الماتى قالاسىنىڭ اكىمى دارحان ساتىبالدى 1981 جىلدان بەرى جاھاندىق تەحنولوگيالىق ترەندتەردى قالىپتاستىرىپ كەلە جاتقان، الەمدەگى ەڭ ءىرى تەحنولوگيالىق كورمە – GITEXء-تىڭ عالامدىق ۇيىمداستىرۋشىسى inD كومپانياسىنىڭ وكىلدەرى تريكسي لو ميرماند پەن رۋپەرت اداممەن كەزدەستى، - دەپ حابارلايدى alnews.
كەزدەسۋ بارىسىندا الماتىدا GITEX AI Central Asia & Caucasus Kazakhstan كورمەسىن وتكىزۋ ماسەلەلەرى جانە ونى ۇيىمداستىرۋدىڭ ناقتى قادامدارى تالقىلاندى. قالا اكىمى اتاپ وتكەندەي، الماتى برەندتىڭ ورتالىق ازياعا ەنۋ نۇكتەسىنە اينالىپ، حالىقارالىق ىنتىماقتاستىقتى كەڭەيتۋگە، ينۆەستيسيا تارتۋعا جانە تەحنولوگيالىق ستارتاپتاردى ىلگەرىلەتۋگە جاڭا مۇمكىندىك اشادى.
«الماتى وڭىردەگى جەتەكشى IT-حاب رەتىندە ءوزىن الدەقاشان تانىتتى: مۇندا تەحنولوگيالىق كومپانيالار، حالىقارالىق ورتالىقتار شوعىرلانعان جانە بەلسەندى ستارتاپ-ەكوجۇيە قۇرىلعان. GITEX فورۋمىن وتكىزۋ بۇل جەتىستىكتەردى حالىقارالىق دەڭگەيدە تانىستىرۋعا جانە قالاعا جاڭا سەرىكتەستەر مەن ينۆەستورلاردى تارتۋعا مۇمكىندىك بەرەدى»، – دەدى دارحان ساتىبالدى.
ونىڭ ايتۋىنشا، ينفراقۇرىلىمدى دايىنداۋ ماسەلەسىنە ەرەكشە نازار اۋدارىلعان. اتاپ ايتقاندا، «اتاكەنت» ءقىىو الاڭىن جاڭعىرتۋ، لوگيستيكانى ۇيىمداستىرۋ جانە بارلىق تارتىلعان قىزمەتتەردىڭ ۇيلەسىمدى جۇمىسىن قامتاماسىز ەتۋ كوزدەلگەن. الماتى اكىمى سالالىق باسقارمالارعا ۇيىمداستىرۋشىلارمەن بىرلەسىپ، دايىندىقتىڭ ەگجەي-تەگجەيلى جوسپارىن ازىرلەپ، ونىڭ ناقتى ورىندالۋىن قامتاماسىز ەتۋدى تاپسىردى.
inD كومپانياسىنىڭ باس ديرەكتورى، GITEXء-تىڭ عالامدىق ۇيىمداستىرۋشىسى تريكسي لو ميرماند ءوز سوزىندە:
«الماتى ەۋروپا مەن ازيا توعىسىنداعى ماڭىزدى يننوۆاسيالىق ورتالىقتاردىڭ بىرىنە اينالىپ كەلەدى. بۇل – قازاقستاننىڭ سيفرلىق جانە جاساندى ينتەللەكت باعىتىنداعى امبيسيالارى ناقتى ەكونوميكالىق ينفراقۇرىلىمعا ۇلاساتىن قالا. GITEX وسى ۇدەرىستى جەدەلدەتۋ ءۇشىن اسا قولايلى كەزەڭدە كەلىپ وتىر. بۇل ءوڭىردىڭ تەحنولوگيالىق الەۋەتىن، ينۆەستيسيالىق تارتىمدىلىعىن جانە جاھاندىق بايلانىسىن كۇشەيتەدى. ناتيجەسىندە ايماق جاساندى ينتەللەكتكە نەگىزدەلگەن جاڭا ەكونوميكانىڭ ماڭىزدى قاتىسۋشىسى رەتىندە ورنىعادى»، – دەپ اتاپ ءوتتى.
ونىڭ ايتۋىنشا، 45 جىلدان استام ۋاقىت ىشىندە GITEX ۇكىمەتتەر، كورپوراسيالار، ستارتاپتار، ينۆەستورلار جانە تەحنولوگيالىق ەكوجۇيەنىڭ نەگىزگى ويىنشىلارى اراسىندا سەنىمدى سەرىكتەس رەتىندە حالىقارالىق بەدەلگە يە بولىپ، الەمدەگى ەڭ ءىرى تەحنولوگيالىق ءىس-شارالار برەندىنە اينالدى.
بۇگىندە GITEX 14 قالا مەن ەلدە، سونىڭ ىشىندە ابۋ-دابي، دۋباي، برازيليا، ەگيپەت، گەرمانيا، قازاقستان، كەنيا، ماروككو، نيگەريا، سەربيا، سينگاپۋر، تۇركيا جانە ۆەتنامدا وتكىزىلەدى.
GITEX AI Central Asia & Caucasus Kazakhstan كورمەسى الماتىدا 2026 جىلى 4–5 مامىر كۇندەرى وتەدى. ءىس-شاراعا الەمنىڭ ءار تۇكپىرىنەن ستارتاپتار، ينۆەستورلار جانە مەملەكەتتىك قۇرىلىمداردىڭ وكىلدەرى قاتىسادى. كورمەنىڭ وتكىزىلۋى قالا مەن بۇكىل ءوڭىر ءۇشىن ماڭىزدى وقيعاعا اينالىپ، تەحنولوگيالىق سالانىڭ دامۋىنا، حالىقارالىق ارىپتەستىكتى نىعايتۋعا جانە يننوۆاسيالىق ەكونوميكانى قۇرۋعا قوسىمشا سەرپىن بەرەدى.
2026 جىلعى ەكسپوزيسيا ءۇش باسىم باعىتقا شوعىرلانادى: جاساندى ينتەللەكت (تەحنولوگيالاردى قالالىق ورتا مەن بيزنەسكە ينتەگراسيالاۋ)، GovTech (قازاقستاننىڭ سيفرلىق مەملەكەتتىك قىزمەتتەر سالاسىنداعى جەتىستىكتەرىن تانىستىرۋ)، كيبەرقاۋىپسىزدىك (دەرەكتەردى جانە بۇلتتىق ەسەپتەۋلەردى قورعاۋ شەشىمدەرى)، سونداي-اق ءىس-شارانىڭ قالا ەكونوميكاسىنا ىقپالى (جىلجىمايتىن مۇلىك، ۆاليۋتا جانە ينۆەستيسيالار) قاراستىرىلادى.
