«ازمك» ج ش س وندىرىستىك الاڭىندا ەڭبەك ۇجىمىمەن كەزدەسۋ ءوتتى. شارا بارىسىندا كاسىپورىننىڭ ىشكى جۇمىسى تانىستىرىلىپ، جۇمىسشىلارمەن تىكەلەي پىكىر الماسۋ ۇيىمداستىرىلدى، - دەپ حابارلايدى alnews.
كەزدەسۋگە قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، كونستيتۋسيالىق كوميسسيانىڭ مۇشەسى سەرگەي پونوماريەۆ قاتىستى. ول الداعى رەفەرەندۋم اياسىندا ۇسىنىلىپ وتىرعان جاڭا كونستيتۋسيا جوباسىنىڭ نەگىزگى باعىتتارى مەن ماڭىزدىلىعىنا توقتالىپ جۇمىسشىلارمەن تىلدەستى.
سەرگەي پونوماريەۆ ءوز سوزىندە كونستيتۋسيا – ەلدىڭ بولاشاعىن ايقىندايتىن باستى قۇجات ەكەنىن اتاپ ءوتتى:
«قۇرمەتتى وتانداستار!بۇگىن ءبىز ورتاق ءۇيىمىز – قازاقستاننىڭ تاعدىرىن ايقىنداپ وتىرمىز. كۇن سايىن حالىقتىڭ ناقتى سۇرانىسىن ەستىپ، قوعامنىڭ تىنىسىن جاقسى بىلەتىن دەپۋتات ءارى جۋرناليست رەتىندە نىق سەنىممەن ايتامىن: جاڭا كونستيتۋسيا – قوعام كۇتكەن ۇمىتكە بەرىلگەن ادال جاۋاپ. بۇل – ءۇمىتتى ناقتى كەپىلدىككە اينالدىراتىن قۇجات. مەن بۇل جوبانى قولدايمىن، وسى ورايدا ءۇش نەگىزگى ماسەلەگە توقتالعىم كەلەدى. بىرىنشىدەن، بۇل – ءبىرتۇتاس حالىقتىڭ كونستيتۋسياسى. كونستيتۋسيانىڭ پرەامبۋلاسى مەن باپتارىندا قازاقستان حالقىنىڭ بىرلىگى، تاريحي قازاق جەرىندەگى مەملەكەتتىلىكتى نىعايتۋ ايقىن كورسەتىلگەن. مۇندا «ءوزىمىز» جانە «وزگە» دەگەن ۇعىم جوق. ءاربىر ازاماتتىڭ ار-نامىسى مەن قۇقىعى ءتىلى مەن ەتنوستىق تەگىنە قاراماستان زاڭمەن تەڭ قورعالادى. ەكىنشىدەن، بۇل – تىكەلەي ديالوگ كونستيتۋسياسى. ءبىز ءجيى «بيلىك حالىقتى ەستۋى ءتيىس» دەگەندى ايتامىز. جاڭا كونستيتۋسيا وسى باعىتتا ۇلكەن قادام جاساپ، بىرەگەي ينستيتۋت – قازاقستان حالىق كەڭەسىن قۇرۋدى كوزدەيدى. ۇشىنشىدەن، بۇل – ەكولوگيالىق جاۋاپكەرشىلىك كونستيتۋسياسى. ەلىن سۇيەمىن دەگەن ادام تۋعان جەرىنىڭ لاستانۋىنا بەيجاي قاراي المايدى. «تازا قازاقستان» جالپىۇلتتىق باستاماسى ەكولوگيا ءار ازاماتتى تولعاندىراتىن ماسەلە ەكەنىن كورسەتتى. بۇل كونستيتۋسيا – پروگرەسسيۆتى ءارى ءادىل. ول اشىق پىكىرتالاستار مەن تىكەلەي ەفيرلەر ارقىلى، ەشقانداي سۇزگى مەن سەنزۋراسىز تالقىلاۋدان ءوتتى. بۇل قۇجات ءبىزدى حالىق كەڭەسى ارقىلى بىرىكتىرەدى، تەڭ قۇقىق ارقىلى قورعايدى جانە بولاشاعىمىزدى ساقتايدى. بۇل – ءبىز ءۇشىن جانە بالالارىمىز ءۇشىن جاسالعان كونستيتۋسيا. بارشاڭىزدى ازاماتتىق دانالىق تانىتۋعا شاقىرامىن.بىرگە كۇشتى، تازا ءارى ادىلەتتى قازاقستان قۇرايىق!»
مۋستافايەۆ الادين، ساياساتتانۋشى:
«بۇگىن ءبىز ەلدەگى ەڭ ءىرى وندىرىستىك ورتالىقتاردىڭ ءبىرى – ازمك كاسىپورنىندا بولىپ، الداعى رەفەرەندۋم اياسىندا ءتۇسىندىرۋ جۇمىستارىن جۇرگىزدىك. كەزدەسۋ بارىسىندا ازاماتتارعا كونستيتۋسياعا ەنگىزىلىپ جاتقان وزگەرىستەردىڭ ءمانى مەن ماڭىزىن جەتكىزۋگە باسىمدىق بەرىلدى.اتاپ ايتۋ كەرەك، ۇسىنىلىپ وتىرعان وزگەرىستەر جاي عانا جەكەلەگەن تۇزەتۋلەر ەمەس. كونستيتۋسيانىڭ 74 پايىزدان استامى جاڭارىپ، ەلدىڭ نەگىزگى زاڭى تۇبەگەيلى جاڭاشا سيپاتقا يە بولماق. بۇل – قوعامنىڭ بارلىق سالاسىن قامتيتىن اۋقىمدى وزگەرىس. وسى تۇرعىدا ءاربىر قازاقستان ازاماتىنىڭ داۋىس بەرۋگە قاتىسۋى اسا ماڭىزدى. مەنىڭ ويىمشا، ەشكىم ءوز مەملەكەتىنە، ءوز ەلىنىڭ بولاشاعىنا، بالالارىنىڭ ەرتەڭىنە بەيجاي قاراماۋى ءتيىس. ءار ازامات سايلاۋ ۋچاسكەسىنە كەلىپ، ءوز تاڭداۋىن جاساپ، بولاشاق ۇرپاقتىڭ تاعدىرى ءۇشىن داۋىس بەرۋى قاجەت» - دەدى.
