قازاقتىڭ ءبىر تۋار پەرزەنتى، مىڭ جىلدىقتىڭ اماناتىن ارقالاپ، ۇلتىنىڭ ۇلان-قايىر تاريحىن تۇگەندەگەن جازۋشى مۇحتار مۇقان ۇلى ماعاۋين ومىردەن ءوتتى. 10 قاڭتاردىڭ تاڭىندا 85 جاسقا قاراعان شاعىندا اقش-تىڭ مەريلەند شتاتىندا ءوز ۇيىندە اقتىق دەمىن تاۋىستى.
ۇلى قالامگەردىڭ قازاسىنا كۇللى جۇرتى قايعىرىپ، ازا ءبىلدىرىپ جاتقانى ءمالىم. مەملەكەت باسشىسى قاسىم-جومارت توقايەۆ تا مارقۇمنىڭ وتباسىنا، تۋعان-تۋىستارىنا كوڭىل ايتۋ جەدەل حاتىن جولدادى.
مۇحتار مۇقان ۇلى ماعاۋين 1940 جىلى 29 قاڭتاردا سول كەزدەگى سەمەي وبلىسى شۇبارتاۋ اۋدانىندا تۋعان. 1962 جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن، 1965 جىلى اسپيرانتۋراسىن تامامداعان. "قازاق ادەبيەتى" گازەتىنىڭ ءبولىم مەڭگەرۋشىسى، "جازۋشى" باسپاسىندا باس رەداكتوردىڭ ورىنباسارى، قازاق كسر عىلىم اكادەمياسىنىڭ م.اۋەزوۆ اتىنداعى ادەبيەت جانە ونەر ينستيتۋتىندا اعا عىلىمي قىزمەتكەر بولىپ قىزمەت اتقارعان. ماسكەۋدە م.گوركي اتىنداعى ادەبيەت ينستيتۋتىند قازاق فولكلورى مەن قازاق ادەبيەتى تاريى بويىنشا ارناى لەكسيالىق كۋرسترا جۇرگىزگەن. 1984-1986 جىلدارى "جازۋشى" باسپاسىنىڭ باس رەداكتورى، 1988-2006 جىلدار اراسىندا "جۇلدىز" جۋرنالىنىڭ باس رەداكتورى بولدى. "الاساپران" تاريحي رومان-ديلوگياسى ءۇشىن قازاق كسر-نىڭ اباي اتىنداعى مەملەكەتتىك سىيلىعى بەرىلدى.
م.ماعاۋين باسپا ءسوز بەتىندە 1959 جىلدان باستاپ تانىلا باستادى. 60-جىلدار ىشىنەدە ول ادەبيەت زەرتتەۋشىسى رەتىندە ايگىلى بولدى. "قازاقستاننىڭ حالىق جازۋشىسى" اتاعىنىڭ (1984)، تۇركيانىڭ حالىقارالىق "تۇرىك دۇنيەسىنە قىزمەت" سىيلىعىنىڭ (1997) يەگەرى، "تارلان" سىيلىعىنىڭ لاۋرەاتى (2002)، قازاقستاننىڭ قۇرمەتتى جازۋشىسى اتاعى بەرىلگەن (2019).
2006 جىلدىڭ سوڭىندا چەح رەسپۋبليكاسىنا قونىس اۋدارىپ، كەيىننەن اقش جانە تۇركيا ەلدەرىندە تۇردى. وسى كەزەڭدەردە سۇبەلى تاريحي ەڭبەكتەرىن – "شىعىسحان جانە ونىڭ زامانى"، "التىنوردا" شىعارمالارىن ومىرگە اكەلدى. قازاقتىڭ مىڭ جىلدىق تاريحىن تۇگەندەۋ جولىندا كۇش-جىگەرىن سارىقا جۇمسادى.
ۇجىمىمىز اتىنان كۇللى قازاق حالقىنا، وتانداستارعا قايعىرا كوڭىل ايتامىز! مارقۇمنىڭ جانى ءجانناتتا، رۋحى بەيىشتە شالقىسىن!
