىڭ كەزەكتى ارەكەتى جانە ونىڭ ناتيجەسى يراننىڭ ءقاۋىپ كۇشى تىم ارتىق كورسەتىلەتىنىن دە اڭعارتقانداي بولدى.
مىنە بۇلارعا قاراپ ايماقتا اۋقىمدى قاقتىعىس مۇمكىندىگى ءالى دە جوعارى ەمەس. ءارى ونىڭ مۇمكىندىگىنە امەريكا قۇراما شتاتتارى شەشۋشى ءرول اتقاراتىنىن تۇسىنە الامىز. يراننىڭ سوعىسقا تارتىلۋى شىعاناقتاعى تۇراقتىلىققا ۇلكەن ءقاۋىپ توندىرەدى، ءارى بۇل الەمدىك مۇناي باعاسىنا اسەر ەتەدى. بۇل تۇرعىدان قاراپ قىسقا مەرزىمدى پرەسپەكتيۆادا اۋقىمدى سوعىستىڭ اۋىلى الىس دەگەن بولجام ايتۋعا بولادى.
