قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىندا پرەمەر-مينيستر ولجاس بەكتەنوۆ ەكونوميكانىڭ تۇراقتى دامۋىن قامتاماسىز ەتۋ بويىنشا جۇرگىزىلىپ جاتقان جۇمىستار تۋرالى باياندادى، - دەپ حابارلايدى alnews.
ولجاس بەكتەنوۆ مەملەكەت باسشىسىنىڭ ەل ەكونوميكاسىن ودان ءارى نىعايتۋ جونىندەگى العا قويعان مىندەتتەرىنە، قازاقستان حالقىنا جولداۋىندا بەلگىلەنگەن ستراتەگيالىق ماقساتتارعا سايكەس ۇكىمەت 2025 جىلى جۇيەلى وزگەرىستەرگە باعىتتالعان ءىس-شارالار قابىلداعانىن اتاپ ءوتتى.
سالىق، تاريف جانە بيۋدجەت ساياساتىندا، سيفرلىق جانە قۇرىلىس سەكتورلارىندا، سونداي-اق الەۋمەتتىك سالادا قابىلدانعان شەشىمدەر ەكونوميكانى دامىتۋعا توسقاۋىل بولىپ وتىرعان قۇرىلىمدىق ديسپروپورسيالاردى جويۋعا باعىتتالدى.
سالىق جانە بيۋدجەت رەفورماسى ۇلتتىق قوردان نىسانالى ترانسفەرتتەردى الماي-اق، ەلىمىزدىڭ ءۇش جىلدىق بيۋدجەتىن قالىپتاستىرۋعا مۇمكىندىك بەردى. ول 2028ء-شى جىلعا قاراي بيۋدجەت تاپشىلىعىن جالپى ىشكى ءونىمنىڭ 0،9%-نا دەيىن قىسقارتۋعا ىقپال ەتەدى. جەرگىلىكتى بيۋدجەتتەردىڭ رەسپۋبليكالىق بيۋدجەتكە تاۋەلدىلىگى 2025ء-شى جىلعى 50%-دان 2028 جىلى 34%-عا دەيىن تومەندەيدى، — دەدى ولجاس بەكتەنوۆ.
جۇزەگە اسىرىلعان رەفورمالار كەزەڭىندە 2025 جىلدىڭ قورىتىندىسى بويىنشا ەكونوميكانىڭ ورنىقتى ءوسىمىن ساقتاپ قالۋعا قول جەتكىزىلدى. قۇندىق ماندە ءجىو-نىڭ ءوسۋى $20،1 ملرد-تى قۇرادى.
جالپى، 2025 جىلى ءجىو ءوسىمى 6،5% قۇرادى. ەكونوميكالىق ءوسىمدى نەگىزگى سالالاردىڭ جەدەل دامۋى قامتاماسىز ەتتى: ونىڭ ىشىندە كولىك – 17،8%-عا، قۇرىلىس – 14،6%-عا، تاۋ-كەن ونەركاسىبى – 17،4%-عا، وڭدەۋ ونەركاسىبى – 12،2%-عا، ساۋدا – 26%-عا جانە اۋىل شارۋاشىلىعى – 5،9%-عا ءوستى.
