«الماتى – ءبىزدىڭ ورتاق ءۇيىمىز». الماتىلىقتاردى سۇيىكتى قالامىزدى تازا دا جايلى ەتۋگە شاقىراتىن ناۋقان وسىلاي اتالادى. رەسپۋبليكا كولەمىندە ءوتىپ جاتقان «تازا قازاقستان» اكسياسىنا وراي قالادا كوكتەمگى تازالىق جۇمىستارى قارقىندى ءجۇرىپ جاتىر.
يگى ىسكە قالا تازالىعىنا جاۋاپتى ماماندار، تازالاۋشى جۇمىسكەرلەر، سونداي-اق قالا تازالىعىنا نەمقۇرايلى قارامايتىن ەرىكتىلەر دە قاتىسۋدا.
بۇگىن تازالاۋ جۇمىستارى اباي داڭعىلى مەن ناۋرىزباي كوشەسىنەن باستاپ تيميريازيەۆ كوشەسىنە دەيىنگى ارالىقتى قامتىدى.
اكسيا 1 ايعا جوسپارلانعان، ءساۋىر ايىندا دا جالعاسىن تاپپاق. ناۋقاننىڭ باستى ماقساتى – كورىكتى تازا قالانى بۇدان دا ۇقىپتى ۇستاۋ.
بۇل جونىندە بوستاندىق اۋدانى كورىكتەندىرۋ ءبولىمىنىڭ باس مامانى نۇرسۇلتان ورازىمبەتوۆ مالىمدەدى.
– ءبىز 1 ناۋرىزدان باستاپ 375 كوشەنىڭ تازالاۋ جۇمىستارىنا كەشەندى تۇردە كىرىستىك. ايتا كەتەرلىگى، كوشە، ارىق بويىن عانا تازالاپ قويماي، تۇرعىن ۇيلەردىڭ اراسىنا دەيىن تازالاپ ءجۇرمىز. اتالمىش جۇمىستارعا 12-13 تەحنيكا، 40–45 جۇمىسكەر تارتىلعان. الدا Instagram، Facebook پاراقشالارىمىزدا جۇرتشىلىقتى ەرىكتى تۇردە ءوز قالامىزدى تازارتۋعا سەنبىلىككە شاقىراتىن بولامىز. مۇنداي يگى ىستەر ءوز جالعاسىن تابادى، – دەدى ول.
سونىمەن قاتار، «الماتى تازالىق» مەملەكەتتىك كوممۋنالدىق كاسىپورىنى جۇمىسكەرلەرى دە وزدەرىنىڭ كۇندەلىكتى جۇمىس بارىسى تۋرالى ايتىپ بەردى.
– الماتى قالاسىنىڭ تازالىعىنا ءوز ۇلەسىمىزدى قوسىپ ءجۇرمىز. بۇل ءبىزدىڭ قالىپتاسقان شارۋامىز. وزىمىزگە بەلگىلەنگەن كوشە بويى مەن ارىقتار ساعاسىن قوقىستان تازارتامىز. وسىلايشا كۇننىڭ ىستىق-سۋىعىنا قاراماي ەڭبەك اتقارىلادى، – دەدى تازالىقشى ۆەنەرا بەيسەنوۆا.
