رەسەي پرەزيدەنتى ۆلاديمير پۋتين جاقىندا قىتايعا ساپارلاي باردى. بۇل ساپاردان كەيىن رەسەي-قىتاي قارىم-قاتىناسى جاڭا دەڭگەيگە كوتەرىلىپ، ءوزارا ءتيىمدى وداقتاستىق باعىتقا دامىپ بارا جاتقانىن كورسەتتى. دەگەنمەن، ەكى ەلدىڭ بىر-بىرىنە تەرەڭ جاقىنداستىعى وزگە الىپ ەلدەردەن الشاقتاتىپ جىبەرۋى مۇمكىن. بۇل رەتتە ماسەلەنى ءۇندىستان تۇرعىسىنان قاراستىرىپ كورمەكپىز.
ازياداعى ءۇش الىپ ەلدىڭ ورتاسىنداعى قارىم-قاتىناس فورمۋلاسى بىلاي:
رەسەي-قىتاي اراسى جاقىن، ءقىتاي-ۇندىستان اراسى سالقىن، ەسەسىنە ءۇندىستان مەن رەسەي ماڭىزدى سەرىكتەس.
رەسەي-قىتاي اليانسى قارقىندى دامىعان كەزدە، ءۇندىستان ءوزىنىڭ رەسەيمەن قارىم-قاتىناسىنىڭ بولاشاعىنان الاڭداي باستادى. سەبەبى، جاڭا-دەليدىڭ بەيجىڭمەن ءتۇبىرلى قايشىلىقتارى بار. ۇزاق ۋاقىت جىبىمەي كەلە جاتقان توڭتەرىس تاقىرىپتار اسىرەسە شەكارا ماسەلەسىندە. ال ماسكەۋمەن قارىم-قاتىناسى تۇراقتى كۇيدەگى جاڭا-دەلي ءۇشىن وسى ءۇشجاقتى فورمۋلانىڭ قازىرگى كۇيى قولايسىزدىقتار اكەلۋى مۇمكىن.
ءۇندىستان تارابى ءپۋتيننىڭ قىتايعا ساپارىن ءجىتى قاداعالادى. ساپار كەزىندە ءۇندى ساراپشىلارى رەسەي-قىتاي قارىم-قاتىناسىنا سان قىرىنان توقتالىپ جاتتى. ءۇندىستاننىڭ رەسەيمەن ۇزاق مەرزىمدى اسكەري جانە قورعانىس سالاسىنداعى بايلانىستارىن جانە شەكارالىق ماسەلەلەرگە بايلانىستى قىتايمەن جالعاسىپ كەلە جاتقان قايشىلىقتارىن ەسكەرگەندە جاڭا-دەلي بارىنشا ساقتىق تانىتادى دەپ بولجاۋعا بولادى.
ءدال ءقازىر رەسەي مەن جۇڭگو اراسىنداعى قارىم-قاتىناستىڭ تەرەڭدەي ءتۇسۋى ءۇندىستان ءۇشىن ستراتەگيالىق، ەكونوميكالىق جانە قاۋىپسىزدىك ماسەلەلەرىندە ۇلكەن سۇراقتاردى جاراتتى. ەڭ قيىنى – جۇڭگو مەن رەسەي اراسىنداعى قورعانىس سالاسىنداعى ىنتىماقتاستىق. پۋتين ساپارىنداعى بىرلەسكەن مالىمدەمەلەر ەكى ەلدىڭ ءوزارا سەنىمنىڭ جوعارى دەڭگەيدە ەكەنىن كورسەتكەندەي بولدى. مىنە وسى ماسلەلە ۇندىستەردى الاڭداتادى.
ءبىراق، ءۇندىستان ءۇشىن جاڭا جول دايىن. امەريكا قۇراما شتاتتارى ءۇندى-تىنىق مۇحيتى ايماعىندا 2019 جىلدان بەرى جاڭا ستراتەگيانى جۇزەگە اسىرىپ جاتىر. ءارى سودان بەرى ءۇندىستاندى رەسەيدەن دە، قىتايدان دا ءبولىپ الىپ، وزىنە سەرىكتەس ءتىپتى وداقتاس ەتۋگە كۇش سالىپ كەلەدى. شەتەلدىك كەيبىر ساراپشىلاردىڭ پىكىرىنشە ماسكەۋ مەن پەكين اراسىنىڭ جاقىنداي ءتۇسۋى جاڭا-دەليدى ۆاشينگتونعا قاراي باستايدى دەپ سانايدى.
