الماتىدا پارلامەنت دەپۋتاتتارىنىڭ، قوعامدىق ۇيىمدار وكىلدەرىنىڭ، الەۋمەتتىك سالا، ءبىلىم بەرۋ قىزمەتكەرلەرى مەن جاستاردىڭ قاتىسۋىمەن كەزدەسۋلەر سەرياسى جالعاسۋدا. ديالوگ الاڭدارى بارىسىندا ەل دامۋىنىڭ نەگىزگى باعىتتارى، الەۋمەتتىك ساياسات، ءبىلىم بەرۋ مەن دەنساۋلىق ساقتاۋ ماسەلەلەرى، سونداي-اق مەملەكەتتىك جۇيەنى ودان ءارى جەتىلدىرۋگە باعىتتالعان باستامالار تالقىلانۋدا.
تالقىلاۋ الاڭدارىنىڭ ءبىرى بالالارعا جەدەل مەديسينالىق كومەك كورسەتۋ ورتالىعىندا ءوتتى. مۇندا ق ر پارلامەنتى سەناتىنىڭ دەپۋتاتتارى «ادىلەتتى جانە پروگرەسسيۆتى قازاقستاننىڭ حالىقتىق كونستيتۋسياسى ءۇشىن!» جالپىۇلتتىق كواليسياسىنىڭ جانە AMANAT پارتياسىنىڭ وكىلدەرىمەن بىرگە مەكەمە ۇجىمىمەن كەزدەستى. قاتىسۋشىلار الەۋمەتتىك ساياسات پەن دەنساۋلىق ساقتاۋ جۇيەسىن دامىتۋ ماسەلەلەرىن تالقىلادى.
سەناتور سۇلتانبەك ماكەجانوۆ بيۋدجەتتىڭ الەۋمەتتىك باعىتتىلىعى مەملەكەتتىك ساياساتتىڭ نەگىزگى باسىمدىقتارىنىڭ ءبىرى بولىپ قالا بەرەتىنىن اتاپ ءوتتى. ونىڭ ايتۋىنشا، قاراجاتتىڭ ەداۋىر بولىگى دەنساۋلىق ساقتاۋ، ءبىلىم بەرۋ جانە الەۋمەتتىك سالانى دامىتۋعا باعىتتالادى. سونداي-اق ول 2025 جىلدىڭ قورىتىندىسى بويىنشا الماتىدا العاشقى مەديسينالىق-سانيتارلىق كومەك كورسەتەتىن ەكى ورتالىق پەن جاڭا ەمحانا پايدالانۋعا بەرىلگەنىن، جەدەل مەديسينالىق جاردەم قىزمەتىنىڭ اۆتوپاركى تولىق جاڭارتىلعانىن، ال دەنساۋلىق ساقتاۋ سالاسىن قارجىلاندىرۋ 25%-عا وسكەنىن جەتكىزدى.
سەنات دەپۋتاتى نۇريا نيازوۆا قوعامدىق قاتىسۋ ينستيتۋتتارىنىڭ ماڭىزدىلىعىنا توقتالىپ، مەملەكەت پەن قوعام اراسىنداعى ءوزارا ءىس-قيمىل تەتىكتەرىنىڭ ءبىرى رەتىندە حالىق كەڭەسىنىڭ قۇرىلۋىن اتاپ ءوتتى.
كونستيتۋسيالىق وزگەرىستەرگە قاتىستى ماسەلەلەر قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعى ۇجىمىمەن وتكەن كەزدەسۋدە دە تالقىلاندى. سەناتورلار كونستيتۋسيا جوباسىنىڭ نەگىزگى جاڭاشىلدىقتارى تۋرالى ايتىپ، ولاردىڭ قاتارىندا وتباسى ينستيتۋتىن دامىتۋ جانە ءبىلىم بەرۋ سالاسىن قولداۋ ماسەلەلەرى بار ەكەنىن اتاپ ءوتتى.
نۋريا نيازوۆانىڭ ايتۋىنشا، نەگىزگى زاڭ جوباسىندا وتباسىنىڭ ءرولى مەن اتا-انالاردىڭ بالا تاربيەسىنە جاۋاپكەرشىلىگىنە ەرەكشە نازار اۋدارىلعان، سونداي-اق وتباسى ەر مەن ايەلدىڭ وداعى رەتىندە بەلگىلەنگەن. سەناتور جاننا اسانوۆا قۇجاتتا ازاماتتاردىڭ نەگىزگى قۇقىقتارى مەن بوستاندىقتارى، سونىڭ ىشىندە ءبىلىم بەرۋ سالاسىنا قاتىستى نورمالار كورىنىس تاپقانىن اتاپ ءوتتى. كەزدەسۋ بارىسىندا دەپۋتاتتار قاتىسۋشىلاردىڭ كونستيتۋسيا جوباسىنا ەنگىزىلگەن جاڭا ينستيتۋتتارعا، ونىڭ ىشىندە ءبىر پالاتالى پارلامەنت پەن حالىق كەڭەسى ينستيتۋتىنا قاتىستى سۇراقتارىنا جاۋاپ بەردى.
جاڭا كونستيتۋسيا جوباسى «شاپاعات» الەۋمەتتىك قىزمەتتەر كورسەتۋ ورتالىعىندا دا تالقىلاندى. مۇندا جالپىۇلتتىق كواليسيا مۇشەلەرى ۇسىنىلىپ وتىرعان وزگەرىستەردىڭ ساياسي جۇيەنى جاڭعىرتۋعا جانە ازاماتتاردىڭ قۇقىقتارى مەن بوستاندىقتارىنىڭ كەپىلدىكتەرىن نىعايتۋعا ىقپالى تۋرالى ايتىپ بەردى. مەملەكەتتىك باسقارۋدىڭ اشىقتىعىن ارتتىرۋ جانە قوعام مەن بيلىك اراسىنداعى ءوزارا ءىس-قيمىلدى كەڭەيتۋ ماسەلەلەرىنە ەرەكشە نازار اۋدارىلدى.
سۇلتانبەك ماكەجانوۆ كونستيتۋسيانى جاڭعىرتۋ قازىرگى زامان تالاپتارى مەن قوعامنىڭ دامۋ سۇرانىسىنا بايلانىستى ەكەنىن اتاپ ءوتتى. ونىڭ ايتۋىنشا، كونستيتۋسيا جوباسىن ازىرلەۋ جونىندەگى جۇمىس توبىنا ازاماتتاردان 10 مىڭنان استام ۇسىنىس تۇسكەن، بۇل قوعامنىڭ جوعارى بەلسەندىلىگىن كورسەتەدى.
جاننا اسانوۆا جاڭا كونستيتۋسيا ءاربىر ازاماتتىڭ مۇددەسىن ەسكەرەتىن جانە قوعامدىق كەلىسىمدى نىعايتۋعا ىقپال ەتەتىن قۇجات بولۋى ءتيىس ەكەنىن اتاپ ءوتتى. ول نەگىزگى باعىتتاردىڭ قاتارىندا زاڭ ۇستەمدىگىن قامتاماسىز ەتۋ جانە سوت جۇيەسىنىڭ تاۋەلسىزدىگىن ودان ءارى نىعايتۋدى اتادى. تالقىلاۋ بارىسىندا ورتالىق قىزمەتكەرلەرى الەۋمەتتىك سالانى دامىتۋ ماسەلەلەرىن كوتەردى.
ەسكە سالايىق، مەملەكەت باسشىسىنىڭ جارلىعىنا سايكەس جاڭا كونستيتۋسيانى قابىلداۋ جونىندەگى رەسپۋبليكالىق رەفەرەندۋم 15 ناۋرىزعا جوسپارلانعان.
