الماتى قالاسى اكىمىنىڭ تاپسىرماسىمەن بيىل تامىزدا قالانىڭ شىعىس بولىگى ءۇشىن جاڭا كارىز كوللەكتورىنىڭ قۇرىلىسى اياقتالدى، - دەپ حابارلايدى alnews.
ۇزىندىعى 19 شاقىرىم بولاتىن جاڭا كوللەكتوردىڭ ىسكە قوسىلۋى قالانىڭ شىعىس بولىگىنىڭ 100 مىڭ تۇرعىنىن تۇراقتى سۋ بۇرۋ جۇيەسىمەن قامتاماسىز ەتىپ، دۋمان شاعىن اۋدانى، شىعىس اينالما جولى بويىنداعى تۇرعىن ۇيلەر جانە تالعار اۋدانىنىڭ ىرگەلەس اۋماقتارىن قامتيتىن قولدانىستاعى كارىز جەلىلەرىنە تۇسەتىن جۇكتەمەنى ازايتتى.
سونىمەن قاتار، كوللەكتور «اقپاراتتىق تەحنولوگيالار پاركى» ارنايى ەكونوميكالىق ايماعىن (اەا يتپ) دامىتۋدا شەشۋشى ءرول اتقارادى.
بۇل كوللەكتوردىڭ قۇرىلىسى 2017 جىلى «اريا جانا استانا» ج ش س مەردىگەر ۇيىمنىڭ مىندەتىن ورىنداماۋىنا بايلانىستى توقتاتىلعان بولاتىن. سوت شەشىمىمەن وسى مەردىگەر مىندەتىنە سالعىرت قارايتىن جاۋاپسىز قىزمەت كورسەتۋشى بولىپ تانىلدى.
2023 جىلى الماتى قالاسىنىڭ ەنەرگەتيكا جانە سۋ شارۋاشىلىعى باسقارماسى «الماتى سۋ» مقك-مەن بىرلەسە وتىرىپ، بارلىق كەمشىلىكتى جويۋ ءۇشىن اقاۋ اكتىسىن جاسادى. «Integra Construction» ج ش س مەردىگەر ۇيىمى قاجەتتى قالپىنا كەلتىرۋ جۇمىستارىن ورىندايتىن بولىپ، جاۋاپكەرشىلىكتى وزىنە الدى. الەۋمەتتىك جاۋاپكەرشىلىك اياسىندا كومپانيا 2023 جىلدىڭ تامىزى مەن 2024 جىلدىڭ تامىزى ارالىعىندا قۇرىلىس-مونتاج جۇمىستارىن اياقتادى.
بۇل نىساننىڭ ىسكە قوسىلۋى اپاتتار مەن ەكولوگيالىق ماسەلەلەر ءقاۋپىن ازايتۋمەن قاتار، قالانىڭ شىعىس بولىگى مەن الماتى وبلىسىنىڭ ىرگەلەس اۋداندارىنىڭ ينفراقۇرىلىمىن ودان ءارى تۇراقتى دامىتۋعا العىشارت جاسايدى.
سونداي-اق، قالا اكىمى تاپسىرماسىمەن 130 مىڭنان استام تۇرعىندى سۋمەن قامتاماسىز ەتەتىن ۇزىندىعى 34 شاقىرىم بولاتىن جاڭا باتىس كارىز كوللەكتورىنىڭ جوباسى جاسالىپ جاتىر. بۇل الماتى قالاسىنىڭ ناۋرىزباي جانە الاتاۋ اۋداندارى مەن الماتى وبلىسىنىڭ ىرگەلەس اۋداندارىن قامتيدى. قۇرىلىستى 2025 جىلدىڭ ءىى توقسانىندا باستاۋ جوسپارلانعان.
بۇعان قوسا، بۇكىل قالانىڭ اعىندى سۋىن بۇرۋ قىزمەتىن اتقاراتىن №1، 2، 3 قولدانىستاعى كارىز كوللەكتورىن قايتا جاڭارتۋ جۇمىستارى جۇرگىزىلۋدە. رەكونسترۋكسيانى 2025 جىلدىڭ ءىى توقسانىندا باستاۋ كوزدەلىپ وتىر.
