الماتى قالاسىنىڭ اۋەزوۆ اۋدانىنداعى كوميۋنيتي-ورتالىقتا قازاقستان رەسپۋبليكاسىنىڭ جاڭا كونستيتۋسيا جوباسىن تالقىلاۋعا ارنالعان قالا جاستارىنىڭ قاتىسۋىمەن ينتەللەكتۋالدى Meet-up ءوتتى. كەزدەسۋ ءماجىلىس دەپۋتاتتارىن، كونستيتۋسيالىق رەفورما جونىندەگى كوميسسيا مۇشەلەرىن، ساراپشىلاردى جانە جاس بەلسەندىلەردى بىرىكتىرىپ، جاساندى ينتەللەكت قۇرالدارىن پايدالانۋ ارقىلى ينتەراكتيۆتى فورماتتا ۇيىمداستىرىلدى، - دەپ حابارلايدى alnews.
ءىس-شارا اشىق ديالوگ الاڭىنا اينالىپ، وندا جاستار تەك سۇراق قويىپ، ءوز پىكىرلەرىن ءبىلدىرىپ قانا قويماي، ولاردى جاساندى ينتەللەكتتىڭ اناليتيكالىق قورىتىندىلارىمەن سالىستىردى. باعدارلامانىڭ ەرەكشە بولىگى رەتىندە الماتىلىق جاستار اراسىندا كونستيتۋسيالىق باتل وتكىزىلدى.
تالقىلاۋعا كونستيتۋسيالىق رەفورما جونىندەگى كوميسسيا مۇشەلەرى، ق ر پارلامەنتى ءماجىلىسىنىڭ دەپۋتاتتارى ايدوس سارىم، جاناربەك ءاشىمجان، ءۇنزيلا شاپاق، جاستار ۇيىمدارىنىڭ وكىلدەرى، ساراپشىلار قاۋىمداستىعى، كوميۋنيتي-ورتالىقتاردىڭ، قوعامدىق بىرلەستىكتەر مەن مەديانىڭ باسشىلارى قاتىستى. قالانىڭ بەلسەندى جاستارى جاڭا كونستيتۋسيا جوباسىن قولداپ، ەنگىزىلىپ وتىرعان جاڭاشىلدىقتاردىڭ ەل بولاشاعى ءۇشىن ماڭىزدىلىعىن اتاپ ءوتتى.
كەزدەسۋدىڭ نەگىزگى ماقساتى — جاڭا كونستيتۋسيا جوباسىن جان-جاقتى تالقىلاۋ، جاستاردىڭ ازاماتتىق بەلسەندىلىگىن ارتتىرۋ، قۇقىقتىق مادەنيەتتى دامىتۋ جانە زاماناۋي تەحنولوگيالاردى قولدانۋ ارقىلى سىني ويلاۋ داعدىلارىن قالىپتاستىرۋ.
جاس عالىم اكەجان كەڭەسوۆ كەزدەسۋدىڭ جاڭا فورماتىنىڭ ماڭىزدىلىعىن اتاپ ءوتتى:
«جاساندى ينتەللەكت قۇرالدارىن پايدالانا وتىرىپ جۇرگىزىلگەن ءتۇسىندىرۋ جۇمىستارى جاستارعا كونستيتۋسيالىق رەفورمالاردىڭ ءمانىن تەرەڭ ءارى قولجەتىمدى تۇسىنۋگە مۇمكىندىك بەردى. مۇنداي الاڭدار قۇقىقتىق ساۋاتتىلىقتى ارتتىرىپ، وزەكتى قوعامدىق ماسەلەلەردى اشىق تالقىلاۋعا جاعداي جاسايدى».
ءوز كەزەگىندە «Qamqor» قوعامدىق قورىنىڭ جەتەكشىسى باعدات اناربايەۆا كونستيتۋسيا جوباسىنىڭ قۇندىلىقتىق نەگىزىنە توقتالدى:
«جاڭا جوبادا “ادىلەتتى قازاقستان” باعدارى مەن “زاڭ جانە ءتارتىپ” قاعيداتى ايقىن كورىنىس تاپقان. ازاماتتاردىڭ قۇقىقتارى مەن بوستاندىقتارىنىڭ باسىمدىعى بەكىتىلىپ، بۇل زاڭدىلىقتى نىعايتۋعا جانە قوعامنىڭ مەملەكەتتىك ينستيتۋتتارعا دەگەن سەنىمىن ارتتىرۋعا باعىتتالعان».
الماتى قالاسىنىڭ ۆولونتورلەر ءفرونت-وفيسىنىڭ جەتەكشىسى قىمبات نۇرداۋلەت ۆولونتورلىك قىزمەتكە قاتىستى وزگەرىستەرگە نازار اۋداردى:
«كەز كەلگەن وزگەرىس دۇرىس ءتۇسىندىرىلىپ، ءتيىمدى جۇزەگە اسىرىلعان جاعدايدا عانا وڭ ناتيجە بەرەدى. جاڭا كونستيتۋسيادا ۆولونتورلىك پەن قايىرىمدىلىق قورلارى سالاسىنا قاتىستى وزگەرىستەر ۇسىنىلىپ وتىر، بۇل ۆولونتورلىك قىزمەتتى ىنتالاندىرۋعا باعىتتالعان. بۇگىن مۇندا الماتىداعى جاستار ۇيىمدارىنىڭ كوشباسشىلارى مەن باسشىلارى جينالدى، ال الماتىلىق جاستاردىڭ پىكىرى سالماقتى جانە مىندەتتى تۇردە ناتيجەسىن بەرەدى دەپ ويلايمىن».
جاس كاسىپكەر اقارىس تورەبەكوۆ ءىس-شارا فورماتى جاستاردىڭ زاماناۋي سۇرانىسىنا ساي ەكەنىن اتاپ ءوتتى:
«بۇگىندە جاساندى ينتەللەكت جاستاردىڭ ومىرىندە — وقۋدا، تۇرمىستا، كۇندەلىكتى شەشىمدەر قابىلداۋدا — ەرەكشە ورىن الادى. بىزدە قاتىسۋشىنىڭ سۇراعى، قاتىسۋشىنىڭ پىكىرى جانە جاساندى ينتەللەكتتىڭ پىكىرى بار. جاستار نە دەيدى، جي نە ايتادى جانە ءىس-شارا قوناقتارى قانداي قورىتىندى شەشىمگە كەلەدى — سونى كورۋ قىزىق. جاستار كوزقاراسى ارقىلى قالىپتاسقان ورتاق پىكىر - قۇندى».
ءماجىلىس دەپۋتاتى ايدوس سارىم كونستيتۋسيالىق باتلعا قاتىسىپ، كەزدەسۋدىڭ فورماتىن جوعارى باعالادى:
«بۇل — وتە جاقسى، جاستارعا لايىقتى جانە زاماناۋي فورمات. ءوزىم ءۇشىن دە قىزىقتى بولدى. بۇگىنگە دەيىن جاڭا كونستيتۋسيا جوباسى بويىنشا ازاماتتاردان ءتورت مىڭنان استام ۇسىنىس ءتۇستى. ولار كونستيتۋسيالىق سوتتىڭ سالىستىرمالى كەستەلەرىندە ورنالاستىرىلىپ جاتىر، ياعني ادامدار بۇل وزگەرىستەردىڭ تەڭ اۆتورلارىنا اينالۋدا».
ءىس-شارا قورىتىندىسى بويىنشا كونستيتۋسيالىق رەفورما جونىندەگى كوميسسيا مۇشەلەرى جاڭا ەلدىڭ نەگىزگى زاڭىن قولداعان الماتى جاستارىنىڭ بەلسەندىلىگىن جوعارى باعالادى. قاتىسۋشىلار كونستيتۋسيالىق باستامالاردىڭ ءمانىن تەرەڭ تۇسىنگەنىن كورسەتتى، ال مۇنداي ينتەللەكتۋالدى ءارى اشىق فورماتتار ازاماتتىق جاۋاپكەرشىلىكتى قالىپتاستىرۋعا جانە ەلدەگى قۇقىقتىق رەفورمالاردى قولداۋعا ىقپال ەتەتىنى اتاپ ءوتىلدى.
