الماتىدا جاڭا كونستيتۋسيا جوباسى مەن رەفەرەندۋم وتكىزۋ ماسەلەلەرى بويىنشا جاريا تالقىلاۋلار جالعاسۋدا، - دەپ حابارلايدى alnews.
«ادىلەتتى جانە پروگرەسسيۆتى قازاقستاننىڭ حالىق كونستيتۋسياسى ءۇشىن!» جالپىۇلتتىق كواليسياسىنىڭ مۇشەلەرى قازاق ۇلتتىق اگرارلىق زەرتتەۋ ۋنيۆەرسيتەتىنىڭ پروفەسسور-وقىتۋشىلار قۇرامى مەن ستۋدەنتتەرىمەن كەزدەستى.
ءىس-شارانىڭ ماقساتى – جاڭا كونستيتۋسيا جوباسىنىڭ مازمۇنىن ءتۇسىندىرۋ، سونداي-اق كونستيتۋسيالىق رەفورمالاردىڭ ءمانىن تالقىلاۋ بولدى.
پارلامەنت سەناتىنىڭ دەپۋتاتتارى رەفورمالاردىڭ مەملەكەتتىك باسقارۋ جۇيەسىن جەتىلدىرۋگە، زاڭ ۇستەمدىگىن نىعايتۋعا، ازاماتتاردىڭ قۇقىقتارى مەن قاۋىپسىزدىگىن قورعاۋدى كۇشەيتۋگە باعىتتالعانىن اتاپ ءوتتى.
– قازاقستان حالىق كەڭەسىن – بۇكىل حالىقتىڭ مۇددەسىن بىلدىرەتىن جوعارى كونسۋلتاتيۆتىك ورگاندى قۇرۋ قوعامدىق ديالوگتى ينستيتۋسيونالداندىرۋ جولىنداعى ماڭىزدى قادام بولىپ تابىلادى. حالىق كەڭەسى زاڭ شىعارۋ باستاماسى قۇقىعىنا يە بولا وتىرىپ، ىشكى ساياسات بويىنشا ۇسىنىستار ازىرلەۋ، قوعامدىق كەلىسىمدى نىعايتۋ جانە جالپىۇلتتىق قۇندىلىقتاردى ىلگەرىلەتۋ الاڭىنا اينالادى، – دەپ اتاپ ءوتتى سەناتور نۋريا نيازوۆا.
كەزدەسۋ بارىسىندا اگرارلىق عىلىمدى دامىتۋ، اگروونەركاسىپتىك كەشەنگە يننوۆاسيالىق تەحنولوگيالاردى ەنگىزۋ، عىلىمي ناتيجەلەردى وندىرىسكە ءتيىمدى ترانسفەرتتەۋ جانە باسەكەگە قابىلەتتى كادرلار دايارلاۋ ماسەلەلەرى دە قاراستىرىلدى.
سونىمەن قاتار قازاق ۇلتتىق ۋنيۆەرسيتەتىندە پارلامەنت سەناتى دەپۋتاتتارىنىڭ ۋنيۆەرسيتەت ستۋدەنتتەرى مەن وقىتۋشىلارىمەن كەزدەسۋى ءوتتى. كەزدەسۋدىڭ باستى تاقىرىبى – جاڭا كونستيتۋسيا جوباسىن ءتۇسىندىرۋ بولدى.
كەزدەسۋگە قاتىسۋشىلار مەملەكەتتىك ينستيتۋتتاردىڭ تيىمدىلىگى مەن جاڭا ساياسي مادەنيەتتى قالىپتاستىرۋ ماسەلەلەرىن تالقىلاپ، جاستاردىڭ ەل تاعدىرىنا سانالى تۇردە قاتىسۋىنىڭ ماڭىزدىلىعىن اتاپ ءوتتى.
سەنات دەپۋتاتى دارحان ءقىدىرالى جاھاندىق باسەكەلەستىك جاعدايىندا ەلدىڭ جەدەل دامۋى قاجەتتىگىنە ەرەكشە نازار اۋداردى.
– تەك ينەرسيامەن ءوسىپ كەلگەن كەزەڭ ارتتا قالدى. بۇگىندە قىسقا ۋاقىتقا بولسا دا ارتتا قالۋ ەلەۋلى شىعىندارعا الىپ كەلۋى مۇمكىن، – دەدى سەناتور.
ول سونداي-اق عىلىم، ءبىلىم جانە تەحنولوگيالىق دامۋ باسىمدىقتارى كونستيتۋسيا جوباسىندا كورىنىس تاپقانىن اتاپ ءوتتى.
قازۇۋ پروفەسسورى، زاڭ عىلىمدارىنىڭ دوكتورى ەركىن دۇيسەنوۆ ۇسىنىلىپ وتىرعان تۇزەتۋلەردىڭ اۋقىمى ءىس جۇزىندە جاڭا نەگىزگى زاڭدى قابىلداۋدى بىلدىرەتىنىن ايتتى.
– بۇگىندە جاڭا كونستيتۋسيا جوباسىنا 84 % وزگەرىس ەنگىزىلدى. بۇل ەندى جاڭا كونستيتۋسيا تۋرالى ءسوز بولىپ وتىرعانىن بىلدىرەدى، – دەدى ول.
ەسكە سالا كەتەيىك، مەملەكەت باسشىسىنىڭ جارلىعىنا سايكەس 15 ناۋرىزدا قازاقستان رەسپۋبليكاسىنىڭ جاڭا كونستيتۋسياسىن قابىلداۋ بويىنشا رەسپۋبليكالىق رەفەرەندۋم وتكىزۋ جوسپارلانعان.
