وسى اپتادا اقش-تىڭ ارا اعايىندىعى مەن يزرايل جانە ليۆان ورتاسىندا كەلىسسوزدەردىڭ العاشقى قادامى جاسالدى. اقش مەملەكەتتىك دەپارتامەنتىنىڭ وكىلدەرى كەلىسسوزدەردى العاشقى ادىمدا تالقىلاۋ ءۇشىن وتكەن دەمالىس كۇندەرى ليۆانعا بارعان بولاتىن.
امەريكالىق ديپلوماتتاردىڭ ليۆانعا بارۋى اقش مەملەكەتتىك حاتشىسى ەنتوني بلينكەننىڭ ايماقتاعى جۇمىس ساپارى تۇسىندا جاسالدى. ول بىلتىر قازاننان بەرى تاياۋ-شىعىسقا 11 رەت ساپارلاپ وتىر.
سوعىس نەگىزىنەن يزرايل مەن حەزبوللا يسلامشىل توبى ورتاسىندا بولىپ جاتقاندىقتان، امەريكالىق ديپلوماتتارمەن اتالعان ۇيىم وكىلى كەزدەستى. ليۆاننىڭ پرەمەر-مينيسترىمەن دە اقش وكىلدەرى جەكە كەزدەسۋ وتكىزگەن.
ايتا كەتەيىك، جاقىندا عانا يزرايل ارنايى وپەراسيالار ارقىلى حەزبوللا باسشىسىن جانە ونىڭ ورنىنا تاعايىندالعالى جاتقان ءىزباسارىن دا ولتىرگەن بولاتىر. ءقازىر حەزبوللانى ۇيىم ىشىندەگى بەدەلدى جەتەكشىلەر بىرلەسىپ باسقارىپ وتىر دەگەن مالىمەتتەر بار.
ال اقش دەلەگاسياسىمەن حەزبوللا تارابىنان نابيب بەرير كەلىسسوز وتكىزگەن. ول ەلدەگى شيت مۇسىلماندارىنىڭ جوعارى جەتەكشىلەرىنىڭ ءبىرى بولىپ سانالادى.
امەريكالىق ديپلوماتيا قىزمەتكەرلەرىنىڭ بەيرۋتقا بارعانىنا قاراماستان، يزرايل ليۆانعا قاراتا اۋە شابۋىلدارىن توقتاتقان جوق. سوڭعى كۇندەرى يزرايل كۇشتەرىنىڭ نىساناسىنا ليۆاندىق بانك عيماراتتارى دا ىلىنۋدە. ولار بانكتەردى حەزبوللانى قارجىلاندىرۋعا كومەكتەسىپ جاتىر دەپ ايىپتايدى.
