جاركەن بودەش ۇلىنىڭ ەسىمى قازاق پوەزياسىندا التىن ارىپتەرمەن تاڭبالانعانى داۋسىز. داڭىقتى اقىن ارامىزدا بولسا بيىل 80 جاسقا تولار ەدى. بۇگىن، 28 قازان الماتىدا جاركەن بودەشۇلىن ەسكە الۋعا ارنالعان ءبىرقاتار شارالار وتپەك. ەسكە الۋ شارالارى اقىنعا ارنالعان ەسكەرتكىش تاقتا قويۋدان باستالدى.
الماتىداعى «قۇلاگەر» ىقشام اۋدانىندا جاركەن بودەش ۇلى تۇرعان ۇيگە ارنايى ەسكەرتكىش تاقتا ورناتىلدى. ەسكە الۋ شاراسىنا قازاقستان جازۋشىلار وداعىنىڭ باسقارما ءتوراعاسى مەرەكە قۇلكەنوۆ، بەلگىلى عالىم ءالىمعازى داۋلەتحان، اقىن قاسىمحان بەگمانوۆ باستاعان قالامگەرلەر مەن زيالى قاۋىم وكىلدەرى قاتىستى.
قازاق پوەزياسىندا اتى ايرىقشا اتالاتىن جاركەن بودەشۇلىن ادەبي ورتا «جاركەن جىراۋ» دەپ تە اتاسادى. ونىڭ تۋعان جەر تاقىرىبىنداعى ساعىنىشقا تولى سار قايماق جىرلارى وقىرمانعا كەڭىنەن تانىمال. ءتىپتى بۇگىندە اقىننىڭ كەيبىر ولەك تارماقتارى جۇرت اۋزىندا تۇراقتى ءسوز تىركەسىنە اينالىپ كەتتى دەسە دە بولادى.
ايتالىق «جۇلدىزعا ورنىن اي بەرمەس، قانشا جارىق بولسا دا» دەيتىن، نەمەسە «قارا جەر قۇنارلىلىعى ءۇشىن ساتىلدى، ماعجان ساتىلماعانى ءۇشىن اتىلدى، مەن جەر ەمەسپىن ساتىلىپ كەتەتىن، ماعجان ەمەسپىن اتىلىپ كەتەتىن» دەيتىن ولەڭ جولدارى وزگەرمەس اكسيوماعا اينالعانداي.
بۇگىن تۇستەن كەيىن 16:00-دە الماتىداعى «الاتاۋ» ءداستۇرلى ونەر تەاترىندا جاركەن بودەشۇلىن ەسكە الۋعا ارنالعان ارنايى ادەبي-سازدى كەش وتەتىنىن وقىرماندارىمىزعا حابارلاي كەتەيىك.
The Alnews
