وڭتۇستىك كورەيا پرەزيدەنتى يۋن سوك يۋەننىڭ ەلدە اسكەري جاعداي جاريالاۋىنا بايلانىستى پارلامەنت وعان يمپيدجمەنت جاريالاعان بولاتىن. پرەزيدەنت يۋن ءوز ارەكەتىن ەلدىڭ دەموكراتياسىن قاۋىپتەن قۇتقارۋ ءۇشىن جاسالعان ورىندى ارەكەت دەپ سانايدى. الايدا ونىڭ كەلتىرگەن ۋاجىنە انىق دالەل جوق.
ال جۇما كۇنى ەلدىڭ سىبايلاس جەمقورلىققا قارسى كۇرەس قىزمەتى پرەزيدەنتتى تۇتقىنداۋعا وردەر الىپ رەزيدەنسياسىنا بارعانىمەن ماقساتتارىنا قول جەتكىزە المادى. پرەزيدەنتتىڭ كۇزەت قىزمەتى ولاردى رەزيدەنسياعا كىرگىزبەي قويعان. سوڭىندا يۋن سوك يۋەنى كوتەرىلىسكە شىقتى دەگەن ايىپپەن قاماۋعا الۋ جۇزەگە اسپاي قالدى.
«پرەزيدەنتتىڭ جەكە قاۋىپسىزدىك كومانداسىمەن ۇزاققا سوزىلعان كيكىلجىڭگە بايلانىستى ءبىز قاماۋعا الۋ تۋرالى بۇيرىقتى ورىنداۋ مۇمكىن ەمەس دەپ سانايمىز»، - دەدى تەرگەۋشىلەر مالىمدەمەسىندە.
كوپتەگەن ساراپشىلار يۋننىڭ جاۋاپ بەرۋدەن باس تارتۋ ارەكەتى ساياسي داعدارىستى تەرەڭدەتىپ، ەلدەگى تۇراقسىزدىقتى كۇشەيتەدى دەپ سانايدى. قازىرشە ونى قولعا الۋ ارەكەتى قايتا جالعاسا ما، جوق پا دەگەن سۇراقتا جاۋاپسىز كۇيدە تۇر.
تۇتقىنداۋعا بارعاندار پرەزيدەنتتىڭ جەكە كۇزەت قىزمەتىمەن قاقتىعىسقا تۇسكەن دەگەن دە مالىمەتتەر تارادى. ال پرەزيدەنت سارايىنىڭ ماڭىندا يۋننىڭ جاقتاستارى ەرەۋىلدەتىپ، وعان قولداۋ ءبىلدىردى. پرەزيدەنت يۋن ولارعا قاراتا مالىمدەمە جاساپ، العىسىن دا بىلدىرگەن، ءارى ءوزىنىڭ كورەيانىڭ دەموكراتياسىن قورعاپ قالۋ ءۇشىن سوڭىنا دەيىن كۇرەسەتىنىن جەكتىزگەن. سوڭعى كۇندەرى ونىڭ مىڭداعان جاقتاستارى شەنەۋنىكتەردىڭ ونى تۇتقىنداۋىنا جول بەرمەيتىندەىن ءبىلدىرىپ، رەزيدەنسيا ماڭىنا لاگەر دە قۇرعان. ءتارتىپتى ساقتاۋ ءۇشىن جاقىن ماڭدا كوپ پوليسيا قىزمەتكەرلەرى جۇمىلدىرىلدى.
پارلامەنت پرەزيدەنت يۋنعا وتكەن ايدا يمپيچمەنت جاريالادى. ول تەرگەۋشىلەردىڭ جاۋاپ الۋ ءۇشىن شاقىرتۋلارىن بىرنەشە رەت كەرى قايتاردى. ءارى اسكەري جاعداي جاساۋ پرەزيدەنتكە بەرىلگەن زاڭدى وكىلەتتىلىك ەكەنىن العا تارتقان. ايتا كەتەيىك، بۇنداي جاعداي ەلدە 45 جىلدا العاش رەت ورىن الىپ وتىر.
قاماۋعا الۋ تۋرالى بۇيرىق سەيسەنبى كۇنى شىعارىلعان. سوت وردەرىن جوعارى لاۋازىمدى باسشىلاردىڭ قاتىسۋىمەن قىلمىستىق ىستەردى قارايتىن تاۋەلسىز مەملەكەتتىك مەكەمە سىبايلاس جەمقورلىقتى تەرگەۋ باسقارماسى العان. ەگەر شەنەۋنىكتەر يۋندى تۇتقىنداۋدى جالعاستىرعىسى كەلسە 48 ساعات ىشىندە سوتقا تاعى دا قاماۋعا الۋ وردەرىن شىعارۋعا جۇگىنە الادى.
