«ادىلەتتى جانە پروگرەسسيۆتى قازاقستاننىڭ حالىقتىق كونستيتۋسياسىن قولداۋ» جالپىۇلتتىق كواليسياسىنىڭ رەسمي سايتى الداعى رەفەرەندۋمعا جانە جاڭا كونستيتۋسيا جوباسىنا ارنالعان. رەسۋرس قازاقستاندىقتارعا ۇسىنىلىپ وتىرعان وزگەرىستەردىڭ مازمۇنىمەن تانىسۋعا مۇمكىندىك بەرەتىن تۇسىنىكتى ءارى قولجەتىمدى اقپارات الاڭى رەتىندە ازىرلەندى، - دەپ حابارلايدى alnews.
referendum2026.kz سايتىندا نەگىزگى زاڭ جوباسىنىڭ تولىق ءماتىنى جاريالاندى. سونىمەن قاتار مۇندا وزەكتى ماتەريالدار، ساراپشىلاردىڭ پىكىرلەرى جانە كواليسيانىڭ وڭىرلەردەگى جۇمىسىنا قاتىستى جاڭالىقتار تۇراقتى تۇردە جاريالانىپ وتىرادى.
پلاتفورمانىڭ قۇرىلىمى پايدالانۋشىلارعا ونداعى مالىمەتتەردى وڭاي باعدارلاپ، الداعى داۋىس بەرۋگە قاتىستى سۇراقتارىنا جاۋاپ تابۋعا ىڭعايلى ەتىپ جاسالعان.
اقپاراتتى قابىلداۋدىڭ قولايلىلىعىنا ايرىقشا كوڭىل ءبولىنىپ، ەرەكشە قاجەتتىلىكتەرى بار ازاماتتارعا ارنالعان بەيىمدەلگەن نۇسقا جانە بەت پارامەترلەرىن ءوز قالاۋىنشا وزگەرتۋ مۇمكىندىگى قاراستىرىلعان.
ءتۇسىندىرۋ ماتەريالدارىنان بولەك، سايتتا كونستيتۋسيانىڭ ءمانى مەن ونىڭ قوعام ومىرىندەگى ءرولىن تەرەڭىرەك ۇعىنۋعا كومەكتەسەتىن تاقىرىپتىق ماتەريالدار، ۆيدەوكونتەنت جانە ينتەراكتيۆتى فورماتتار ۇسىنىلعان.
سايت ۇسىنىلىپ وتىرعان رەفورمالاردىڭ ءمانىن جان-جاقتى ءتۇسىنىپ، سانالى شەشىم قابىلداعىسى كەلەتىن بارلىق ازاماتقا سەنىمدى ءارى تەكسەرىلگەن اقپاراتقا قول جەتكىزۋگە مۇمكىندىك بەرەدى.
بۇل رەسۋرستىڭ ىسكە قوسىلۋى «ادىلەتتى جانە پروگرەسسيۆتى قازاقستاننىڭ حالىقتىق كونستيتۋسياسى ءۇشىن» جالپىۇلتتىق كواليسياسىنىڭ جۇيەلى جۇمىسىنىڭ جالعاسى بولدى. ونىڭ قۇرامىنا جەتەكشى ساياسي پارتيالاردىڭ وكىلدەرى مەن جۇزدەگەن قوعامدىق ۇيىمدار كىردى. بىرلەستىكتىڭ جۇمىسى ءقازىردىڭ وزىندە ەلىمىزدىڭ بارلىق وڭىرىندە قىزۋ ءجۇرىپ جاتىر. ول جاڭا كونستيتۋسيا جوباسىنىڭ نەگىزگى قاعيدالارىن تۇسىندىرۋگە جانە قوعامنىڭ بۇل ىسكە بەلسەندى ارالاسۋىنا باعىتتالعان كەزدەسۋلەر مەن اشىق ديالوگ الاڭدارى ارقىلى جۇزەگە اسىرىلىپ جاتىر.
